[1] Ngài ke lai-é â, ngì oi thûng-ko Kî-tuk Yâ-sû só-su ke ên-tién kông-khiòng hí-lòi.
[2] Ngì chhai chhin-tô chṳn-ngìn mien-chhièn tui ngài liâng-su ke kau-hiun, ngì ya yin-kôi kâu-thok pûn ke-têu ngì só sin-yung yu nèn kâu phe̍t-ngìn ke ngìn.
[3] Sṳ̂n-vì Kî-tuk Yâ-sû ke chîn-pîn, ngì oi siông-khiung lòi fûn-tâm khú-nan.
[4] Yit-ke tông-pîn ke ngìn oi chên-chhí chóng-kôn ke chhṳ̂n-chan, chhiu m̀-hó pûn yàng-ngoi ke sṳ-chhìn chhàn-sṳ̂n.
[5] Yun-thung-yèn pí-soi ke sṳ̀ na mò chûn-sú kûi-chet, chhiu m̀-sṳ́ sióng-oi tet-tó chióng-sóng.
[6] Sat-mâng kâng-chung ke nùng-fû yin-tông siên hióng-su só sû-sṳ̀n ke.
[7] Ngì oi hó-hó sṳ̂-sióng ngài só-kóng ke fa, yîn-vi Chú yit-thin voi pûn ngì mìn-pha̍k yit-chhiet sṳ-chhìn.
[8] Ngì oi ki-tet Yâ-sû Kî-tuk; kì he Thai-ví ke heu-thoi, kì yí-kîn tui sí-ngìn chûng fu̍k-fa̍t lé; liá chhiu-he ngài só-chhòn ke fuk-yîm.
[9] Ngài yîn-vi liá fuk-yîm su thung-khú, sṳm-chṳ pûn-ngìn chhiong siù-fam án-ngiòng thak-tén; chúng-he, Song-ti ke fa m̀-voi pûn-ngìn thak-tén.
[10] Só-yî, ngài vi Song-ti só kién-sién ke chṳ́-mìn ngiûn-su liá yit-chhiet, hó pûn kì-têu ya voi tet-tó tui Kî-tuk Yâ-sû lòi ke chṳ́n-kiu lâu yún-yén ke yùng-yeu.
[11] Hâ-poi liá-chham fa he chṳ̂n-sṳ̍t khó-sin ke: Ngài-têu na thùng kì khiung-ha sí, chhiu voi thùng kì khiung-ha sâng.
[12] Ngài-têu na-he ngiûn-nai to-tái, chhiu voi thùng kì khiung-ha chóng-khièn. Ngài-têu na-he m̀ ngin kì, kì ya voi m̀ ngin ngài-têu.
[13] Ngài-têu na-he mò sin-yung, kì hàn-he chṳ̂n-sṳ̍t khó-sin, yîn-vi kì m̀-voi vì-poi chhṳ-kâ.
[14] Ngì oi thì-siáng thai-kâ, chhai Song-ti mien-chhièn ngiàm-ngiàm kín-kie kì-têu: M̀-hó khang sṳ-ngién; liá he mò li-yit ke sṳ, chṳ́ voi phai-fai thâng-tó ke ngìn.
[15] Oi chhin-li̍t chhai Song-ti mien-chhièn cho yit-ke khâm-tet kháu-ngiam, m̀-voi kien-seu ke kûng-ngìn, chṳn-khok kóng-kié Song-ti ke chṳ̂n-tho.
[16] Oi sám-khôi mò-kîn-mò-kí ke khûng-thàm, yîn-vi liá-lui ke thàm-lun voi hoi ngìn lì-khôi Song-ti;
[17] kì-têu só-kóng ke he chhiong thu̍k-chhông, kín chhe kín thai-ta̍p. Liá-têu ngìn tông-chûng, yû Hí-mí-nâi lâu Fî-lî-thù;
[18] kì-têu lì-khôi chṳ̂n-lî, chú-chông fu̍k-fa̍t ke sṳ yí-kîn ko-thet lé, hoi phe̍t-ngìn sin-sîm yèu-thung.
[19] Chúng-he, Song-ti só-li̍p kiên-ku ke kîn-kî he m̀-voi yèu-thung ke; chhai liá thi-kî táng-kô khat-tén: “Chú ngin-sṳt su̍k Kì ke ngìn”, yu khat-tén: “Fàm chhṳ-ngin su̍k Chú ke, yit-thin oi hi-chhie̍t sià-ok.”
[20] Mî-yit-ke thai kâ-thìn lûng-chúng yû chhin-tô hi-mén, m̀ tân-chhiang yû kîm-hi ngiùn-hi, ya yû su-é ke, fì-è ke; yû-têu he vi-tó kui-chhung ke yung-thù, yû-têu he vi-tó pî-chhien ke yung-thù.
[21] Ngìn na chhṳ-kiet, thot-lì yit-chhiet pî-chhien ke sṳ, chhiu voi cho kui-chhung ke hi-mén, sàng-cho sṳn-kiet, pûn Chú só yung, lòi hàng kok-chúng ke san-sṳ.
[22] Ngì m̀-hó chhiong heu-sâng-ngìn án-ngiòng phìn chhìn-yu̍k hàng-sṳ; oi thùng ke-têu sîm sùn-kiet, khiù Chú pông-chhu ke ngìn siông-khiung chûi-khiù chṳn-ngi, sin-sîm, oi-sîm, pin fò-phìn.
[23] Oi hi-chhie̍t ke-têu ngong-ngong vù-tî ke phien-lun; ngì tî, liá-chúng phien-lun sòng-sòng voi ngiâ-hí yên-kâ.
[24] Chú ke phu̍k-ngìn cho-m̀-tet yên-kâ; kì yin-kôi fò-fò hi-hi lòi tui-thai chung-ngìn, ngin-chṳ̂n kau-thô ngìn, chhùn-sîm ngiûn-nai,
[25] yung vûn-yù khien-va fán-tui ke ngìn. Fe̍t-chá Song-ti voi pûn kì-têu fí-kói ke kî-fi, pûn kì-têu ngin-sṳt chṳ̂n-lî.
[26] Án-ngiòng, sûi-yèn Mô-kúi chiông kì-têu chok-hi, khiòng-pet kì-têu sun-fu̍k, kì-têu ya khó-nèn voi siáng ko-lòi, tui kì ke lò-mióng tî-poi chéu-chhut-lòi.