[1] O waati la, Ɔrɔmu masacɛ Ogusiti tun b'a fɛ k'a ka mɔgɔw daa lɔn. O la, a ye cii bila ko a ka jamana mɔgɔw bɛɛ tɔgɔ ka sɛbɛn.
[2] O tɔgɔsɛbɛn fɔlɔ kɛra ka Kiriniyusi sɔrɔ Siri mara kun na.
[3] Mɔgɔw bɛɛ tagara u ka dugu la waasa u tɔgɔ ka sɛbɛn yen.
[4] Yusufu fana bɔra Nazarɛti, Galile mara la, ka taga Zude mara dugu dɔ la min tɔgɔ ko Bɛtilehɛmu, o ye masacɛ Dawuda ka dugu ye, bari a buruju tun bɔra Dawuda la.
[5] A tagara yen n'a maminɛmuso Mariyamu ye, waasa u tɔgɔ ka sɛbɛn yen. Mariyamu kɔnɔman tun lo.
[6] K'u to Bɛtilehɛmu, Mariyamu jigilon nana se.
[7] A jigira dencɛ la, o tun y'a deen fɔlɔ ye. A ye fani meleke a la k'a la kolokolo kɔnɔ, bari u tun ma yɔrɔ sɔrɔ lonanjigisow kɔnɔ.
[8] Sagadɛndɛbaga dɔw tun be o mara la, u tun be si ɲana kongo kɔnɔ k'u ka sagaw kɔlɔsi.
[9] Matigi ka mɛlɛkɛ dɔ y'a yɛrɛ yira u la. O yɔrɔnin bɛɛ, Matigi ka nɔɔrɔ manamanana k'u lamini. U siranna kosɔbɛ.
[10] Nga mɛlɛkɛ y'a fɔ u ye ko: «Aw kana siran, bari ne nana kibaru diman dɔ fɔ aw ye min bena aw ka jamana mɔgɔw bɛɛ nisɔn diya.
[11] A filɛ, bii suu nin na, Kisibaga wolola aw ye Dawuda ka dugu la, ale lo ye Ala ka Mɔgɔ wolomanin nin ye, an Matigi lo.
[12] Aw ben'a lɔn taamasiɲɛ min fɛ, o filɛ: Aw bena denɲɛnin dɔ lanin ye kolokolo dɔ kɔnɔ, fani melekenin b'a la.»
[13] O yɔrɔnin bɛɛ, mɛlɛkɛ caaman bɔra sankolo la ka na fara mɛlɛkɛ dɔ nin kan. U tun be Ala tanu ko:
[14] «Ala ka tanu sanfɛ yɔrɔjan na, hɛrɛ ka kɛ dugukolo kan a diyanamɔgɔw ye.»
[15] Mɛlɛkɛw segira ka taga sankolo la tuma min na, sagadɛndɛbagaw y'a fɔ ɲɔgɔn ye ko: «An ka taga Bɛtilehɛmu, mɛlɛkɛ ye koo min kibaru fɔ an ye ka bɔ Matigi fɛ, an ka taga o filɛ.»
[16] U teliyara ka taga. U tagara Mariyamu ni Yusufu ani denɲɛnin sɔrɔ yen. Denɲɛnin lanin tun be kolokolo dɔ kɔnɔ.
[17] Denɲɛnin yenin kɔ, kuma min tun fɔra u ye deen nin ka koo la, u y'o lakali.
[18] Minw bɛɛ ye sagadɛndɛbagaw ka kuma mɛn, u bɛɛ kabakoyara.
[19] Nga Mariyamu tun b'o koow bɛɛ mara a hakili la ka miiri u la.
[20] O kɔ, sagadɛndɛbagaw kɔsegitɔ u ka yɔrɔ la, u tun ye koo minw bɛɛ mɛn ka koo minw bɛɛ ye, u tun be Ala boɲa k'a tanu o bɛɛ kosɔn, bari a bɛɛ kɛra i ko a tun fɔra u ye cogo min na.
[21] Deen wolola, a tile seeginan, a kɛnɛkɛnɛlon sera minkɛ, a tɔgɔ lara ko Yezu i ko mɛlɛkɛ tun y'a fɔ cogo min na sanni a baa k'a kɔnɔ ta.
[22] Saniyali min ka kan ka kɛ ka kɛɲɛ ni Musa ka sariya ye, o loon dafara minkɛ, Yusufu ni Mariyamu tagara ni Yezu ye Zeruzalɛmu k'a kalifa Matigi ma,
[23] bari a fɔra Matigi ka sariya la ko ni deen fɔlɔ min kɛra cɛɛ ye, k'o ka kan k'a di Matigi ma,
[24] ani ka tuganin fila, walima jɛnɛtuba fila bɔ saraka ye i n'a fɔ Matigi y'a ɲini cogo min na.
[25] O y'a sɔrɔ cɛɛ dɔ tun be Zeruzalɛmu min tɔgɔ ko Simeyɔn. O cɛɛ nin tun ye mɔgɔɲuman ye, a tun be Ala ka sariyaw bɛɛ bato. A tun be Isirayɛli ka kunmabɔbaga nali kɔnɔna. Nii Senuman tun b'a fɛ.
[26] Nii Senuman tun y'a yira a la ko a tena sa n'a ɲaa ma la Matigi ka Mɔgɔ wolomanin kan.
[27] Nii Senuman ka sebagaya y'a to Simeyɔn tagara Alabatosoba kɔnɔ. Yezu wolobagaw tagara n'a ye o yɔrɔ la waasa k'a kalifa Ala ma, ani k'o sarakaw bɔ ka kɛɲɛ ni sariya ye.
[28] Simeyɔn y'a ta a bolo la ka Ala tanu k'a fɔ ko:
[29] «Matigi, i ye min fɔ, o kɛra. I be se k'i ka kalifa minɛ ne la sisan, ne ka taga hɛrɛ la,
[30] bari i ye kisili sababu min ci, ne ɲaa lara o kan,
[31] i ye min labɛn mɔgɔw bɛɛ ye.
[32] A bena yeelen bɔ diɲɛ mɔgɔw bɛɛ ye k'i yira u la. A bena boɲa la an Isirayɛlidenw kan, an minw ye i ka mɔgɔw ye.»
[33] Simeyɔn ye kuma minw fɔ Yezu koo la, deen facɛ n'a bamuso kabakoyara olu la.
[34] Simeyɔn ye duba kɛ u ye. O kɔ, a y'a fɔ a bamuso Mariyamu ye ko: «A filɛ, deen nin bena kɛ sababu ye Ala bena Isirayɛliden caaman jalaki, ka sɔn caaman fana na. A bena kɛ taamasiɲɛ ye, mɔgɔw bena ɲɔgɔn sɔsɔ min koo la.
[35] O cogo la, mɔgɔ caaman kɔnɔnako bena bɔ kɛnɛ kan. E kɔni, i nii bena tɔɔrɔ i n'a fɔ u y'i sɔgɔ ni muru ye.»
[36] Muso dɔ fana tun be Zeruzalɛmu, a tɔgɔ ko Anɛ, kira tun lo. A facɛ Fanuwɛli buruju bɔra Azɛri la. Anɛ tun kɔrɔla kosɔbɛ. A sunguruman furunin kɔ, saan wolonwula, a cɛɛ sara.
[37] A tora firiya la fɔɔ a sii nana se saan bi seegi ni naani ma. Tuma o tuma a tun be to ka taga Alabatosoba kɔnɔ. A tun be suun don ka Ala daali tuma bɛɛ. O cogo la, a tun be Ala bato suu ni tile.
[38] Yezu kalifatuma Ala ma, o waati yɛrɛ la Anɛ fana donna Alabatosoba kɔnɔ. A y'a daminɛ ka barika la Ala ye. Mɔgɔ minw tun be Zeruzalɛmu kunmabɔbaga nali kɔnɔna, a ye Yezu koo fɔ olu bɛɛ ye.
[39] Yezu wolobagaw ye Matigi ka sariya bato ka ban tuma min na, u segira n'a ye Nazarɛti, Galile mara la, bari u siginin tun be yen.
[40] Dɔ tora ka fara deen kundama n'a barika kan ka taga. Hakilitigi tun lo, a koo tun ka di Ala ye.
[41] Yezu wolobagaw tun be to ka taga Hɔrɔnya ɲanagwɛ la Zeruzalɛmu saan o saan.
[42] Yezu ye saan tan ni fila sɔrɔ tuma min na, u bɛɛ tagara ɲɔgɔn fɛ Zeruzalɛmu ka kɛɲɛ ni ɲanagwɛ landa ye.
[43] Ɲanagwɛ banna loon min na, mɔgɔw ye soo siraw ta. Nga Yezu tora Zeruzalɛmu, a wolobagaw ma bɔ a kala ma.
[44] U tun y'a miiri ko a be u taamaɲɔgɔnw fɛ sira kan. U ye tile kelen taama kɛ, ka sɔrɔ k'a daminɛ k'a yaala u balimaw ni u lɔnbagaw cɛma.
[45] U ma Yezu ye yɔrɔ si fɔɔ u segira ka ta'a yaala Zeruzalɛmu.
[46] Tile saba, ɲanagwɛ bannin kɔ, u tagar'a sɔrɔ Alabatosoba kɔnɔ. A siginin tun be sariya karamɔgɔw cɛma k'u lamɛn ani k'u ɲininga koo dɔw la.
[47] A lamɛnbagaw bɛɛ kabakoyara a ka hakilitigiya n'a ka jaabili cogo la.
[48] A wolobagaw y'a ye tuma min na, u kabakoyara. A bamuso y'a ɲininga ko: «N deen, mun y'a to i ye nin kɛ an na ten? A filɛ, ne n'i facɛ hakili ɲagaminin tun b'i yɔrɔ ɲinina.»
[49] A y'u jaabi ko: «Mun na aw tun be ne yɔrɔ ɲini? Aw tun m'a lɔn ko ne ka kan ka sɔrɔ n Faa ka soo kɔnɔ wa?»
[50] Nga a ye kuma min fɔ u ye, u m'o faamu.
[51] O kɔ, u segira ka taga ɲɔgɔn fɛ Nazarɛti. A tun b'u boɲa kosɔbɛ. A bamuso tun b'o koow bɛɛ mara a hakili la.
[52] Dɔ tora ka fara Yezu kundama n'a hakili kan. A koo diyara Ala ni mɔgɔw ye.