[1] Lafiɲɛlon dɔ la, Yezu tagara Fariziɲɛw ka kuntigi dɔ ka soo ka dumuni kɛ. Mɔgɔ minw tun be yen, olu tun b'a kɔlɔsira.
[2] Cɛɛ dɔ tun be Yezu ɲafɛ, funubana tun b'a la.
[3] Yezu ye kuma ta ka sariya karamɔgɔw ni Fariziɲɛw ɲininga ko: «A daganin bɛ ka banabagatɔ kɛnɛya lafiɲɛlon na wa, walima a daganin tɛ?»
[4] Nga u m'a jaabi. O tuma na, Yezu magara banabagatɔ nin na k'a kɛnɛya. O kɔ, a y'a fɔ a ye ko a be se ka taga.
[5] A sɔrɔla k'a fɔ u ye ko: «Jɔn le be yan aw cɛma n'a dencɛ, walima a ka misi benna kɔlɔn kɔnɔ lafiɲɛlon na, n'a tena o bɔ joona?»
[6] U ma se ka o ɲiningali jaabi.
[7] Ka Yezu to o dumunikɛyɔrɔ nin na, mɔgɔ minw tun welela yen fana, a ye ladili di olu ma, bari a tun y'a kɔlɔsi k'a ye ko mɔgɔ nunu be sigiyɔrɔɲuman le ɲinina. O la, a y'a fɔ u ye ko:
[8] «Ni mɔgɔ dɔ y'i wele kɔɲɔdumuni na, kana taga sigi sigiyɔrɔɲuman na. E b'a sɔrɔ tuma dɔ ko mɔgɔ wɛrɛ welela min ka fisa i ye.
[9] Mɔgɔ min y'aw fila bɛɛ wele, ni ale nana k'a fɔ i ye ko i ka wili ka sigiyɔrɔ nin d'a ma, o tuma na, i bena wili ni maloya ye, ka taga sigi mɔgɔ bɛɛ kɔfɛ.
[10] Nga n'i welela o ɲɔgɔn na, taga sigi kɔfɛ waasa n'i welebaga nana tuma min na, a k'a fɔ i ye ko: ‹N teri, na sigi ɲafɛ.› O cogo la, i bena kunkɔrɔta sɔrɔ i dumunikɛɲɔgɔnw ɲana.
[11] Mɔgɔ o mɔgɔ b'a yɛrɛ boɲa, o tigi bena majigi. Mɔgɔ o mɔgɔ b'a yɛrɛ majigi, o tigi bena boɲa sɔrɔ.»
[12] Min tun ye Yezu wele dumuni na, a y'a fɔ o fana ye ko: «N'i ye dumuniba labɛn mɔgɔw ye, kana i teriw wele, walima i badenw, n'i balimaw, an'i sigiɲɔgɔn nafolotigiw. Bari u fana be se k'i wele dumuni na k'i ka juru sara.
[13] Nga, n'i bena dumuniba di mɔgɔw ma, i ka fantanw ni senkelenninw ni namaraw ani fiɲɛntɔw wele.
[14] N'i y'o kɛ, i bena duba sɔrɔ, bari olu te se k'i ka juru sara, nga Ala bena i sara sini.»
[15] Dumunikɛlaw kelen ye kuma nin mɛn minkɛ, a y'a fɔ Yezu ye ko: «Mɔgɔ minw bena dumuni kɛ Ala ka masaya la, olu nisɔn bena diya dɛ!»
[16] Yezu y'a jaabi ko: «Cɛɛ dɔ tun ye dumuniba labɛn ka mɔgɔ caaman wele.
[17] Dumunikɛwaati sera tuma min na, a y'a ka baaraden ci ka taga fɔ mɔgɔweleninw ye ko: ‹Aw ka na bari dumuni bɛɛ labɛnna ka ban.›
[18] Nga u bɛɛ ye yafa daali a fɛ kelen kelen. U fɔlɔ y'a fɔ baaraden ye ko: ‹Ne ye foro dɔ san, ne ka kan ka taga o filɛ. Ne b'i daali, taga fɔ a ye ko a ka yafa ne ma.›
[19] Mɔgɔ wɛrɛ y'a fɔ a ye ko: ‹Ne ye sɛnɛkɛmisi tan san, ne be tagara baara kɛ n'u ye k'a filɛ. Ne b'i daali, taga fɔ a ye ko a ka yafa ne ma.›
[20] Dɔ wɛrɛ fana y'a fɔ a ye ko: ‹Ne ye muso furu sisan sisan, o le y'a to ne te se ka taga.›
[21] «Baaraden kɔsegira ka taga o bɛɛ ɲafɔ a kuntigi ye. A kuntigi dimina k'a fɔ a ye ko: ‹Teliya ka taga dugu forobayɔrɔw la, ani siradaw la, ka fantanw ni namaraw ni fiɲɛntɔw ani senkelenninw wele ka na n'u ye yan.›
[22] Baaraden nin y'o kɛ ka ban tuma min na, a tagar'a fɔ a kuntigi ye ko: ‹I ye min fɔ, ne y'o kɛ, nga soo ma fa halibi.›
[23] O la, a kuntigi y'a fɔ a ye ko: ‹Bɔ ka taga dugu dafɛ nankɔw la, i mana mɔgɔ minw sɔrɔ yen, i ka koo bɛɛ kɛ u ka na, waasa ne ka soo ka fa.
[24] Ne b'a fɔ aw ye ko mɔgɔ minw tun welela, olu si tena ne ka dumuni nin nɛnɛ tugu.›»
[25] O kɔ, Yezu taatɔ dugu dɔ la, jamaba tun tugunin b'a kɔ. A lɔra k'a fɔ u ye ko:
[26] «Mɔgɔ o mɔgɔ be na ne fɛ, n'a ma ne fisaya n'a faa ye, n'a baa, n'a muso, n'a deenw, n'a balimacɛw, n'a balimamusow, n'a yɛrɛ fana ye, o tigi te se ka kɛ ne ka kalanden ye.
[27] Ni mɔgɔ min m'a ka gwengwenlɔgɔ ɲun ka tugu ne kɔ, o tigi te se ka kɛ ne ka kalanden ye.
[28] «Aw cɛma ni mɔgɔ dɔ b'a fɛ ka sangaso jamanjan lɔ, a te sigi fɔlɔ k'a lɔsɔngɔ jati k'a filɛ yala n'a ka wari bena se k'o baara laban wa?
[29] N'o tɛ, n'a y'o sangaso juu sigi, n'a ma se k'a laban, mɔgɔ minw bɛɛ bena o ye, u bena yɛlɛ a ma,
[30] k'a fɔ ko: ‹Cɛɛ nin ye soo lɔli daminɛ, nga a ma se k'a laban.›
[31] «Ni masacɛ dɔ b'a fɛ ka taga masacɛ dɔ wɛrɛ kɛlɛ, a be sigi fɔlɔ ka miiri k'a filɛ n'a be se ni mɔgɔ waa tan (10 000) ye k'a jugu mɔgɔ waa mugan (20 000) tigi kunbɛn.
[32] N'a te se, a be lasigidenw ci ka taga kɛlɛ bancogo ɲini a jugu nin fɛ k'a to yɔrɔjan.
[33] N'aw dɔ b'a fɛ ka kɛ ne ka kalanden ye fana, fɔɔ aw k'aw ka bololafɛn bɛɛ to yen.
[34] «Kɔgɔ ye fɛnɲuman ye, nga ni kɔgɔ ka timiya bɔra a la, mun bena se k'a timiya tugu?
[35] O tuma na, a te se ka kɛ nɔgɔ ye ka foyi ɲa dugukolo ye. A be fili le. Tulo be min fɛ ka mɛnni kɛ, o ka mɛnni kɛ.»