[1] Ngì oi tî, chhai sṳ-kie ke ma̍t-khì voi yû chúng-chúng ke khú-nan.
[2] Ke-sṳ̀, ngìn voi tân-chhiang ku chhṳ-kâ, thâm-chhòi, chhṳ-khoâ, kiêu-ngau, fí-pong, phoi-ngia̍k yà-ôi, mòng-ên poi-ngi, mò sṳn-kiet,
[3] mò chhîn-chhìn, m̀-hén ngièu ngìn, hau kóng yèu-ngièn, yâ-màn, chhû-phau, yen-hen liòng-san.
[4] Kì-têu voi phoi-ngia̍k chú-ngìn, chhut-mai phèn-yû, sùi-yi lon-hàng, chhṳ-kô chhṳ-thai, chhin-oi hióng-lo̍k yàng-ko kin-oi Song-ti.
[5] Kì-têu yû kin-khièn ke ngoi-péu, chúng-he khî-chhie̍t chṳ̂n-sṳ̍t ke kin-khièn. Liá-chúng ngìn, ngì oi sám-khôi.
[6] Kì-têu tông-chûng yû-têu ngìn tông voi chon, ngi̍p-to phe̍t-ngìn vuk-hâ, hi mì-fe̍t ke-têu sîm-chṳ ngiôn-ngio̍k, pûn chhui ap-chṳ, pûn kok-chúng yu̍k-mong khiên-tén-chéu ke fu-ńg.
[7] Ke-têu fu-ńg sûi-yèn sòng-sòng ho̍k-si̍p, chúng-he yit-chhṳ̍t mò fap-thu ngin-sṳt chṳ̂n-lî.
[8] Chhiu-chhiong kú-sṳ̀-thoi ke Ngâ-nì lâu Yòng-pu-lùi fán-tui Mô-sî án-ngiòng, liá-ha liá-têu ngìn ya cheu-yong fán-tui chṳ̂n-lî. Kì-têu he sîm-sṳ̂ phai-fai ke ngìn, chhai sin-ngióng-song khî-m̀-he̍t.
[9] Chúng-he, kì-têu m̀-voi yû phe̍t ke phu-su lé; yîn-vi kì-têu ke ngong-tong voi chhai chung-ngìn mien-chhièn hién-mìn chhut-lòi, chhiong Ngâ-nì lâu Yòng-pu-lùi yit-yong.
[10] Lun-tó ngì, ngì yí-kîn sun-chhiùng ngài ke kau-hiun, ho̍k ngài ke cho-ngìn, ngài ke chṳ-hiong, sin-sîm, thai-liong, oi-sîm, lâu ngiûn-nai,
[11] yu fûn-tâm ngài só-su ke pet-hoi lâu khú-nan. Chhai Ôn-thì-â, Yî-kô-ngiam, lâu Lu-sṳ̂-tet liá-têu thi-fông, ngài só tù-tó ke lâu só ngiûn-su ke pet-hoi, ngì chhiòn-phu tî; chúng-he, Chú kiu ngài thot-lì liá yit-chhiet.
[12] Mò m̀-chho̍k, fàm li̍p-chṳ thèn Kî-tuk Yâ-sû lòi ko kin-khièn sên-fa̍t ke ngìn, lûng-chúng voi tù-tó pet-hoi.
[13] Sià-ok ke ngìn lâu ke-têu lau-é, kì-têu ke chhìn-khóng ya voi yit-ngit pí yit-ngit kha fái; kì-têu phien phe̍t-ngìn, ya pûn-ngìn phien.
[14] Lun-tó ngì, ngì oi kiên-chhṳ̀ só ho̍k-si̍p lâu khok-sin ke chṳ̂n-lî. Ngì tî má-ngìn he ngì ke thó-sṳ̂;
[15] ngì ya ki-tet, ngì chhiùng-se chhiu mìn-pha̍k Sṳn-kîn, chhiu-he nèn pûn ngì tet-tó chṳ-fi, chṳ́-sṳ ngì thûng-ko sin Kî-tuk Yâ-sû lòi tet-kiu ke sû.
[16] Chhiòn-pún Sṳn-kîn he su Song-ti ke lìn-kám lòi siá ke, tui kau-thô chṳ̂n-lî, chṳ́-chit chho-ngu, kiu-chṳn ko-sṳt, chṳ́-sṳ ngìn-sên ke chṳn-lu, lûng-chúng yû li-yit,
[17] oi pûn su̍k Song-ti ke ngìn tet-tó chhûng-chiuk ke chún-phi, nèn hàng kok-chúng ke san-sṳ.