[1] «Ne ta baaraden ye nin ye, ne bɛ ne hakiri to min na; ne ta mɔgɔ ɲanawolomanin lo, min ko ka di ne ye haali. Ne bɛna ne nin lajigi a kan, janko a ye can sira yira siyaw ra.
[2] A tɛna kule ci, walama k’a kan kɔrɔta; mɔgɔ tɛna a pɛrɛnkan mɛn siradaw ra.
[3] A tɛna hali bin karinin tɔ karikari, a tɛna hali fitina fagatɔ tɔ dufa; a bɛna can sira le yira mɔgɔw ra ni kankelentigiya ye.
[4] A baraka tɛna dɛsɛ, a fari tɛna faga, fɔ a ye na can sigi dugukolo kan, fɔ kɔgɔji kɔfɛmɔgɔw bɛɛ ye o jigi la a ta sariya kan.»
[5] Ala, Matigi Ala, min ka sankolo dan, k’a bonya, ka dugukolo yɛrɛgɛ fan bɛɛ, ani fɛn o fɛn bɛ falen a kan, ka nɛnɛkiri don dunuɲamɔgɔw ra, ka nin don dunuɲa yaalabagaw ra, ale Matigi Ala ko:
[6] «Ne Matigi Ala, ne le ka ele wele terenninya kama; ne bɛna i boro mina, ne bɛna i tanga, ka i lasigi, ka i kɛ ne ni mɔgɔw ta jɛnɲɔgɔnya donbaga ye, ka i kɛ siyaw ta yeelen ye,
[7] janko ka fiyentɔw ɲa yɛlɛ, ka kasodenw labɔ kaso ra, ka dibiramɔgɔw labɔ o ta dibi ra.
[8] «Ne le ye Matigi Ala ye, o le ye ne tɔgɔ ye; ne ta bonya kɔni, ne tɛna o di danfɛn wɛrɛ ma, walama tandori min ka kan ni ne ye, ka o di batofɛn yiriramanw ma.
[9] Ko minw tun kɔnna ka fɔ, a flɛ, olugu kɛra; sisan ne bɛna kokura le fɔ, nka sani a ye damina, ne bɛ aw lasɔmi.»
[10] Aw ye dɔnkirikura la ka Matigi Ala tando; aw y’a tando ka se fɔ dunuɲa danw na, aw minw bɛ tagamaw kɛ jirakurunw kɔnɔ, kɔgɔji kan, ani aw danfɛnw minw bɛ kɔgɔji ra, ani aw kɔgɔji kɔfɛmɔgɔw!
[11] Kongokolon n’a duguw ye o kan kɔrɔta, ani Kedari ta dugumisɛnw! Sela kuruyɔrɔ mɔgɔw ye ɲagari ka dɔnkiri la; o ye to kuruw san fɛ ka ɲagari fɔ ka pɛrɛn!
[12] Mɔgɔw ye bonya la Matigi Ala kan, kɔgɔji kɔfɛmɔgɔw ye a tando.
[13] Matigi Ala bɛ bɔ i ko cɛfari, a bɛ fariya i ko kɛrɛkɛcɛ; a bɛ pɛrɛn, ka kulekanba ci, ka se sɔrɔ a juguw kan.
[14] «Ne kumabari tun tora ka mɛɛn; ne tun jera, ne tun ka ne yɛrɛ mina. Nka sisan ne bɛna kule i ko muso jigibagatɔ min bɛ firinfirin, fɔ k’a nɛnɛkiri fereke.
[15] Ne bɛna kuruw ni kongoriw halaki, ka a binw ni a yiriw bɛɛ jaja; ne bɛna baw kɛ yɔrɔjalanw ye, ka jiyɔrɔw ja.
[16] Ne bɛna fiyentɔw bla o ye tagama sira dɔ kan, o ma sira min lɔn; o ma sira min lɔn cɔ, ne bɛna o bla o le kan. Ne bɛna dibi yɛlɛma k’a kɛ yeelen ye o ɲa fɛ, ka sira cɛjuguw kɛ sira dakaɲaninw ye. Ne bɛna nin kow le kɛ; ne tɛna a to kɛbari ye.
[17] «Minw bɛ o jigi la jo yiriramanw kan, olugu bɛna sekɔ ni o kɔ ye, ka maroya kosɛbɛ; minw b’a fɔ jo nɛgɛramanw ma ko: ‹Aw le ye an ta alaw ye!› »
[18] Ala ko: «Aw torogberenw, aw ye mɛnni kɛ! Fiyentɔw, aw ye flɛri kɛ, ka yeri kɛ!
[19] Jɔntigiw le ye fiyentɔw ye ni ne yɛrɛ ta baaradenw tɛ? Jɔntigiw le ye torogberenw ye i ko ne yɛrɛ ta ciradenw, ne ka minw ci? Jɔntigiw le ye fiyentɔw ye i ko Ala ta ciradenw? Jɔntigiw le ye fiyentɔw ye i ko Matigi Ala ta baaradenw?
[20] Aw ka fɛn caman ye, nka aw ma o jate; aw torow dayɛlɛra, nka aw ma foyi mɛn.»
[21] Matigi Ala ta terenninya kosɔn, a tun b’a fɛ k’a ta sariya bonya, ka nɔɔrɔ la a kan;
[22] nka siya tɔw benna a ta mɔgɔw le kan, ka o borofɛnw bɛɛ cɛ. O benna dingaba kɔnɔ, ka mina jan na, siya tɔw ka a ta mɔgɔw mina ka o dogo kasobonw kɔnɔ; o benna o kan, mɔgɔ si ma sɔrɔ ka o bɔsi, o ka o borofɛnw cɛ, mɔgɔ si ma sɔrɔ k’a fɔ ko: «Aw y’a lasekɔ!»
[23] Nka jɔntigi le bɛna a toro malɔ nin kow ra, walama k’a janto o ra siɲaga wɛrɛ k’a lamɛn?
[24] Jɔn le ka Yakuba ta mɔgɔw don o borofɛnw cɛbagaw boro, ka Izirayɛli don benkannikɛbagaw boro? An ka Matigi Ala min hakɛ ta, yala ale tɛ wa? An ma sɔn ka a ta sira tagama, an ma sɔn k’a ta sariyaw lamɛn.
[25] O kosɔn a k’a ta dimi tasuma bɔn Izirayɛli kan, ka kɛrɛ juguw lawuri o kama. A ta dimi tasuma manana ka o lamini, nka o ma hakiri sɔrɔ; o tasuma ka o jɛni, nka o ma o jate.