[1] Ana manguddoo waldaya biraa, haa gahu gara giiftii filatamtee fi joollee isii, warraan dhugaa dhaan jaaladhu; anuma qofaas odoo hin tahin, warri dhugaa beekan hundinuu isin jaalatu.
[2] Dhugaan tuniis nu keeysa jiraatti, bara baraafiis nu wajjiini taati.
[3] Ni'imaan, araarrinii fi nagayni niis Rabbi Abbaa biraa, Yesuus Kiristoos Ilma Abbaa biraa hiis dhugaa fi jaalalaan nuu wajjiin haa tahan.
[4] Joollee tee keeysaa hangi tokko, akkuma nuti Abbaa biraa ajajamnetti dhugaa duukaa bu'anii arkamuu isaanii dhagayuun tiyya, hedduu dha na gammachiifte.
[5] Yaa giiftii too! Ani amma ajaja haaraya siif katabuuf odoo hin tahin, isuma jalqaba dur fudhanne saniin katabuu kiyya. Eegaa, wanniniin ani jechuu barbaaduus, hundi keenyaa huu wal haa jaalannuu dha.
[6] Jaalalti niis tana, nuti akka Rabbi nu ajajetti jiraachuu jechuu dha; ajajni niis kanuma jalqaba duraa dhageeysan san tahee, akkasumatti hundi keeysanuu jaalala keeysa jiraadhaa.
[7] Warri nama dogongorsiisan, Yesuus Kiristoos jasadaan dhufuu isaa kanneen fudhatanii hin beeysifne, hedduun gara biyya addunyaa tana irratti bahanii ti jiru; namni akkanatti nama dogongorsiisu kun, kan Kiristoosiin mormu.
[8] Wanni isin dalaydan hundinuu, isin duraa akka hin badneef, ammaas ujuraa teeysan guutumatti akka arkattan tahuuf, if eeggadhaa!
[9] Namni hundee amantii barsiisa Kiristoos qabatee hin sabanne, kan waan biratti dabruuf foolatu, inni nama Rabbi irraa fuula deebifate; namtichi hundee barsiisa amantii keeysatti sabatu, inni nama Rabbi Abbaa fi Ilmaas qabu.
[10] Eegaa, namni barsiisa hundee amantii kana hin fudhanne, isin barsiisuuf yoo dhufe ammoo, manuma keeysanuu isa ol hin seensisinaa, nagaya illee hin gaafatinaa!
[11] Namni nama akkasii kana nagaya gaafatu, hojii hamtuu isaa irraa hi hirmaata.
[12] Waaniin isiniif katabu illee silaa hedduun qabaan ture, ammoo waraqaa irratti qalamaan isiniif katabuu hin barbaanne. Akkanaa mannaa, gammachuun tiyya guutuu akka anaaf taatuuf, anummaan dhufee fuulleetti isin wajjiin haasawuu dhaan abdadha.
[13] Joolleen waldaya obboleeytii tee filatamtuu dhaa tiis nagaya siif dhaamu.