[1] ᒉᒥᐢ ᐅᐟ ᐊᑐᐢᑫᔮᑲᓇ ᑭᓭᒪᓂᑐ ᒥᓇ ᑳ ᑎᐯᔨᐦᒋᑫᐟ ᒋᓴᐢ ᙭, ᐊᓂᑭ ᒥᑖᑕᐟ ᓂᓱᓵᑊ ᑳ ᐃᑕᑐᐢᑳᓀᓯᒋᐠ ᐸᐹᒥ ᑳ ᐊᔮᒋᐠ, ᐁ ᐊᑕᒥᐢᑲᐊᐧᑭᐠ
[2] ᒪᒪᐦᑖᑯᓯᐃᐧᐣ ᐃᑕᑭᑕᒧᐠ ᓂᒋᐋᐧᒥᑎᐠ ᓇᓈᑐᕽ ᑯᑌᔨᒥᑯᐃᐧᓂᕽ ᐁᓯ ᐸᐦᑭᓯᓂᔦᑯ;
[3] ᐁ ᑭᐢᑫᔨᑕᒣᐠ ᐅᒪ ᐁ ᑯᑌᔨᑖᑲᐧᕽ ᑭ ᑖᐯᐧᔦᔨᑕᒧᐃᐧᓂᐋᐧᐤ ᐊᑐᐢᑳᑕᒧᒪᑲᐣ ᓯᐯᔨᑕᒧᐃᐧᐣ.
[4] ᑭᔮᑦ ᒫᑲ ᓯᐯᔨᑕᒧᐃᐧᐣ ᒥᑐᓂ ᑭᑕ ᐊᑐᐢᑫᒪᑲᐣ ᑭᑕ ᒪᒥᑐᓂ ᐊᔮᔦᐠ ᒥᓇ ᑭᑕ ᑲᑭᓯᔦᐠ ᐁᑳ ᑫᑲᐧᐩ ᐁ ᑭᐧᑕᒫᔦᐠ.
[5] ᒫᑲ ᑭᐢᐱᐣ ᐊᐃᐧᔭᐠ ᑭᔭᐋᐧᐤ ᑭᐧᑕᒫᒋ ᐃᔨᓂᓯᐃᐧᐣ ᑭᔮᑦ ᑭᑕ ᓇᑐᑕᒪᐁᐧᐤ ᑭᓭᒪᓂᑐᐊᐧ, ᐊᓇ ᑳ ᐁᐧᔪᒋ ᒥᔮᐟ ᑲᐦᑭᔭᐤ ᐊᐃᐧᔭ ᐁᑳ ᒫᑲ ᐁ ᐋᒋᐢᑕᐁᐧᔨᑕᕽ; ᐁᑯᓯ ᑭᑕ ᒥᔮᐤ.
[6] ᒫᑲ ᑭᔮᑦ ᑭᑕ ᓇᑐᑕᑦ ᑖᐯᐧᔦᔨᑕᒧᐃᐧᓂᕽ ᐁᑳ ᐁ ᐊᓯᐁᐧᔨᑕᕽ; ᒋᑫᒫ ᐊᓇ ᑳ ᐊᓯᐁᐧᔨᑕᕽ ᐃᑌᔨᑖᑯᓯᐤ ᑖᐱᐢᑯᐨ ᐁ ᒥᑯᐢᑳᑖᑲᒫᐢᑳᐠ ᑭᐦᒋᑲᒥ ᐁ ᒥᐢᑕᐦᐃ ᔪᑎᕽ ᐁᑯᓯ ᐁ ᒫᒪᑳᐊᕽ.
[7] ᒋᑫᒫ ᐁᑳᐃᐧᔭ ᐁᐊᐧᑯ ᐊᔨᓯᔨᓂᐤ ᑭᑕ ᐃᑌᔨᑕᑦ ᓈᐣᑕᐤ ᑫᑲᐧᐩ ᑭᑕ ᒥᔨᑯᐟ ᑳ ᑎᐯᔨᐦᒋᑫᔨᐟ;
[8] ᓂᓴᐧᔭᐠ ᑳ ᐃᑌᔨᑕᕽ ᐊᔨᓯᔨᓂᐤ ᓇᒪᐃᐧᔭ ᐋᔮᑌᔨᑖᑯᓯᐤ ᓈᐣᑕᐤ ᐅᐟ ᐃᓯᐦᒋᑫᐃᐧᓂᕽ.
[9] ᑭᔮᑦ ᒫᑲ ᐊᓇ ᐅᒋᐋᐧᒥᒫᐤ ᑳ ᑕᐸᑌᔨᑖᑯᓯᐟ ᑭᑕ ᒪᒪᐦᑖᑯᓯᐤ ᐁ ᑭᐢᑌᔨᑖᑯᓯᐟ;
[10] ᐁᑯᓯ ᐊᓇ ᑳ ᐁᐧᔪᑎᓯᐟ ᐊᓂᒪ ᐁ ᑕᐸᑌᔨᑖᑯᐦᐃᐦᐟ; ᒋᑫᒫ ᑖᐱᐢᑯᐨ ᐋᐧᐱᑲᐧᓂᔭ ᒪᐢᑯᓯᕽ ᐁᑯᓯ ᑫ ᐃᓯ ᐳᓂ ᐃᑖᐟ.
[11] ᒋᑫᒫ ᐱᓯᑦ ᐃᐢᐱᒥᕽ ᐁ ᐊᑎ ᐃᑖᐟ ᐊᓯᒋ ᐁ ᑭᓴᑖᒧᑌᐠ ᐁ ᔪᑎᕽ ᐊᑎ ᓂᐳᐃᐧ ᐊᔮᐤ ᒪᐢᑯᓯ; ᐁᑯᓯ ᐁ ᐋᐧᐱᑲᐧᓂᐊᐧᕽ ᐸᑭᐦᑎᐣ ᒥᓇ ᐁ ᐃᓯ ᑲᑕᐊᐧᓯᓯᐠ ᓂᓯᐊᐧᓈᑕᐣ; ᐁᑯᓯ ᐃᓯ ᒥᓇ ᑳ ᐁᐧᔪᑎᓯᐟ ᓈᐯᐤ ᑫ ᐃᓯ ᐊᑎ ᐳᓂ ᐃᑖᐟ ᐅᐟ ᐃᓯᐦᒋᑫᐃᐧᓂᕽ.
[12] ᓴᐁᐧᔨᑖᑯᓯᐤ ᐊᓇ ᐊᔨᓯᔨᓂᐤ ᑳ ᓯᐯᔨᑕᕽ ᑯᑌᔨᒥᑯᐃᐧᐣ; ᒋᑫᒫ ᐃᐢᐱ ᑭ ᑯᑌᔨᒥᐦᒋ ᑭᑕ ᒥᔮᐤ ᐱᒫᑎᓯᐃᐧᓂ ᑭᐦᒋ ᐅᑭᒫᐊᐧᐢᑐᑎᐣ, ᑳ ᑎᐯᔨᐦᒋᑫᐟ ᑳ ᑭ ᐊᓱᑕᒪᐋᐧᐟ ᐊᓂᐦᐃ ᑳ ᓴᑭᐦᐃᑯᐟ.
[13] ᐁᑳᐃᐧᔭ ᐊᐃᐧᔭ ᐊᔨᓯᔨᓂᐤ ᐃᐢᐱ ᐁ ᑯᑌᔨᒥᐦᐟ ᑭᑕ ᐃᑌᐧᐤ ᑭᓭᒪᓂᑐ ᓂ ᑯᑌᔨᒥᐠ; ᒋᑫᒫ ᓇᒪᐃᐧᔭ ᑭᓭᒪᓂᑐ ᑭᑕ ᑭ ᑯᑌᔨᒥᐁᐧᐟ ᒪᒋ ᑭᑲᐧᔭ ᐃᐧᔭ ᐅᐦᒋ, ᐁᑯᓯ ᐃᐧᔭ ᓇᒪᐃᐧᑳᐨ ᐊᐃᐧᔭ ᑯᑌᔨᒣᐤ;
[14] ᒫᑲ ᑲᐦᑭᔭᐤ ᐊᔨᓯᔨᓂᐤ ᑯᑌᔨᒥᑯᐃᐧᓯᐤ ᑭᐢᐱᐣ ᐃᐧᔭ ᐅ ᒪᒋ ᒧᐢᑕᐁᐧᔨᑕᒧᐃᐧᐣ ᐁ ᐁᐧᐱᐃᑯᐟ ᐁᑯᓯ ᐁ ᓯᐦᑭᐃᐧᔨᑯᐟ.
[15] ᐁᑲᐧ ᒫᑲ ᒪᒋ ᒧᐢᑕᐁᐧᔨᑕᒧᐃᐧᐣ ᑭᐢᐱᐣ ᐁ ᑭᑭᐢᑲᒧᒪᑲᕽ ᓂᐦᑖᐃᐧᑭᑖᒪᑲᐣ ᒪᒋᑎᐃᐧᐣ; ᐊᓂᒪ ᒫᑲ ᒪᒋᑎᐃᐧᐣ ᐁ ᑭᓯᓂᑖᐃᐧᑭᕽ ᓂᐦᑖᐃᐧᑭᑖᒪᑲᐣ ᓂᐳᐃᐧᐣ.
[16] ᐁᑳᐃᐧᔭ ᑭ ᑲ ᐃᐧ ᐊᐧᔦᓯᐃᑲᐃᐧᓈᐋᐧᐤ ᑳ ᓵᑭᐦᐃᑕᑯᐠ ᓂᒋᐋᐧᒥᑎᐠ.
[17] ᑲᐦᑭᔭᐤ ᒥᔪ ᒣᑭᐃᐧᐣ ᒥᓇ ᐁ ᒪᒥᑐᓂᒋᑳᑌᐠ ᒣᑭᐃᐧᐣ ᐃᐢᐱᒥᕽ ᐅᐦᒋᐸᔨᐤ ᐁ ᐯ ᔮᓯᑎᓴᐊᕽ ᐊᓇ ᑳ ᐅᑖᐃᐧᐢᑲᕽ ᐋᐧᐢᑌᐊᐧ, ᐊᓇ ᐁᑳ ᑳ ᑭᑭᐢᑳᑯᐟ ᐱᑐᐢ ᐃᓯ ᐊᔮᐃᐧᐣ ᐊᐦᐳ ᐁ ᒋᑳᐢᑌᑎᕽ ᑫᐧᐢᑭᐃᐧᐣ.
[18] ᐃᐧᔭ ᐅᐟ ᐃᑌᔨᑕᒧᐃᐧᐣ ᐅᐦᒋ ᑭ ᑭ ᓂᐦᑖᐃᐧᑭᐃᑯᓇᐤ ᑖᐯᐧᐃᐧᓂ ᐃᑌᐧᐃᐧᐣ ᐅᐦᒋ ᑭᔮᓇᐤ ᑭᑕ ᐃᓯ ᐊᔮᔭᕽ ᑖᐱᐢᑯᐨ ᓂᐢᑕᑦ ᐁ ᒥᓂᓯᐃᐧᔨᐟ ᐅᓯᐦᒋᑲᓇ.
[19] ᐅᒪ ᑭ ᑭᐢᑫᔨᑌᓈᐋᐧᐤ ᑳ ᓵᑭᐦᐃᑕᑯᐠ ᓂᒋᐋᐧᒥᑎᐠ. ᒫᑲ ᑭᔮᑦ ᑲᐦᑭᔭᐤ ᐊᔨᓯᔨᓂᐤ ᑭᑕ ᑭᓯᐢᑳᔦᔨᑕᑦ ᑭᑕ ᓇᑐᐦᑕᕽ, ᑭᑕ ᐯᑭᑳᑎᓯᐤ ᑭᑕ ᐱᑭᐢᑫᐧᐟ, ᑭᑕ ᐯᑭᑳᑎᓯᐤ ᑭᑕ ᑭᓯᐋᐧᓯᐟ;
[20] ᒋᑫᒫ ᐅ ᑭᓯᐋᐧᓯᐃᐧᐣ ᐊᔨᓯᔨᓂᐤ ᓇᒪᐃᐧᔭ ᐊᑐᐢᑳᑕᒧᒪᑲᓂᔨᐤ ᐅ ᑲᐧᔭᐢᑭᑖᑎᓯᐃᐧᐣ ᑭᓭᒪᓂᑐ.
[21] ᐁᑯᓯ ᒫᑲ ᐅᐱᒣ ᐁ ᐊᐢᑖᔦᐠ ᑲᐦᑭᔭᐤ ᑳ ᐃᐧᓀᔨᑖᑲᐧᕽ ᒥᓇ ᑳ ᐊᔨᐋᐧᑫᔨᑖᑲᐧᕽ ᒪᒋᑎᐃᐧᐣ, ᐅᑎᓇᒧᐠ ᔪᐢᑳᑎᓯᐃᐧᓂᕽ ᐊᓂᒪ ᑳ ᓂᐦᑖᐃᐧᑭᕽ ᐃᑌᐧᐃᐧᐣ ᐊᓂᒪ ᑫ ᑭ ᐱᒫᒋᐃᑯᔦᐠ ᑭᐟ ᐊᐦᒑᐦᑯᐋᐧᕽ.
[22] ᒫᑲ ᐃᑐᑕᒧᐠ ᐃᑌᐧᐃᐧᐣ ᐁᑳᐃᐧᔭ ᐱᑯ ᓇᑐᐦᑕᒧᐠ ᐁ ᐊᐧᔦᓯᐦᐃᓱᔦᐠ.
[23] ᒋᑫᒫ ᑭᐢᐱᐣ ᐊᐃᐧᔭᐠ ᓇᑐᐦᑕᐦᑭ ᐃᑌᐧᐃᐧᐣ ᐁᑳ ᒫᑲ ᐃᑐᑕᐦᑭ ᐃᓯᓈᑯᒋᑫᐤ ᑖᐱᐢᑯᐨ ᐊᔨᓯᔨᓂᐤ ᐁ ᑲᓇᐋᐧᐸᒥᓱᐟ ᐅᑳᐧᑲᓂᕽ ᐋᐧᐸᒧᓂᕽ;
[24] ᒋᑫᒫ ᑲᓄᐋᐧᐸᒥᓱ ᐁᑯᓯ ᓯᐯᐧᑌᐤ ᓭᒫᐠ ᐊᐧᓂᑭᐢᑭᓯᐤ ᑖᓂᓯ ᑳ ᐃᓯᓈᑯᓯᐟ.
[25] ᒫᑲ ᐊᓇ ᑳ ᑲᓇᐋᐧᐸᐦᑕᕽ ᑳ ᒪᒥᑐᓂᒪᑲᕽ ᐅᔭᓱᐁᐧᐃᐧᐣ, ᐊᓂᒪ ᑎᐯᔨᒥᓱᐃᐧ ᐅᔭᓱᐁᐧᐃᐧᐣ, ᐁᑯᓯ ᒫᑲ ᐃᓯ ᐱᒥᑎᓴᐦᐊᑭ ᐁᐊᐧᑯ ᑳ ᓇᑐᐦᑕᐦᑭ ᐁᑳ ᑳ ᐊᐧᓂᑭᐢᑭᓯᐟ ᒫᑲ ᐁ ᐃᑐᑕᕽ ᐊᑐᐢᑫᐃᐧᓂᕽ, ᐁᐊᐧᑯ ᐊᐊᐧ ᐊᔨᓯᔨᓂᐤ ᑭᑕ ᒥᔭᐧᑭᒫᐤ ᐅᐟ ᐃᑐᑕᒧᐃᐧᓂᕽ.
[26] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᓂᐟ ᐊᔭᒥᐦᐋᐋᐧᑎᓯᐣ ᐃᑌᔨᑕᑭ ᐁᑯᓯ ᐁᑳ ᐁ ᑭᑌᔨᑕᕽ ᐅᑌᔭᓂ ᒫᑲ ᐁ ᑲᔦᓯᑖᐟ ᐅᑌᐦ ᐊᐊᐧ ᐊᔨᓯᔨᓂᐤ ᐅᐟ ᐊᔭᒥᐦᐋᐃᐧᐣ ᐱᑯᓇᑕ ᐃᑌᔨᑖᑲᐧᓂᔨᐤ.
[27] ᐁ ᐯᑲᕽ ᐊᔭᒥᐦᐋᐃᐧᐣ ᒥᓇ ᐁᑳ ᐁ ᐃᐧᔨᐱᑖᕽ ᐁ ᐃᓯ ᑭᑖᐸᑕᕽ ᑭ ᑭᓭᒪᓂᑐᒥᓇᐤ ᒥᓇ ᑯᑖᐃᐧᓇᐤ ᐁᐊᐧᑯᒪ, ᑭᑕ ᑭᐅᑳᐦᒋᐠ ᑳ ᑭᐋᐧᑎᓯᒋᐠ ᒥᓇ ᓯᑳᐃᐧᐢᑫᐧᐊᐧᐠ ᐅᐟ ᐊᔨᒥᓯᐃᐧᓂᐋᐧᕽ ᒥᓇ ᑭᑕ ᑲᓇᐁᐧᔨᒥᓱᕽ ᐁᑳ ᑭᑕ ᐃᐧᔨᐱᐃᐁᐧᐠ ᐊᐢᑭ.