[1] Aw ye o jusu saaro, aw ye ne ta mɔgɔw jusu saaro! Aw ta Ala ko ten.
[2] Aw ye kuma Zeruzalɛmu fɛ k’a jusu saaro; aw ye aw kan kɔrɔta k’a fɔ a ye ko a ta jagboyabaaraw banna, ko a ta terenbariyaw juru sarara, ko Matigi Ala k’a ta jurumunw bɛɛ hakɛ bɔ a ra ka ban fɔ siɲaga fla.
[3] Pɛrɛnkan dɔ bɛ bɔra ko: «Aw ye sira labɛn Matigi Ala ye kongokolon kɔnɔ; aw ye siraba dakaɲa nin yɔrɔjalanw na an ta Ala ye.
[4] Dingakɔnɔyɔrɔw bɛɛ ye lafa, aw ye kuruw, ani kongoriw bɛɛ cici ka o yɛrɛgɛ, ka tintinw bɛɛ dakaɲa, yɔrɔ kɔrɔtaninw ye kɛ kɛnɛgbɛw ye.
[5] Ni o kɛra, Matigi Ala ta nɔɔrɔ bɛna yira, adamadenw bɛɛ lajɛnnin bɛna a ye; sabu Matigi Ala yɛrɛ le kumana.»
[6] Kumakan dɔ ko: «Pɛrɛn!» Ne ko: «Ne ye pɛrɛn ka mun fɔ?» A ko: «Adamadenw bɛɛ bɛ i ko bin, o dawula bɛɛ bɛ i ko kongobinw ta fiyerenw.
[7] Ni Matigi Ala ta fɔɲɔ ka fiyɛ a kan, a bɛ ja, a fiyerenw fana bɛ fagafaga. Can lo, adamadenw bɛ i ko bin;
[8] bin bɛ ja, a fiyeren fana bɛ fagafaga; nka an ta Ala ta kuma kɔni bɛ to a nɔ ra tuma bɛɛ ani wagati bɛɛ.»
[9] Ele ye yɛlɛn kuru jamijan kan, ele Siyɔn dugu, dugu kibarodimanfɔbaga; ele ye i kan kɔrɔta ni baraka ye, ele Zeruzalɛmu, dugu kibarodimanfɔbaga. Ele ye i kan kɔrɔta, aw kana siran; ele y’a fɔ Zuda mara ta duguw ye ko o ta Ala ye nin ye!
[10] A flɛ, Dunuɲatigi Ala bɛ nana ni barakaba ye, a boro baraka le bɛ se di a ma. A bɛ nana ni a ta sara ye a boro; a bɛ nana ni a ta baara tɔnɔ ye a ɲa fɛ.
[11] A bɛna a janto a ta sagakuru ra i ko sagagbɛnbaga; a bɛna sagadenw lajɛn ni a boro ye, ka o la a disi kan. A bɛna sagamuso dentigiw dɛmɛdɛmɛ.
[12] Jɔn le ka kɔgɔji suma ni a borotɛgɛ ye, ka sankolo bonya suma ni a boro ye? Jɔn le ka dugukolo buguri bɛɛ suma sumanikɛminan kɔnɔ, ka kuruw suma ka o gbiriya hakɛya lɔn, ka kongoriw suma ni sumanikɛnan ye?
[13] Jɔn le bɛ se ka Matigi Ala ta hakiri bonya sɛgɛsɛgɛ? Jɔn le kɛra a ladibaga ye, k’a karan?
[14] A ka hakiri ɲini jɔntigi le fɛ, ka faamuri sɔrɔ? Jɔn le k’a karan can sira ra? Jɔn le k’a karan lɔnniya ra, ka faamuri sira yira a ra?
[15] A flɛ, siyaw bɛ i ko jiden kelen tɔninin minan kɔnɔ, o bɛ i ko kɛnkɛnden kelen, sumanikɛminan kɔnɔ; Matigi Ala bɛ kɔgɔji kɔfɛjamanaw lawuri i ko buguri.
[16] Liban jamana yiriw bɛɛ lajɛnnin tɛ se k’a ta sarakajɛnifɛn tasuma labɔ, a bɛganw bɛɛ lajɛnnin tɛ a ta saraka jɛnita bɔ.
[17] Siyaw bɛɛ lajɛnnin tɛ foyi ye a ɲa kɔrɔ; a bɛ o bɛɛ jate i ko fɛn ɲacintanw, i ko fɛngbansanw.
[18] Aw bɛ se ka Ala suma ni mun le ye? Aw bɛ se ka fɛn juman le kɛ a bɔɲɔgɔnko ye?
[19] Jow kɔni, nɛgɛyeelebaga dɔ le bɛ nɛgɛ yeele ka o lalaga; saninfagabaga dɔ bɛ sani nɔrɔ a kan, ka warigbɛ jɔrɔkɔnin dɔw kɛ k’a ɲɛgɛn.
[20] Ni se tɛ mɔgɔ min ye ka o fɛnw sɔrɔ, ale bɛ yiri dɔ ɲini min tɛ tori joona, ka yirilalagabaga hakiriman dɔ ɲini, ka o yiri lɛsɛ k’a kɛ jo dɔ ye, a bɛ se ka min lɔ ka teren.
[21] Aw m’a lɔn wa? Aw m’a mɛn ka ye wa? O ko ma fɔ aw ye kabini fɔlɔfɔlɔ wa? Aw ma dunuɲa ju sigicogo ko faamu wa?
[22] Matigi Ala le siginin bɛ dugukolo sanfɛyɔrɔ koorinin kunna; dunuɲamɔgɔw bɛ a ɲa kɔrɔ i ko tɔnmisɛnw. A bɛ sankolo yɛrɛgɛ i ko fanimugu, a b’a foni i ko fanibon, ka sigi a kɔnɔ.
[23] Ale le bɛ fagamaw kɛ i n’a fɔ o tɛ foyi ye, ka dugukolo kititigɛbagaw kɛ mɔgɔ gbansanw ye.
[24] O turutɔ ye nin ye sisan, o dantɔ ye nin ye sisan, hali o lilinw ma donyɔrɔ sɔrɔ dugukolo ra fɔlɔ, a b’a dafɔɲɔ kɛ ka o fiyɛ, ka o jaja; sanfɔɲɔ bɛ o ta ka taga ni o ye i ko binjalan.
[25] «Aw b’a fɛ ka ne suma ni jɔntigi le ye? Ne ni jɔntigi le ka kan?» Ala Saninman ko ten.
[26] Aw ye aw ɲa kɔrɔta san fɛ ka flɛri kɛ! Jɔntigi le ka nin fɛnw dan? Ale le bɛ o bɛɛ labɔ ka o bɛɛ bla o ta sira kan; a bɛ o bɛɛ wele o tɔgɔ ra, a ta sebagayaba ni a ta barakaba sababu ra. O ra, hali kelen tɛ fɔn.
[27] Yakuba ta mɔgɔw, mun na aw bɛ nin kuma fɔ? Izirayɛlimɔgɔw, mun na aw b’a fɔ ko: «Anw ta kunkow dogonin lo Matigi Ala ma, anw ta Ala tɛ anw ta jo jatera?»
[28] Aw m’a lɔn wa? Aw m’a mɛn ka ye wa, ko Matigi Ala le ye Ala banbari ye? Ale le ka dunuɲa dan ka se fɔ a danw na. A tɛ sɛgɛ, a baraka tɛ dɛsɛ, a ta hakiri dan tɛ se ka lɔn.
[29] A bɛ fanga don mɔgɔ sɛgɛninw na, ka baraka don barakantanw na.
[30] Kanbelendenw bɛ sɛgɛ, o baraka bɛ dɛsɛ; hali kanbelenkɔrɔw fana bɛ ben.
[31] Nka minw bɛ Matigi Ala makɔnɔ, olugu bɛ to ka barakakura le sɔrɔ; o bɛ pan ka taga san fɛ i ko bɔn, o bɛ bori, o tɛ sɛgɛ, o bɛ tagama, o baraka tɛ dɛsɛ.