[1] A Yeezu Kɩrɩta, a Daviir bi-dɛb, a Abraham bi-dɛb sãakʋ̃-kore yée sɛbɛ n'ɩ a ŋa.
[2] A Abraham tɩ dɔw nɩ Ɩzaakɩ, Ɩzaakɩ dɔw Zakɔb, Zakɔb dɔw Zuda nɩ a ʋ yɛbr;
[3] Zuda tɩ páw nɩ Tamaar dɔw Farɛsɩ nɩ Zaara, Farɛsɩ dɔw Ɛsɩrɔm, Ɛsɩrɔm dɔw Aram;
[4] Aram dɔw Amɩnadab, Amɩnadab dɔw Naasɔ̃, Naasɔ̃ dɔw Salmɔ̃;
[5] Salmɔ̃ tɩ páw nɩ Arahab dɔw Boozɩ, Boozɩ páw Urutɩ dɔw Obɛdɩ, Obɛdɩ dɔw Zese;
[6] Zese dɔw a nãà Daviir. A nãà Daviir tɩ páw nɩ a Uuri pɔw dɔw Salomɔ̃;
[7] Salomɔ̃ dɔw Oroboam, Oroboam dɔw Abɩa, Abɩa dɔw Azafɩ;
[8] Azafɩ dɔw Zuzɛfaar, Zuzɛfaar dɔw Zoram, Zoram dɔw Ozɩasɩ;
[9] Ozɩasɩ dɔw Zoatam, Zoatam dɔw Akaazɩ, Akaazɩ dɔw Ezekɩasɩ;
[10] Ezekɩasɩ dɔw Manase, Manase dɔw Amɔ̃, Amɔ̃ dɔw Zozɩasɩ;
[11] Zozɩasɩ dɔw Zekonɩasɩ nɩ a ʋ yɛbr, a lɛn daar bɛ na tɩ diw a Ɩsɩrayɛl nɩbɛ cen nɩ a Babɩlɔn tẽw a.
[12] A Babɩlɔn tẽw diw-cenu pùorí, Zekonɩasɩ tɩ dɔw nɩ Salatɩɛl, Salatɩɛl dɔw Zorobabɛl,
[13] Zorobabɛl dɔw Abiyudɩ, Abiyudɩ dɔw Elɩakɩm, Elɩakɩm dɔw Azɔɔr,
[14] Azɔɔr dɔw Sadɔkɩ, Sadɔkɩ dɔw Akɩm, Akɩm dɔw Eliyudɩ;
[15] Eliyudɩ dɔw Eleazaar, Eleazaar dɔw Matan, Matan dɔw Zakɔb;
[16] Zakɔb dɔw a Marya sɩr Zuzɛb, a Marya na dɔw a Yeezu bɛ na bʋɔlɛ a Kɩrɩta a.
[17] A na ɩ a ŋa a, a sãakʋ̃-kore dɔw-tu-taa ɩ n pie nɩ anaar, a Abraham tɩ tɔ n a Daviir, pie nɩ anaar a Daviir tɩ tɔ n a Babɩlɔn tẽw diw-cenu, pie nɩ anaar a Babɩlɔn tẽw diw-cenu tɩ tɔ n a Kɩrɩta dɔwfʋ.
[18] A ŋa n'a a Yeezu Kɩrɩta dɔwfʋ tɩ tu. A ʋ mã Marya tɩ ɩ n Zuzɛb ƴãwnɩ-yúor, ɛ cɛ bɛ bɛ tɩ lãw kpɛ sɛr ɛ, ɛ a Vʋʋrʋ Sõw ɩ a Marya tɛr pʋɔ.
[19] A ʋ sɩr Zuzɛb na tɩ ɩ nɩ-mɩŋa a, ɛ́ bɛ tɩ bɔbr k'ʋʋ wo ʋ a, tɩ yel a k'ʋʋ na sɔwl a zawr ʋ bɛr.
[20] A ŋa n'a ʋ tɩ tɩɛrɛ, ɛ wa gã zànɩ nyɛ̃ Sore malkɩ ʋ yel ʋ: «Daviir bi-dɛb Zuzɛb ɩ, ta zɔrɛ dɛ̃bɩ̃ɛ a fʋ pɔw Marya tɛrʋ ƴãw ɛ, a pʋɔ ŋa ʋ na tɛr a yi n Vʋʋrʋ Sõw zie.
[21] Ʋ na dɔw nɩ dɛble fʋ por a yúor kɛ Yeezu, ʋlɛ n'ʋ na faa a ʋ nɩ-bʋʋrɛ a bɛ yel-bebe pʋɔ.»
[22] A a ŋa za tɩ ɩ na, k'aa lɛ a Sore na tɩ dãw ƴãw a ʋ ƴɛr-manɛ yel a tu:
[23] «A pɔwsɩrale n'ɩ ŋan na tɛr pʋɔ dɔw dɛble bɛ por a yúor kɛ Ɩmanɩɛl, a pɛr lɛ kɛ: ‹Ŋmɩn-be-n-tɩ zie.› »
[24] A Zuzɛb na wa ìr a, ʋ tu n a lɛ a Sore malkɩ na tɩ yel kʋ̀ ʋ a, ʋ tɛr ɩ a ʋ pɔw Marya wa n a ʋ yir.
[25] Ɛ cɛ ʋ bɛ tɩ bãw ʋ ɛ, ɛ gu ʋ tɩ dɔw a dɛble ʋ por a yúor kɛ Yeezu.