[1] ᐁᑲᐧ ᒥᑖᑕᐟ ᓀᐅᓵᑊ ᑕᐦᑐ ᐊᐢᑭ ᐃᔨᑯᕽ ᒥᓇ ᓂ ᑭ ᐃᑐᐦᑖᐣ ᒉᕒᐅᓴᓬᐊᒥᕽ ᐹᕒᓇᐸᐢ ᐊᓯᒋ, ᑖᐃᑕᐢ ᒥᓇ ᐁ ᐃᐧᒉᐊᐧᐠ.
[2] ᓂ ᑭ ᐃᑐᐦᑖᐣ ᒫᑲ ᐋᐧᐸᑎᔨᑯᐃᐧᓯᐃᐧᓂᕽ; ᐁᑯᓯ ᓂ ᑭ ᐋᒋᒧᐢᑕᐋᐧᐊᐧᐠ ᐊᓂᒪ ᒥᔮᐧᒋᒧᐃᐧᐣ ᑳ ᐊᐧᐃᐧᑕᒪᐊᐧᑭᐠ ᒉᐣᑕᐃᓬᐊᐠ, ᒫᑲ ᓂ ᑭ ᓂᓯᑫ ᐃᐧᐦᑕᒪᐋᐧᐊᐧᐠ ᐊᓂᑭ ᑳ ᑭᐢᑌᔨᑖᑯᓯᒋᐠ, ᑫᑲ ᓈᐣᑕᐤ ᐃᓯ ᐱᑯᓇᑕ ᑭᑕ ᐱᒥᐸᑖᔮᐣ, ᐊᐦᐳ ᓵᓴᐩ ᐱᑯᓇᑕ ᐁ ᑭ ᐱᒥᐸᑖᔮᐣ.
[3] ᒫᑲ ᓇᒪᐃᐧᔭ ᐊᐦᐳ ᑖᐃᑕᐢ ᑳ ᐃᐧᒉᐃᐧᐟ, ᐁ ᑲᕒᐃᑭᐃᐧᐟ, ᑭ ᐅᐦᒋ ᓯᑭᐢᑲᐋᐧᐤ ᑭᑕ ᓴᕒᑲᑦᓴᐃᓯᐃᐧᐟ:
[4] ᒋᑫᒫ ᐊᓂᑭ ᑳ ᑲᔦᓯᑖᒋᐠ ᐅᒋᐋᐧᒥᒫᐊᐧᐠ ᑭᒧᐨ ᑭ ᐱᑐᑲᐋᐊᐧᐠ ᐁ ᐯ ᐃᑐᐦᑌᒋᐠ ᑭᑕ ᑮᒫᐸᑕᑭᐠ ᓂ ᑎᐯᔨᒥᓱᐃᐧᓂᓈᐣ ᑳ ᐊᔮᔮᕽ ᙭ ᒋᓴᐢ ᐅᐦᒋ, ᑭᑕ ᐃᑐᑕᐃᑯᔮᐦᑭᐠ ᑎᐯᔨᒥᑯᐃᐧᓂᕽ:
[5] ᓇᒪᐃᐧᔭ ᒫᑲ ᐁᐊᐧᑯᓂᐠ ᓄᐦᒋ ᑕᐃᐧᐢᑕᐊᐧᓈᓇᐠ, ᓇᒪ, ᓇᒪᐋᐧᐨ ᐯᔭᐠ ᑎᐸᐃᑲᐣ ᐃᔨᑯᕽ; ᐁ ᐃᓯ ᑖᐯᐧᒪᑲᕽ ᒥᔮᐧᒋᒧᐃᐧᐣ ᐁᑳ ᑭᑕ ᓇᑲᑎᑯᔦᐠ.
[6] ᒫᑲ ᐃᐧᔭ ᐊᓂᑭ ᑳ ᑭᐦᒉᔨᑖᑯᓯᒋᐠ ᑳ ᐃᓯ ᐋᒋᒥᐦᒋᐠ (ᒫᑲ ᐁ ᐊᔨᑕᑭᒋᑳᓱᒋᐠ, ᓇᒪ ᓈᐣᑕᐤ ᓂᔭ ᐃᐧᔭ ᓂᐟ ᐃᑕᑭᑌᐣ: ᓇᒪᐃᐧᔭ ᐁ ᐃᑕᑭᒋᑳᓱᔨᐟ ᐃᐧᔭᐃᐧᔨᕽ ᐃᓯ ᐅᑎᓀᐤ ᐊᔨᓯᔨᓂᐊᐧ ᑭᓭᒪᓂᑐ); ᐁᐊᐧᑯᓂᐠ, ᓂᐟ ᐃᑖᐧᐣ, ᑳ ᑭᐢᑕᑭᒥᐦᒋᐠ ᓇᒪ ᑫᑲᐧᐩ ᓂᔭ ᓂ ᑭ ᐅᐦᒋᐢᑕᒫᑲᐧᐠ:
[7] ᒫᑲ ᑎᔭᑯᐨ, ᐃᐢᐱ ᐃᐧᔮᐸᐦᑕᑭᐠ ᐁ ᑭ ᐸᑭᑎᓇᒫᑲᐃᐧᐊᐧᐠ ᒥᔮᐧᒋᒧᐃᐧᐣ ᑭᑕ ᐃᐧᐦᑕᒪᐊᐧᑭᐠ ᐁᑳ ᑳ ᓴᕒᑲᑦᓴᐃᓯᐃᐧᒋᐠ, ᑖᐱᐢᑯᐨ ᐱᑕᕒ ᑳ ᑭ ᐸᑭᑎᓇᒫᐦᐟ ᑳ ᓴᕒᑲᑦᓴᐃᓯᐃᐧᔨᐟ ᐅᐦᒋ
[8] (ᒋᑫᒫ ᐊᓇ ᑳ ᑭ ᐊᑐᐢᑫᐢᑕᒪᐋᐧᐟ ᐱᑕᕒᐊ ᑭᑕ ᐊᐸᐢᑎᓬᐃᐃᐧᔨᐟ ᑭᑕ ᐃᐧᐦᑕᒪᐋᐧᐟ ᑳ ᓴᕒᑲᑦᓴᐃᓯᐃᐧᔨᐟ ᓂᔭ ᒥᓇ ᓂ ᑭ ᐊᑐᐢᑫᐢᑕᒫᐠ ᐁ ᐃᐧᐦᑕᒪᐊᐧᑭᐠ ᒉᐣᑕᐃᓬᐊᐠ);
[9] ᐃᐢᐱ ᒫᑲ ᐃᐧᔮᐸᐦᑕᑭᐠ ᓂᓱᑲᒫᑯᐃᐧᐣ ᑳ ᒥᔨᑲᐃᐧᔮᐣ, ᒉᒥᐢ ᒥᓇ ᓯᐹᐢ ᒥᓇ ᒑᐣ, ᐊᓂᑭ ᑳ ᐋᑐᑖᑯᓯᒋᐠ ᐁ ᓯᑐᐢᑲᒫᑫᒋᐠ ᓂ ᑭ ᒥᔨᑯᓈᓇᐠ ᓂᔭ ᒥᓇ ᐹᕒᓇᐸᐢ ᐅ ᑭᐦᒋᓂᐢᑭᐋᐧᐊᐧ ᐃᐧᒉᑐᐃᐧᓂᕽ, ᓂᔭᓈᐣ ᑭᑕ ᓈᑖᔮᑭᐠ ᒉᐣᑕᐃᓬᐊᐠ, ᐃᐧᔭᐋᐧᐤ ᒫᑲ ᐊᓂᐦᐃ ᑳ ᓴᕒᑲᑦᓴᐃᓯᐃᐧᔨᐟ;
[10] ᐱᑯ ᑭ ᓇᑕᐁᐧᔨᑕᒪᐧᐠ ᑭᑕ ᑭᐢᑭᓯᑐᑕᐋᐧᔮᐦᑭᐠ ᐅᑭᑎᒫᑭᓯᐊᐧᐠ; ᐁᐊᐧᑯ ᒫᑲ ᓂᐢᑕ ᓂ ᑭ ᐋᑲᒣᔨᒧᐣ ᑭᑕ ᐃᑐᑕᒫᐣ.
[11] ᒫᑲ ᐃᐢᐱ ᓯᐹᐢ ᑌᑯᓯᕽ ᐊᓂᑕ ᐋᐣᑎᔮᐠ, ᓂ ᑭ ᑭᑐᑖᐤ ᐅᑳᐧᑲᓂᕽ, ᒋᑫᒫ ᑭ ᐃᓯᐦᒋᑫᐤ ᑭᑕ ᑭ ᓈᐣᑕᐤ ᐃᑎᐦᐟ.
[12] ᐃᐧᔭ ᒪᐧᔦᐢ ᑕᑯᓯᓂᔨᐟ ᐋᑎᐦᐟ ᒉᒥᐢ ᑳ ᑭ ᐯ ᐃᓯᑎᓴᐊᐧᐟ, ᑭ ᐊᐧᐃᐧᒋᒥᒋᓱᒣᐤ ᒉᐣᑕᐃᓬᐊ: ᒫᑲ ᐃᐢᐱ ᐅᐦᐃ ᐁ ᑕᑯᓯᓂᔨᐟ, ᐁᑲᐧ ᐊᓭᐸᔨᐦᐅ ᒥᓇ ᓇᑲᑌᐤ, ᐁ ᑯᐢᑖᐟ ᐊᓂᐦᐃ ᑳ ᓴᕒᑲᑦᓴᐃᓯᐃᐧᔨᐟ.
[13] ᐁᑯᓯ ᑯᑕᑲ ᒍᐊᐧ ᑭ ᐃᐧᒉᐃᐧᐠ ᐅᒪ ᐁ ᐃᓯᐦᒋᑫᐟ; ᐸᕒᓇᐸᐢ ᐊᐦᐳ ᑭ ᐁᐧᐱᐃᐧᔭᐤ ᐅᒪ ᐁ ᑲᑲᔦᔨᓯᐃᐧ ᐃᓯᐦᒋᑫᒋᐠ.
[14] ᒫᑲ ᐃᐢᐱ ᐃᐧᔮᐸᐦᑕᒫᐣ ᐁᑳ ᑲᐧᔭᐢᐠ ᐁ ᐃᓯ ᐱᒧᐦᑌᒋᐠ ᐁ ᐃᑕᐢᑌᐠ ᐁ ᐃᓯ ᑖᐯᐧᐃᐧᓂᐊᐧᕽ ᒥᔮᐧᒋᒧᐃᐧᐣ, ᓂ ᑭ ᐃᑖᐤ ᓯᐹᐢ, ᑲᐦᑭᔭᐤ ᐁ ᐯᑕᐃᐧᒋᐠ, ᑭᐢᐱᐣ ᑭᔭ, ᐁ ᒍᐃᐧᔭᐣ, ᐁᓯ ᐱᒫᑎᓯᐊᐧᓀ ᑖᐱᐢᑯᐨ ᒉᐣᑕᐃᓬᐊᐠ, ᓇᒪᐃᐧᔭ ᒫᑲ ᑖᐱᐢᑯᐨ ᒍᐊᐧᐠ ᑳ ᐃᓯ ᐱᒫᑎᓯᒋᐠ, ᑖᓀᑭ ᑳ ᓇᑕᐁᐧᔨᒪᒋᐠ ᒉᐣᑕᐃᓬᐊᐠ ᑭᑕ ᐃᓯ ᐱᒫᑎᓯᒋᐠ ᑖᐱᐢᑯᐨ ᒍᐊᐧᐠ?
[15] ᑭᔮᓇᐤ ᒫᑲ ᑳ ᒍᐃᐧᔭᕽ ᑲᔭᑌ, ᓇᒪᐃᐧᔭ ᒫᑲ ᐅᒪᒑᑎᓯᐊᐧᐠ ᒉᐣᑕᐃᓬᐃᓈᕽ ᐅᐦᒋ,
[16] ᐁᔨᐁᐧᕽ ᒫᑲ ᐁ ᑭᐢᑫᔨᑕᒪᕽ ᐊᔨᓯᔨᓂᐤ ᐁᑳ ᐁ ᑲᐧᔭᐢᑳᐧᑎᓯᐊᐧᑭᒥᐦᐟ ᐃᓯᐦᒋᑫᐃᐧᓇ ᐅᔭᓱᐁᐧᐃᐧᓂᕽ ᐅᐦᒋ: ᒋᑫᒫ ᐃᓯᐦᒋᑫᐃᐧᓇ ᐅᔭᓱᐁᐧᐃᐧᓂᕽ ᓇᒪᐃᐧᔭ ᐊᐃᐧᔭᐠ ᑳ ᐅ ᐃᐧᔮᓯᐟ ᑭᑕ ᑭ ᐅᐦᒋ ᑲᐧᔭᐢᑳᐧᑎᓯᐊᐧᑭᒫᐤ.
[17] ᒫᑲ ᑭᐢᐱᐣ, ᐁ ᒣᑲᐧ ᓇᑐᓇᒪᕽ ᑭᑕ ᑲᐧᔭᐢᑳᐧᑐᑎᓯᐊᐧᑭᒥᑲᐃᐧᔭᕽ ᙭ ᐅᐦᒋ, ᑭ ᑭᐢᑫᔨᑖᑯᓯᓈᓇᐤ ᒪᒋᐃᑎᐃᐧᐣ ᐁ ᐃᑐᑕᒪᕽ, ᙭ ᒋ ᐸᒥᑖᐤ ᒪᒋᐃᑎᐃᐧᐣ? ᓇᒪᐃᐧᔭ ᑭᑕ ᑭ ᐃᐦᑭᐣ.
[18] ᒋᑫᒫ ᑭᐢᐱᐣ ᒥᓇ ᐅᓯᑖᔮᓂ ᐊᓂᐦᐃ ᑳ ᑭ ᓂᓯᐊᐧᓈᒋᑖᔮᐣ, ᓂ ᓄᑯᑖᐣ ᓂᔭ ᐁ ᐊᐧᓂᑐᑕᒫᐣ.
[19] ᒋᑫᒫ ᓂᔭ ᐅᔭᓱᐁᐧᐃᐧᐣ ᐅᐦᒋ ᓂ ᑭ ᓂᐱᐣ ᐅᔭᓱᐁᐧᐃᐧᓂᕽ ᐃᓯ, ᑭᑕ ᐱᒫᑎᓯᔮᐣ ᑭᓭᒪᓂᑐᕽ ᐃᓯ.
[20] ᓂ ᐃᐧᒋ ᒋᐢᑕᐦᐋᐢᑳᐧᓱᒫᐤ ᙭; ᐁᔨᐁᐧᕽ ᒫᑲ ᓂ ᐱᒫᑎᓯᐣ; ᓇᒪᐃᐧᔭ ᒫᑲ ᐁᑲᐧ ᓂᔭ, ᒫᑲ ᙭ ᐁ ᐱᒫᑎᓯᐟ ᐱᐦᒋ ᓂᔭ: ᐊᓂᒪ ᒫᑲ ᑳ ᐱᒫᑎᓯᔮᐣ ᐁᑲᐧ ᓂ ᐃᐧᔮᓯᕽ ᓂ ᐱᒫᑎᓯᐣ ᑖᐯᐧᔦᔨᑕᒧᐃᐧᓂᕽ, ᐊᓂᒪ ᐁ ᑖᐯᐧᔦᔨᒥᐦᐟ ᑭᓭᒪᓂᑐᐃᐧᑯᓯᓵᐣ, ᑳ ᑭ ᓵᑭᐃᐟ, ᒥᓇ ᑳ ᑭ ᐸᑭᑎᓂᓱᐟ ᓂᔭ ᐅᐦᒋ
[21] ᓇᒪᐃᐧᔭ ᓂ ᐸᒋᐸᔨᑖᐋᐧᐣ ᐅ ᑭᓭᐋᐧᑎᓯᐃᐧᐣ ᑭᓭᒪᓂᑐ: ᒋᑫᒫ ᑭᐢᐱᐣ ᐅᔭᓱᐁᐧᐃᐧᓂᕽ ᑭ ᐅᐦᒋ ᐊᔮᕽ ᑲᐧᔭᐢᑳᐧᑎᓯᐃᐧᐣ, ᐱᑯᓇᑕ ᙭ ᑳ ᑭ ᓂᐱᐟ.