[1] ᐁᐊᐧᑯ ᐅᒪ ᐅᐦᒋ ᓂᔭ ᐹᓬ, ᐅᑭᐸᐃᑳᓱ ᙭ ᒋᓴᐢ ᐅᐦᒋ ᑭᔭᐋᐧᐤ ᒉᐣᑕᐃᓬᐊᐠ ᑭᑕ ᐋᐸᒋᐃᑕᑯᐠ,
[2] ᑭᐢᐱᐣ ᐅᑎ ᑳ ᐯᑕᒧᐁᐧᑫᐧ ᐁ ᐃᓯ ᐸᒥᑖᕽ ᐅ ᑭᓭᐋᐧᑎᓯᐃᐧᐣ ᑭᓭᒪᓂᑐ ᑳ ᑭ ᒥᔨᑲᐃᐧᔮᐣ ᑭᔭᐋᐧᐤ ᐃᓯ;
[3] ᐋᐧᐸᐦᑕᐦᐃᐁᐧᐃᐧᐣ ᑳ ᑭ ᐅᐦᒋ ᑭᐢᑫᔨᑕᒧᐃᑲᐃᐧᔮᐣ ᑳ ᐊᐧᓂᒧᑕᕽ, ᓵᓴᐩ ᑳ ᑭ ᐃᓯ ᒪᓯᓇᐦᐊᒫᑕᑯᐠ ᒐᑲᐋᐧᓯᐢ ᒫᑲ ᐊᔭᒥᐃᐧᓇ,
[4] ᐁᑯᑕ ᐃᐢᐱ ᐊᔭᒥᑖᔦᑯ ᑭ ᑲ ᑭ ᐋᐧᐸᑌᓈᐋᐧᐤ ᐁ ᐃᓯ ᓂᓯᑐᐦᑕᒫᐣ ᐅ ᐊᐧᓂᒧᒋ ᐊᔮᐃᐧᓇ ᙭;
[5] ᑲᔮᐢ ᐁ ᐯ ᐋᔮᓂᐢᑫ ᓂᐦᑖᐃᐧᑭᕽ ᐁᑳ ᑳ ᑭ ᐅᐦᒋ ᑭᐢᑫᔨᑕᒧᐦᐃᐦᒋᐠ ᐊᔨᓯᔨᓂᐃᐧᑯᓯᓵᓇᐠ, ᑳ ᐃᓯ ᐁᑲᐧ ᐋᐧᐸᐦᑕᐃᒥᐦᐟ ᐅ ᑲᓈᒋ ᐊᐹᐢᑎᓬᐃᒪ ᒥᓇ ᐅᑭᐢᑭᐁᐧᐦᐃᑫᒪ ᐊᐦᒑᐦᑲᐧ ᐅᐦᒋ;
[6] ᐅᒪ ᐅᑎ, ᒉᐣᑕᐃᓬᐊᐠ ᐁ ᐃᐧᒋᑎᐯᔨᑕᒧᒥᐁᐧᒋᐠ, ᒥᓇ ᐁ ᐃᐧᒋᐃᐁᐧᒋᐠ ᐊᓂᒪ ᒥᔭᐤ, ᒥᓇ ᐁ ᐊᓯᑕᑭᒋᑳᓱᒋᐠ ᐊᓂᒪ ᐊᓱᑕᒫᑫᐃᐧᐣ ᙭ ᒋᓴᐢ ᑳ ᐊᔮᕽ ᒥᔮᐧᒋᒧᐃᐧᐣ ᐅᐦᒋ,
[7] ᐁᐊᐧᑯ ᑭᑕ ᐸᒥᑖᔮᐣ ᑳ ᑭ ᐃᑕᑭᒥᑲᐃᐧᔮᐣ, ᐁ ᐃᑕᐢᑌᐠ ᐊᓂᒪ ᒣᑭᐃᐧᐣ ᐅ ᓂᓱᑲᒫᑫᐃᐧᐣ ᑭᓭᒪᓂᑐ ᑳ ᑭ ᒥᔨᑲᐃᐧᔮᐣ ᐁ ᐃᓯ ᐊᑐᐢᑫᒪᑲᓂᔨᐠ ᐅ ᒪᐢᑲᐃᐧᓯᐃᐧᐣ.
[8] ᓂᔭ ᑳ ᒫᐊᐧᒋ ᐊᐱᐢᑌᔨᑖᑯᓯᔮᐣ ᐁ ᐃᐦᑕᓯᒋᐠ ᑲᐦᑭᔭᐤ ᐅᑲᓈᑎᓯᐊᐧᐠ, ᐅᒪ ᓂᓱᑲᒫᑯᐃᐧᐣ ᓂ ᑭ ᒥᔨᑲᐃᐧᐣ, ᑭᑕ ᐋᐧᐃᐧᑕᒪᐊᐧᑭᐠ ᒉᐣᑕᐃᓬᐊᐠ ᐁᑳ ᑫ ᑭ ᑌᐱ ᑭᐢᑫᔨᑕᒥᕽ ᐅ ᐁᐧᔪᑎᓯᐃᐧᓇ ᙭;
[9] ᒥᓇ ᑭᑕ ᐋᐧᐸᐦᑕᒧᐊᑭᐠ ᑲᐦᑭᔭᐤ ᐊᔨᓯᔨᓂᐊᐧᐠ ᐁ ᐃᑕᑭᑌᐠ ᐊᓂᒪ ᑳ ᐊᐧᓂᒧᑕᕽ ᑳᑭᑫ ᐁ ᐯ ᐊᐢᑭᐊᐧᕽ ᑳ ᑭ ᐊᔮᐠ ᑳᑕᓄᕽ ᑭᓭᒪᓂᑐᕽ ᐊᓇ ᑳ ᑭ ᐅᓯᑖᐟ ᑲᐦᑭᔭᐤ ᑫᑲᐧᐩ;
[10] ᐁᐊᐧᑯ ᒫᑲ ᐅᐦᒋ ᐁᑲᐧ ᑳ ᑭᐦᒑᔨᐃᐧᒋᐠ ᒥᓇ ᑳ ᒪᐢᑲᐃᐧᓯᒋᐠ ᑭᐦᒋ ᑭᓯᑯᐃᐧ ᐊᔨᕽ ᑭᑕ ᑭᐢᑫᔨᑕᒧᐃᐦᒋᐠ ᐅ ᑭᐦᒋ ᐃᔨᓂᓯᐃᐧᐣ ᑭᓭᒪᓂᑐ,
[11] ᑳ ᐃᑕᐢᑌᔨᐠ ᑳᑭᑫ ᐊᐧᐁᐧᔦᔨᑕᒧᐃᐧᐣ ᑳ ᑭ ᐊᐧᐁᐧᔦᔨᑕᕽ ᙭ ᒋᓴᐢ ᑳ ᑎᐯᔨᒥᑯᔭᕽ ᐅᐦᒋ:
[12] ᐁᐊᐧᑯ ᒫᑲ ᑳ ᐅᐦᒋ ᐊᔮᔭᕽ ᓱᑫᔨᒧᐃᐧᐣ ᒥᓇ ᐱᐦᑐᑫᐃᐧᐣ ᐊᐢᐯᔨᒧᐃᐧᓂᕽ ᐁ ᑖᐯᐧᔦᔨᒫᔭᕽ.
[13] ᐁᑯᓯ ᒫᑲ ᓂ ᓇᑕᐁᐧᔨᑌᐣ ᐁᑳ ᑭᑕ ᓀᓱᐃᐧᐃᑯᔦᐠ ᑭᔭᐋᐧᐤ ᐁ ᐅᐦᒋ ᐋᔨᒥᓯᔮᐣ, ᐃᐧᔭ ᐁᐊᐧᑯ ᑭᑕ ᐅ ᒪᒪᐦᑖᑯᓯᐃᐧᓂᔦᐠ.
[14] ᐁᐊᐧᑯ ᒫᑲ ᐅᒪ ᐅᐦᒋ ᓄᒋᐦᒋᑲᐧᓂᐢᑕᐋᐧᐤ ᐁᐧᔪᑖᐃᐧᕽ,
[15] ᑳ ᐅᐦᒋ ᐃᐧᒋᑳᓱᐟ ᑲᐦᑭᔭᐤ ᐁ ᐸᐯᐢᑭᑐᑌᐃᐧᓯᐟ ᑭᐦᒋ ᑭᓯᑯᕽ ᒥᓇ ᐊᐢᑭᕽ,
[16] ᑭᑕ ᐸᑭᑌᔨᑕᒫᑯᔦᐠ, ᐁ ᐃᓯ ᐁᐧᔪᑕᓂᔨᐠ ᐅ ᑭᐢᑌᔨᑖᑯᓯᐃᐧᐣ, ᑭᑕ ᑭ ᒪᐢᑲᐃᐧᓯᐃᑯᔦᐠ ᑲᐢᑭᐦᐁᐃᐧᓯᐃᐧᐣ ᐅᐟ ᐊᐦᒑᐦᑲᐧ ᐅᐦᒋ ᐱᒑᔨᕽ ᑭᐟ ᐊᔨᓯᔨᓂᐃᐧᐃᐧᓂᐋᐧᕽ;
[17] ᙭ ᑭᑕ ᐊᔮᐟ ᑭᑌᐃᐋᐧᕽ ᑖᐯᐧᔦᔨᑕᒧᐃᐧᐣ ᐅᐦᒋ; ᑭᔭᐋᐧᐤ, ᐁ ᐋᔮᒋ ᐊᔮᔦᐠ ᒥᓇ ᐁ ᒪᐢᑲᐃᐧ ᐊᔮᔦᐠ ᓵᑭᐦᐃᐁᐧᐃᐧᓂᕽ,
[18] ᑭᑕ ᒪᐢᑲᐃᐧᓯᔦᐠ ᑭᑕ ᓂᓯᑕᐁᐧᔨᑕᒣᐠ ᑭᑭ ᑲᐦᑭᔭᐤ ᐅᑲᓈᑎᓯᐊᐧᐠ ᐃᔨᑯᕽ ᐁ ᐊᔭᑲᐢᑳᐠ ᒥᓇ ᐁ ᑭᓈᐧᐠ ᒥᓇ ᐁ ᐃᐢᐸᐠ ᒥᓇ ᐁ ᐃᐢᐱᐦᒋ ᑎᒥᐠ,
[19] ᐁᑯᓯ ᑭᑕ ᑭᐢᑫᔨᑕᒣᐠ ᐅ ᓵᑭᐦᐃᐁᐧᐃᐧᐣ ᙭ ᑳ ᐊᔨᐋᐧᑭᐢᑲᒧᒪᑲᕽ ᑭᐢᑫᔨᑕᒧᐃᐧᐣ, ᑭᑕ ᑭ ᒧᐢᑭᓇᐃᑲᐃᐧᔦᐠ ᒥᑐᓂ ᐃᐢᑯ ᐅ ᒧᐢᑭᓀᐃᐧᓂᕽ ᑭᓭᒪᓂᑐ.
[20] ᐁᑲᐧ ᒫᑲ ᐊᓇ ᑳ ᑲᐢᑭᑖᐟ ᑭᑕ ᐊᔨᐋᐧᑭ ᐁᐧᔪᒋ ᐃᑐᑕᕽ ᐊᐊᐧᓯᒣ ᐃᔨᑯᕽ ᑲᐦᑭᔭᐤ ᑳ ᓇᑐᑕᒪᕽ ᐊᐦᐳ ᑳ ᐃᑌᔨᑕᒪᕽ, ᐁ ᐃᑕᐢᑌᐠ ᐊᓂᒪ ᒪᐢᑲᐃᐧᓯᐃᐧᐣ ᑳ ᐊᑐᐢᑫᒪᑲᕽ ᐱᒑᔨᕽ ᑭᔮᓇᐤ,
[21] ᐁᐊᐧᑯ ᑭᑕ ᐃᐧ ᐊᔮᐤ ᑭᐢᑌᔨᑖᑯᓯᐃᐧᐣ ᐊᔭᒥᐦᐋᐃᐧᓂᕽ ᒥᓇ ᙭ ᒋᓴᐢ ᐁ ᐊᑎ ᐋᔮᓂᐢᑫ ᓂᐦᑖᐃᐧᑭᕽ ᑳᑭᑫ ᒥᓇ ᑳᑭᑫ. ᐋᒣᐣ.