[1] A Yeezu na tɩ baarɩ a wulu a ŋa za a, ʋ yel ɩ a ʋ po-tuurbɛ: «Nyɩ bãwnɩ a na, ka nɩ bibie ayi ʋ na ɩ n a Zifʋ mɩnɛ Tɔlʋ cuw:
[2] bɛ na nyɔw nɩ a Nɩsaal Bie tɩr kɛ́ bɛ kpa ʋ da-gara zu.»
[3] Lɛ n'a a bawr-maal-nɩ-bɛrɛ, nɩ a Zifʋ nɩbɛ nɩ-kore, tɩ ɓã taa a Naaŋmɩn bawr-maal-kara ʋl na tɩ dɩ kɛ Kayifʋ a yir.
[4] Bɛ tɩ wõ n taa kɛ bɛ maalɩ yã nyɔw a Yeezu kʋ́.
[5] Ɛ cɛ bɛ tɩ yere na: «A ta ɩ a cuw daar ɛ, lɛ n'a a kʋ̃ ƴãw damnʋ a nɩbɛ pʋɔ ɩ.»
[6] A Yeezu tɩ be n Betani, Sɩmʋ̃ na ɩ kɔ̃w a yir.
[7] Ʋ na tɩ zɩ̃ dɩrɛ a, pɔw kãw tɩ tɛr ɩ tʋrali, a daarʋ na bɛ gbʋr a, paalɩ kʋsɛ-pla duwle; ʋ tɩ taw na pɩɛlɩ a Yeezu, ɛ cir a tʋrali a ŋa ƴãw a Yeezu zũú.
[8] A Yeezu po-tuurbɛ na tɩ nyɛ̃ a lɛ a, a tɩ ɩ na mɛ̃ bɛ ɩ ŋmɩn a. Bɛ tɩ yere na: «Bʋ̃ʋ pãa so a tʋrali a ŋa sãw-bɛrʋ a?
[9] Bɛ nãá tʋ̃ɔ na kʋɔrɩ a tʋrali a ŋa, a daarʋ ɩ kpɛ̃ɛ yaga, bɛ kʋ̀ a libie nan dem.»
[10] A Yeezu na tɩ bãwnɩ a, ʋ yel bɛ na: «Bʋ̃ʋ n'ʋ so nyɩ sɔbr a pɔw ŋa niwn? Yel-vla n'ʋ ʋ maalɩ a ɩ̃ zie.
[11] Sɩza n'a, nan dem na be n a nyɩ zie kʋra lɛ, ɛ cɛ mãa kʋ̃ be a nyɩ zie kʋra lɛ ɩ.
[12] A tʋrali a ŋa ʋ na cir ƴãw a ɩ̃ ƴãganɩ́ a, ʋ cɔbr ɩ mɛ̃ nɩ a ũufʋ ƴãw.
[13] Yel-mɩŋa sɩza, ɩ̃ yere na kʋ̀rɛ nyɩ: a tẽ-daa zu zie nɛ za bɛ nãà wa hiere a Yel-nʋ̃ɔ̀ ŋa a, bɛ mɩ̀ na mɩ́ man nɩ a ʋlɩ bom nɛ a pɔw ŋa na ɩ a, tɛr ɩ a ʋ tɩɛrʋ.»
[14] Lɛ n'a a Pie-nɩ-ayi ƴẽn sob kãw bɛ na bʋɔlɛ kɛ Zuda Ɩsɩkarɩɔtɩ a, tɩ cen tɩ páw a bawr-maal-nɩ-bɛrɛ
[15] yel bɛ: «Mãa wa nyɔw a Yeezu kʋ̀ nyɩ a, bʋ̃ʋ n'ʋ nyɩ na kʋ̀ m?» Bɛ tɩ sɔr ɩ salmɛ̃ libie lɩzɛr ɩ pie kʋ̀ ʋ.
[16] Lɛ n'a ʋ tɩ tĩ bɔbr a vo-vla ʋ na na nyɔw a Yeezu kʋ̀ bɛ a.
[17] A dipɛ̃ na bɛ ƴãw dãbɩl a cuw bibi-dãw-niwn sob, a Yeezu po-tuurbɛ tɩ wa na wa sowr ʋ: «Nyɩnɛ n'a fʋ bɔbr kɛ tɩ cɔbrɩ a Tɔlʋ cuw dɩb?»
[18] A Yeezu tɩ yel a: «Nyɩ cen a tẽw pʋɔ, bon zie, tɩ yel ʋ: ‹A Wul-wul-kara yel a: a ɩ̃ daar pɩɛl a, a fʋ yir a mãa nɩ a ɩ̃ po-tuurbɛ maalɛ a Tɔlʋ cuw.› »
[19] A po-tuurbɛ tɩ tu n a lɛ a Yeezu na yel a, ɛ cɔbrɩ a Tɔlʋ cuw.
[20] A zaanʋɔra na wa ta a, a Yeezu tɩ lãw nɩ nɩ a Pie-nɩ-ayi dɩrɛ.
[21] Bɛ na tɩ dɩrɛ a, ʋ tɩ yel a: «Yel-mɩŋa sɩza, ɩ̃ yere na kʋ̀rɛ nyɩ, a nyɩ kãw na mɩl mɛ̃ na nyɔw tɩr.»
[22] Pʋ-sãwna tɩ nyɔw bɛ nɩ yaga, ɛ ŋa za mɩ́ tɩ sowre ʋ: «Sore e, mãa ya n'ʋ bɩɩ?»
[23] A Yeezu tɩ sɔw na: «Sob ŋa nɩ mãa na lãw tõ a nũu a laa pʋɔ a, ʋlɛ n'ʋ na mɩl mɛ̃ nyɔw tɩr.
[24] A Nɩsaal Bie kule na mɛ̃ a lɛ bɛ na sɛb yel a ʋ ƴãw a, ɛ cɛ baw-bio sob ɩ a sob nɛ na mɩl a Nɩsaal bie nyɔw tɩr a, a nɩr ŋa bɛ tɩ dɔw a, alɛ sa.»
[25] A Zuda na tɩ mɩlɛ ʋ a, tɩ de nɩ a ƴɛrʋ sowr ʋ: «Mãa ya n'ʋ bɩɩ, Wul-wul-kara a?» Ʋ tɩ sɔw ʋ na: «Fʋ̃ʋ n'ʋ yel.»
[26] Bɛ na tɩ dɩrɛ a, a Yeezu tɩ de nɩ dipɛ̃, maalɩ, ɛ ŋma põ kʋ̀ a ʋ po-tuurbɛ ɛ yel: «Nyɩ de 'wɔb, a ŋa ɩ n a ɩ̃ ƴãgan.»
[27] Al pùorí, ʋ tɩ de nɩ koli-nyuura na ƴãw divɛ̃ a, ɛ ʋ na wa pùori a Naaŋmɩn yaanɩ baar a, ʋ de na kʋ̀ a ʋ po-tuurbɛ ɛ yel: «Nyɩ de a nyũ tɔ taa,
[28] a a ŋa ɩ n a ɩ̃ zɩ̃ɩ, a Wõ-taa zɩ̃ɩ, na cir yaarɩ a nɩ-yaga ƴãw a yel-bebe suur pawfʋ ƴãw a.
[29] Ɩ̃ yere na kʋ̀rɛ nyɩ, dɩ̃a na ta a, ɩ̃ kʋ̃ lɛ nyũ a divɛ̃ a ŋa ɩ, ɛ gùre a ʋlɩ bibir nɛ ɩ̃ nãá lɛb wa lãw nɩ nyɩ nyũ divɛ̃ paala a ɩ̃ Sãà naalʋ pʋɔ a.»
[30] Bɛ na wa yieli a Sɛb-sõw yielu baar a, bɛ yi na cere a Olivʋ-tɩɩr tãw zu.
[31] Lɛ n'a a Yeezu tɩ yel a ʋ po-tuurbɛ: «A tɩ̃ɩsɔw ŋa tɔr za, nyɩ za na zɔ na ɛ bɛr mɛ̃. Bɛ sɛb a: ‹Ɩ̃ na ŋmɛ n a pi-cɩ̃ɩnɛ kʋ́ ɛ a píir zɔ yaarɩ.›
[32] Ɛ cɛ mãa wa lɛb yi a kũu pʋɔ a, ɩ̃ na de nyɩ nɩ niwn a Galile tẽw.»
[33] Pɩɛr tɩ de nɩ a ƴɛrʋ yel ʋ: «Bɛ za saa na zɔ kɛ bɛr fʋ a, mãa bɛ be za na zɔ kɛ bɛr fʋ ɛ.»
[34] A Yeezu tɩ yel ʋ na: «Yel-mɩŋa sɩza, ɩ̃ yere na kʋ̀rɛ fʋ, a dɩ̃a tɩ̃ɩsɔw tɔr za, nʋra kʋ̃ kõ sɛr ɛ, ɛ fʋ ciiri gb'a ata kɛ fʋ bɛ bãw mɛ̃ ɩ.»
[35] A Pɩɛr tɩ yel ʋ na: «Ɩ̃ bɛ be za na ciiri k'ɩ̃ɩ bɛ bãw fʋ ɛ, alɛ saa na fɛr kɛ mãa nɩ fʋ̃ʋ za lãw kpi a.» A po-tuurbɛ za mɩ̀ tɩ yere nɩ a lɛn tɔr za.
[36] Lɛ n'a a Yeezu nɩ a ʋ po-tuurbɛ tɩ ta zie kãw bɛ na bʋɔlɛ Zesemani a, ʋ yel bɛ: «Nyɩ zɩ̃ a ka, ɛ ɩ̃ cen ka tɩ pùori.»
[37] Ʋ tɩ tɛr ɩ Pɩɛr nɩ Zebede bi-dɛbr bɛ za ayi cen nɩ. Pʋ-sãwna nɩ pʋl-vʋ̃ɔ tɩ tĩ na nyɔw ʋ.
[38] Lɛ n'a ʋ tɩ yel bɛ: «Pʋ-sãwna faar a na kʋ́ m, nyɩ be a ka, ɛ lãw nɩ mɛ̃ puore ɛ bɛr gʋ̃ɔ.»
[39] Ʋ tɩ taw na tɔl blã ɛ lo vɔblɩ muru ɛ puore yere nɩ: «Ɩ̃ Sãà a, alɛ na na tʋ̃ɔ a, fʋ̃ʋ ɩ a tuo koli-nyuura ŋa zãá nɩ mɛ̃! Ɛ cɛ a ta ɩ a lɛ mãa na bɔbr a ɩ, a ɩ a lɛ fʋ̃ʋ na bɔbr a.»
[40] Ʋ tɩ ìr a wa a ʋ po-tuurbɛ ata bɛl zie wa nyɛ̃ bɛ gùre. Ʋ tɩ yel ɩ a Pɩɛr: «A ɩ lɛ nyɩ bɛ tʋ̃ɔ bɛr gʋ̃ɔ ɛ lãw nɩ mɛ̃ tɛm been yõ ƴãw ʋ?
[41] Nyɩ bɛr gʋ̃ɔ ɛ puore taa wa lore a bɛlʋ pʋɔ ɩ. A nɩsaal mɩ́ bɔbr ɩ sɩza, ɛ bɛ tɛr fãw ɛ.»
[42] Ʋ tɩ lɛb a cen a gb'a ayi sob ƴãw tɩ puore yere nɩ: «Ɩ̃ Sãà a, alɛ wa ɩ fɛrʋ k'ɩ̃ɩ nyũ a tuo koli-nyuura ŋa a, a fʋ pʋ-tɩɛrʋ ʋ maalɩ.»
[43] Ʋ tɩ lɛb a wa wa nyɛ̃ bɛ gùre, a gʋ̃ɔ na faa tɩ paalɩ a bɛ mimie a ƴãw.
[44] Ʋ tɩ bɛr bɛ na ɛ lɛb cen tɩ pùori a gb'a ata sob nɩ a alɩ ƴɛr-bi-been nɛ.
[45] Al pùorí, ʋ tɩ lɛb a wa a ʋ po-tuurbɛ zie wa yel bɛ: «Nyɩ cãa na gùre, ɛ ɓãa ƴãw pɩɛnɛ ɛ? A tɛm ʋl bɛ na na nyɔw a Nɩsaal Bie ƴãw a yel-bebe dem nuru pʋɔ a ta na.
[46] Nyɩ ìr! Nyɩ ɩ tɩ cen! A ɩ̃ mɩlɛ n'ɩ ŋan ta.»
[47] A Yeezu tɩ cãa na ƴɛrɛ, ɛ a Zuda na ɩ a Pie-nɩ-ayi ƴẽn sob a, wa ta ʋlɛ nɩ nɩ-yaga yaga na tɛr sɔ-bɛrɛ nɩ dabɔlɛ a. A bawr-maal-nɩ-bɛrɛ nɩ a Zifʋ nɩbɛ nɩ-kore nɛ bɛ tɩ tõ bɛ.
[48] A ʋ mɩlɛ Zuda tɩ kʋ̀ bɛ nɩ bãwfʋ ŋa: «A sob nɛ ɩ̃ na na nyɔw weri a, ʋlɛ n'ʋ, nyɩ nyɔw ʋ.»
[49] Daadaa lɛ, ʋ tɩ taw na ta a Yeezu zie yel ʋ: «Wul-wul-kara a, fʋ yaanɩ!» Ɛ nyɔw ʋ weri.
[50] A Yeezu tɩ yel ʋ na: «Ɩ̃ bá a, a ʋlɩ bom nɛ ƴãw fʋ na wa a, ɩ ʋ fɔ̃w.» Lɛ n'a a nɩbɛ tɩ taw ta nyɔw a Yeezu.
[51] A nɩbɛ bɛl na tɩ be a Yeezu zie a, a bɛ kãw tɩ nyɔw nɩ a ʋ sɔ-kpɛ̃ɛ vʋ̃ɔ cɛ n a bawr-maal-kara tõ-tõ-bie kãw, cɛ a tobr ɓɛl.
[52] A lɛ n'a a Yeezu tɩ yel ʋ: «Lɛb su a fʋ sɔ-kpɛ̃ɛ a ʋ kpar pʋɔ, bɛlɩ dem za na dier a sɔ-kpɛ̃ɛ a bɛ taabɛ ƴãw a, a sɔ-kpɛ̃ɛ kũu n'a bɛ mɩ̀ na kpi.
[53] Fʋ tɩɛr k'ɩ̃ɩ kʋ̃ʋ tʋ̃ɔ zɛlɩ a ɩ̃ Sãà ʋ kʋ̀ m malkɩ yaga yaga daadaa lɛ bɩɩ?
[54] Ɛ cɛ ŋmɩŋmɩn n'a a Sɛb-sõw ƴɛr-bie nãá tɩ tu? A yel a k'aa ŋa n'a a fɛr k'aa yele tu.»
[55] A ʋlɩ tɛm nɛ pʋɔ, a Yeezu tɩ yel ɩ a nɩbɛ: «Nyɩ wa n nɩ sɔ-bɛrɛ nɩ dabɔlɛ kɛ nyɩ wa nyɔw nɩ mɛ̃, mɛ̃ nyãnyu-nɩ-kʋ́rɛ a, ɛ bibir za ɩ̃ mɩ́ tɩ be a Ŋmɩn-yi-kpɛ̃ɛ pʋɔ zɩ̃ kanɛ nɩ a nɩbɛ ɛ nyɩ bɛ nyɔw mɛ̃ ɩ.
[56] Ɛ cɛ a a ŋa za ɩ na, k'aa Naaŋmɩn-ƴɛr-manbɛ ƴɛr-bie na be a Sɛb-sõw pʋɔ a, tʋ̃ɔ tu.» Lɛ n'a a ʋ po-tuurbɛ za tɩ zawr ʋ bɛr ɛ zɔ.
[57] A bɛl na tɩ nyɔw a Yeezu a, tɩ tɛr ʋ na cen nɩ a bawr-maal-kara Kayifʋ yir; be n'a a Naaŋmɩn-Wulu-sɛ-sɛbrbɛ nɩ a Zifʋ nɩbɛ nɩ-kore tɩ ɓã taa.
[58] A Pɩɛr ʋl tɩ zãá na ɛ tuur a Yeezu, tɩ kpɛ a bawr-maal-kara yir; ʋ tɩ lãw nɩ nɩ a tõ-tõ-biir zɩ̃ jɩrɛ a lɛ a yele na na baar a.
[59] Zɩ̃ kɛ a bawr-maal-nɩ-bɛrɛ nɩ a Zifʋ mɩnɛ ƴɛrʋ-dɩb-lãw nɩbɛ za tɩ bɔbr ɩ dãsɩɛ-ziri a Yeezu ƴãw, na na ɩ bɛ ƴãw ʋ kũu dɔwrʋ a.
[60] Bɛ bɛ tɩ nyɛ̃ ʋ ɛ, dãsɩɛ-ziri dem yaga na saa tɩ ìr ƴɛr a. Nɩbɛ ayi kãw wa bɩɛr a ìr
[61] yel: «A nɩr ŋa tɩ yel a: ‹Ɩ̃ na tʋ̃ɔ na ŋmɛr a Ŋmɩn-yi-kpɛ̃ɛ bɛr ɛ lɛb mɛ ʋ bibie ata.› »
[62] A bawr-maal-kara tɩ ìr a ar ɛ sowri a Yeezu: «Fʋ bɛ tɛr sɔwfʋ za a yele a ŋa bɛ na manɛ dɔwlɛ a fʋ zu a ƴãw bɩɩ?»
[63] Ɛ cɛ a Yeezu tɩ ɩ n gbili. A bawr-maal-kara tɩ yel ʋ na: «Ɩ̃ zɛlɛ fʋ na, a Naaŋmɩn na vʋʋrɛ a yúor ƴãw, kɛ fʋ pɔ yel kʋ̀ tɩ: fʋ̃ʋ n'ɩ a Naaŋmɩn Nɩ-kabra a, a Naaŋmɩn Bie e?»
[64] A Yeezu tɩ sɔw na yel ʋ: «Fʋ̃ʋ n'ʋ yel a lɛ. Ɛ cɛ ɩ̃ yere na kʋ̀rɛ nyɩ, dɩ̃a na ta a, nyɩ na nyɛ̃ nɩ a Nɩsaal Bie ʋ zɩ̃ a Kpɛnʋ-za-sob dʋrʋ lowr, ɛ be a zũzuge zu waar.»
[65] Lɛ n'a a bawr-maal-kara tɩ taw a ʋ bʋ̃-suuri cɩɛrɩ, ɛ yel: «Ʋ tʋ n Naaŋmɩn! Bʋnʋ ƴãw n'a tɩ cãa bɔbr dãsɩɛ dem? Nyɩ za nyɩ wõ n a zʋ́m ʋ na tʋ a Naaŋmɩn a ƴɛrɛ ŋa a.
[66] Nyɩ tɩɛr ɩ ŋmɩn?» Bɛ sɔw: «Ʋ sɛwnɩ nɩ kũu.»
[67] Lɛ n'a bɛ tɩ pʋʋrɩ mʋtaar waar ʋ a niwn ɛ pɔb pɔb ʋ; bɛ mɩnɛ mɩ́ tɩ ɓa ʋ na
[68] ɛ yel: «Bãw Naaŋmɩn-ƴɛr-manɛ bãwfʋ kʋ̀ tɩ, Naaŋmɩn Nɩ-kabra a, ãa n'ʋ ŋmɛ b?»
[69] A Pɩɛr tɩ zɩ̃ n a yẽw a davʋra pʋɔ. Tõ-tõ-bi-pɔw kãw tɩ taw na pɩɛl ʋ yel ʋ: «A fʋ̃ʋ mɩ̀, fʋ mɩ̀ tɩ tuur ɩ a Galile tẽw Yeezu.»
[70] Ɛ cɛ a Pɩɛr tɩ ciir ɩ a nɩbɛ za niŋé, ɛ yel: «Ɩ̃ bɛ bãw ʋlɩ bom nɛ fʋ na bɔbr kɛ fʋ yel a ɩ.»
[71] Ʋ na tɩ cere a davʋra dɩ̃dɔr nʋɔr a, tõ-tõ-bi-pɔw ƴẽn sob tɩ nyɛ̃ ʋ na, ɛ yel kʋ̀ a bɛlɩ dem na tɩ be a be a: «A sob ŋa tɩ tuur ɩ a Nazarɛtɩ tẽw Yeezu.»
[72] A Pɩɛr tɩ lɛb maal ciiri, ɛ pɔ yel: «Ɩ̃ bɛ bãw a nɩr ŋa ɩ!»
[73] Blã na wa pʋɔ a, a bɛlɩ dem na tɩ be a be a, tɩ taw na ta a Pɩɛr zie yel ʋ: «Bʋnʋ bɛ ka be ɩ, fʋ mɩ̀ ɩ n a bɛ ƴẽn sob, a sãá nɩ a fʋ ƴɛrʋ pʋɔ.»
[74] Lɛ n'a a Pɩɛr tɩ tĩ ŋmɩɛr ƴãwn ʋ tʋɔra, pɔrɛ nɩ Naaŋmɩn yere nɩ: «Ɩ̃ bɛ bãw a nɩr ŋa ɩ!» Daadaa lɛ nʋra tɩ kõ na.
[75] A Pɩɛr tɩ lɛb a tɩɛrɩ bãwnɩ a ƴɛrʋ ŋa a Yeezu na tɩ ƴɛr kʋ̀ ʋ a: «Nʋra kʋ̃ kõ sɛr ɛ, ɛ fʋ ciiri gb'a ata kɛ fʋ bɛ bãw mɛ̃ ɩ.» Ʋ tɩ yi na tɩ kõ cir mʋ̃tã-zɩ̃ɩ.