[1] Só-lò-mùn ke sṳ̂-kô, he sṳ̂-kô chûng chui chiâng ke sṳ̂-kô.
[2] Ngien kì yung kì ke choi-sùn chîm ngài! Ngì ke oi-chhìn pí hó-chiú kha-hiông.
[3] Ngì ke sṳ̂n-thí yû hiông-kâu ke hiông-mi; ngì ke miàng chhiong hiông-kâu fat-chhut chhîn-hiông, tông-yèn se-moi-é chhiòn-phu án oi-mu ngì.
[4] Ngien ngì khiên-tén ngài, ngài-têu kiak-kiak lòi-hi chéu; cho ngài ke kiûn-vòng, thu ngài ngi̍p ngì ke kiên-fòng. Ngài-têu oi khiung-ha lòi hióng-su fôn-hí khoai-lo̍k; yû ngì ke oi-chhìn, ngài kha-yàng hióng-su hó-chiú. Nàn-koai se-moi-é chhiòn-phu án oi-mu ngì!
[5] Yâ-lu-sat-lâng ke se-moi-é â, ngài sûi-yèn kha vû, chúng-he tông-chiâng, chhiong Kî-tha̍t ke vû yòng-mô chong-phùng, chhiong Só-lò-mùn kiûng-chûng ke pu-liàm.
[6] M̀-hó yîn-vi ngài án vû chhiu khon-khiâng ngài, he ngit-thèu chiông ngài sai-to án vû ke â! Yîn-vi ngài khiung-ôi ke hiûng-thi hiong ngài fat-khién, kâm ngài chhai phù-thò-yèn kûng-chok, ngài lièn chhṳ-kâ ke phù-thò-yèn sa mò cheu-ku tó!
[7] Ngài ke oi-ngìn â, chhiáng lâu ngài kóng, ngì chhai nai-vi chóng-yòng? Tông-chu chhai nai-vi pûn yòng hiet-khun? Ngài cho má-ke oi chhai ngì thùng-phân ke yòng-khiùn sùn, chhiong êm-tén mien-sâ ke ngìn kín chhìm ngì nè?
[8] Chui-chiâng ke se-moi-é â, ngì na m̀-tî ke só-chhai, thèn yòng-khiùn ke kiok-chiak hi, chhai chóng-yòng ke chong-phùng sùn, pûn ngì ke sân-yòng sṳ̍t chhó.
[9] Ngài ke chhìn-moi â, ngì chhiong Âi-khi̍p-vòng chan-chhâ ke chun-mâ án-chiâng.
[10] Ngì lióng-phién ke mien-kap-lón yîn-vi koa ngí-vàn fî-sòng chiâng, kiáng-kîn tai-tén pha̍t-lien ya chhin-chiâng.
[11] Ngài-têu lòi vi ngì tá kîm lien-é, vi ngì siông ngiùn-è ke chông-sṳt-phín.
[12] Ngài ke kiûn-vòng chhô-si̍t ke sṳ̀, ngài ke hiông-súi fat-chhut hiông-mi.
[13] Ngài ke chhìn-lòng sòng-sòng kho chhai ngài ke hiûng-chhièn; kì chhiu-chhiong ngài tai-tén yit-thoi mu̍t-yo̍k án-hiông.
[14] Ngài ke chhìn-lòng chhiong yit-chhon fung-siên-fâ, khôi chhai Yún-Kî-tí ke phù-thò-yèn tú.
[15] Ngài ke chhìn-moi â, ngì sṳ̍t-chhai fî-sòng chiâng! Ngì ke muk-chû chhiong ngie̍t-kap-è án vûn-yù.
[16] Chhìn-lòng â, ngì tông sṳ̂-vùn, tông tet-ngìn-siak! Ngài-têu cho-tet yung chhiâng-chhó lòi-chún mìn-chhòng,
[17] yung hiông-pak-su cho vuk-táng ke tung-liòng, yung chhiùng-su chún-cho vuk-táng ke kok-è.