[1] ᒋᑫᒫ ᑭᔭᐋᐧᐤ, ᓂᒋᐋᐧᒥᑎᐠ, ᑭ ᑭᐢᑫᔨᑌᓈᐋᐧᐤ ᑳ ᑭ ᐃᓯ ᐱᑐᑲᑖᕽ, ᓇᒪᐃᐧᔭ ᐱᑯᓇᑕ ᐃᑌᔨᑖᑲᐧᐣ:
[2] ᒫᑲ ᐁ ᑭ ᑯᑕᑭᐦᐃᑲᐃᐧᔮᕽ ᐊᐊᐧᓯᐢᐱ, ᒥᓇ ᐁ ᑭ ᓇᓀᐯᐃᐧ ᐊᔨᑐᑖᑲᐃᐧᔮᕽ, ᑳ ᐃᓯ ᑭᐢᑫᔨᑕᒣᐠ, ᐊᓂᑕ ᐱᓬᐃᐹᐩ, ᐁᔪᑲᑦ ᓂ ᑭ ᓱᑫᔨᒧᓈᐣ ᓂ ᑭᓭᒪᓂᑐᒥᓈᐣ ᐅᐦᒋ ᑭᑕ ᐃᐧᐦᑕᒫᑖᕽ ᑭᓭᒪᓂᑐ ᐅ ᒥᔮᐧᒋᒧᐃᐧᐣ ᒥᐢᑕᐦᐃ ᐋᑫᐧᔨᒧᐃᐧᓂᕽ.
[3] ᒋᑫᒫ ᑳ ᐃᓯ ᓯᑭᑫᒧᔮᕽ ᓇᒪᐃᐧᔭ ᐊᐧᓂᓯᓄᐃᐧᓂᕽ, ᓇᒪᐃᐧᔭ ᒥᓇ ᐁᑳ ᑳ ᐯᑲᕽ, ᓇᒪᐃᐧᔭ ᒥᓇ ᑲᔦᔨᓯᐃᐧᓂᕽ:
[4] ᒫᑲ ᑳ ᑭ ᐃᓯ ᑌᐸᑫᔨᒥᑯᔮᕽ ᑭᓭᒪᓂᑐ ᑭᑕ ᐸᒥᓂᒧᐃᑲᐃᐧᔮᕽ ᒥᔮᐧᒋᒧᐃᐧᐣ, ᐁᑯᓯ ᓂᐟ ᐃᓯ ᐱᑭᐢᑳᐧᓈᐣ; ᓇᒪᐃᐧᔭ ᐊᔨᓯᔨᓂᐤ ᐁ ᐃᐧ ᓇᐦᐃᔭᐁᐧᐋᔮᕽ, ᒫᑲ ᑭᓭᒪᓂᑐ ᑳ ᑯᑌᔨᑕᕽ ᓂᑌᐃᓈᓇ.
[5] ᒋᑫᒫ ᓇᒪᐃᐧᑳᐨ ᓄᐦᒋ ᐃᓯ ᒥᐢᑳᑲᐃᐧᓈᐣ ᑭᑕ ᐋᐸᒋᑖᔮᕽ ᒫᒥᔪᒥᐁᐧᐃᐧ ᐊᔭᒥᐃᐧᓇ, ᑭᐢᑕᐋᐧᐤ ᑭ ᑭᐢᑫᔨᑌᓈᐋᐧᐤ, ᓇᒪᐃᐧᔭ ᒥᓇ ᑳ ᐋᑯᐊᒥᕽ ᒧᐢᑕᐃᐧᓇᒫᑫᐃᐧᐣ, ᑭᓭᒪᓂᑐ ᑭᐢᑫᔨᑕᑦ;
[6] ᓇᒪᐃᐧᔭ ᒥᓇ ᐁ ᓇᑐᓇᒫᕽ ᑭᑕ ᑭᐢᑕᑭᒥᑯᔮᕽ ᐊᔨᓯᔨᓂᐤ, ᓇᒪᐃᐧᔭ ᒥᓇ ᑭᔭᐋᐧᐤ, ᐊᐦᐳ ᑯᑕᑲᐠ, ᐋᑕ ᑭᑕ ᑭ ᓇᑕᐁᐧᔨᑕᒫᑖᕽ ᐊᔨᐢ ᐅᐟ ᐊᐹᐢᑎᓬᐃᒪ ᙭.
[7] ᒫᑲ ᑭ ᑭ ᔪᐢᑳᑎᓯᑲᑖᑎᓈᐣ, ᑖᐱᐢᑯᐨ ᐅᑲᓄᓈᐋᐧᓱ ᐁ ᐃᓯ ᐸᒥᐋᐟ ᐃᐧᔭ ᐅᐟ ᐊᐋᐧᓯᒥᓴ:
[8] ᐁᑯᓯ ᒫᑲ, ᓵᑭᐦᐃᐁᐧᐃᐧᓂᕽ ᐁ ᓇᑕᐁᐧᔨᒥᑖᕽ, ᓂ ᑭ ᒥᔦᐧᔨᑌᓈᐣ ᑭᑕ ᐅᐦᒋᐢᑕᒫᑖᕽ, ᓇᒪᐃᐧᔭ ᐱᑯ ᑭᓭᒪᓂᑐ ᐅ ᒥᔮᐧᒋᒧᐃᐧᐣ, ᒫᑲ ᓂᔭᓈᐣ ᓂᐟ ᐊᐦᒑᐦᑯᓈᓇᐠ ᒥᓇ, ᐃᐧᔭ ᒥᐢᑕᐦᐃ ᐁ ᐊᑎ ᓵᑭᐃᑖᕽ.
[9] ᒋᑫᒫ ᑭ ᑲᓄᑭᐢᑭᓯᓈᐋᐧᐤ, ᓂᒋᐋᐧᒥᑎᐠ, ᓂᐟ ᐊᑐᐢᑫᐃᐧᓂᓈᐣ ᒥᓇ ᓂ ᑯᑕᑭᑖᐃᐧᓂᓈᐣ: ᐁ ᐊᑐᐢᑫᔮᕽ ᐁ ᑎᐱᐢᑳᐠ ᒥᓇ ᐁ ᑭᓯᑳᐠ, ᐁᑳ ᑫᑲᐧᐩ ᑭᑕ ᓇᔭᑕᐃᑖᕽ, ᑭ ᑭ ᑲᑫᐢᑭᒥᑎᓈᐣ ᑭᓭᒪᓂᑐ ᐅ ᒥᔮᐧᒋᒧᐃᐧᐣ.
[10] ᑭ ᑭᐢᑫᔨᑌᓈᐋᐧᐤ, ᒥᓇ ᑭᓭᒪᓂᑐ ᑭᐢᑫᔨᑕᑦ, ᐃᔨᑯᕽ ᑲᓈᑎᓯᐃᐧᓂᕽ ᒥᓇ ᑲᐧᔭᐢᑭᑖᑎᓯᐃᐧᓂᕽ ᒥᓇ ᐁᑳ ᑭᑕ ᑭ ᐋᓀᐧᔨᑖᑯᓯᕽ ᑳ ᑭ ᐃᓯᐦᒋᑫᐢᑖᑖᕽ ᑭᔭᐋᐧᐤ ᑳ ᑖᐯᐧᑕᒣᐠ:
[11] ᐃᐧᔭ ᐁ ᑭᐢᑫᔨᑕᒣᐠ ᑖᓂᓯ ᑳ ᑭ ᐃᑐᑖᑖᕽ ᑲᐦᑭᔭᐤ, ᑖᐱᐢᑯᐨ ᐅᑖᐃᐧᒫᐤ ᑳ ᐃᑐᑕᐋᐧᐟ ᐃᐧᔭ ᐅᐟ ᐊᐋᐧᓯᒥᓴ, ᐁ ᑲᑫᐢᑭᒥᑖᕽ, ᒥᓇ ᐁ ᓴᓯᑭᒥᑖᕽ, ᒥᓇ ᐁ ᐋᒋᒧᐢᑖᑖᕽ,
[12] ᑭᑕ ᑭ ᐃᓯ ᐱᒧᐦᑌᔦᐠ ᑭᑕ ᑌᐸᑫᔨᒥᑯᔦᐠ ᑭᓭᒪᓂᑐ, ᑳ ᓇᑐᒥᑯᔦᐠ ᐃᐧᔭ ᐅᐟ ᐅᑌᓇᐃᐧᐃᐧᓂᕽ ᒥᓇ ᑭᐢᑌᔨᑖᑯᓯᐃᐧᓂᕽ.
[13] ᐁᐊᐧᑯ ᐅᒪ ᐅᐦᒋ ᒫᑲ ᓂᔭᓈᐣ ᒥᓇ ᓇᒪᐃᐧᔭ ᓂ ᑭᐱᒋ ᓇᓈᐢᑯᒫᓈᐣ ᑭᓭᒪᓂᑐ, ᐅᒪ, ᐃᐢᐱ ᐁ ᒥᔨᑖᕽ ᐃᑌᐧᐃᐧᐣ ᑳ ᐃᑌᐧᐃᑲᐃᐧᔮᕽ, ᑭᓭᒪᓂᑐ ᐅᑎ ᐅᐟ ᐃᑌᐧᐃᐧᐣ, ᑭ ᑭ ᐃᓯ ᐅᑎᓀᓈᐋᐧᐤ ᓇᒪᐃᐧᔭ ᑖᐱᐢᑯᐨ ᐊᔨᓯᔨᓂᐤ ᐅᐟ ᐃᑌᐧᐃᐧᐣ, ᒫᑲ, ᑳ ᐃᓯ ᐊᔮᐠ ᑖᐯᐧ, ᑭᓭᒪᓂᑐ ᐅᐟ ᐃᑌᐧᐃᐧᐣ, ᐊᓂᒪ ᑳ ᐊᑐᐢᑫᒪᑲᕽ ᐁ ᑭᑭᐢᑳᑯᔦᐠ ᑭᔭᐋᐧᐤ ᑳ ᑖᐯᐧᑕᒣᐠ.
[14] ᒋᑫᒫ ᑭᔭᐋᐧᐤ, ᓂᒋᐋᐧᒥᑎᐠ, ᑭ ᑭ ᑭᐢᑭᓇᐋᐧᐸᒫᐋᐧᐊᐧᐠ ᑭᓭᒪᓂᑐᐊᐧ ᑳ ᐊᔭᒥᐦᐁᐢᑕᐋᐧᒋᐠ ᒍᑎᔭᐃᕽ ᑳ ᐊᔮᒋᐠ ᙭ ᒋᓴᐢ ᐃᓯ: ᐃᐧᔭ ᑭᔭᐋᐧᐤ ᒥᓇ ᐁ ᑭ ᐃᓯ ᑯᑕᑭᐦᐃᑯᔦᑯᐠ ᑭ ᐃᐧᑕᐢᑭᒫᑲᓂᐋᐧᐊᐧᐠ, ᑖᐱᐢᑯᐨ ᐃᐧᔭᐋᐧᐤ ᑳ ᑭ ᐃᑐᑖᑯᒋᐠ ᒍᐊᐧ;
[15] ᑳ ᑭ ᓂᐸᐦᐋᒋᐠ ᑳ ᑎᐯᔨᐦᒋᑫᔨᐟ ᒋᓴᓴ ᒥᓇ ᐅᑭᐢᑭᐁᐧᐦᐃᑫᐊᐧ, ᒥᓇ ᑳ ᑭ ᐊᐧᔭᐃᐧᑎᓴᐅᑯᔮᐦᑭᐠ, ᐁᑳ ᒫᑲ ᑳ ᓇᐦᐃᔭᐁᐧᐋᒋᐠ ᑭᓭᒪᓂᑐᐊᐧ, ᒥᓇ ᑳ ᓇᔦᑖᐃᐧᐋᒋᐠ ᑲᐦᑭᔭᐤ ᐊᔨᓯᔨᓂᐊᐧ;
[16] ᐁ ᑭᑕᐊᒫᑯᔮᐦᑭᐠ ᑭᑕ ᐃᐧᐦᑕᒫᒫᔮᕽ ᒉᐣᑕᐃᓬᐊ ᑭᑕ ᑭ ᐱᒫᒋᐦᐅᔨᐟ; ᒫᑲ ᑭᓯᐋᐧᓯᐃᐧᐣ ᐅᑎᐦᑎᑲᐧᐠ ᒥᑐᓂ ᑭᓯᐸᓄᕽ ᐃᐢᑯ.
[17] ᒫᑲ ᓂᔭᓈᐣ ᓂᒋᐋᐧᒥᑎᐠ, ᐊᒋᔭᐤ ᐁ ᐸᐢᑫᐃᐧᔨᑖᕽ, ᐱᑯ ᐅᑎ ᐁᑳ ᐁ ᐋᐧᐸᒥᑖᕽ, ᓇᒪᐃᐧᔭ ᒥᑌᐃᕽ, ᐊᔨᐊᐧᐠ ᑭ ᑭ ᓄᑌ ᐋᐧᐸᒥᑎᓈᐣ ᑭᐦᑳᐧᑲᓂᐋᐧᕽ:
[18] ᒋᑫᒫ ᐋᑕ ᑭ ᑭ ᐃᐧ ᓇᑕᐋᐧᐸᒥᑎᓈᐋᐧᐤ, ᓂᔭ ᐹᓬ ᑲᑭᑖᐧᑦ; ᒫᑲ ᓭᑕᐣ ᓂ ᑭ ᐊᐧᓈᐃᑯᓈᐣ.
[19] ᒋᑫᒫ ᑫᑲᐧᐩ ᑳ ᐃᓯ ᐸᑯᓭᔨᒧᔮᕽ, ᐊᐦᐳ ᑳ ᒪᒪᐦᑖᑯᐃᑯᔮᕽ, ᐊᐦᐳ ᑳ ᐊᔨᐋᐧᑭ ᑭᐢᑌᔨᑕᒫᕽ? ᓇᒪ ᒋ ᑭᔭᐋᐧᐤ, ᐅᑎᐢᑲᐃᐧᐢᑲᐋᐧᔭᑭ ᑳ ᑎᐯᔨᒥᑯᔭᕽ ᒋᓴᐢ ᐃᐢᐱ ᑕᑯᓯᑭ?
[20] ᒋᑫᒫ ᑭᔭᐋᐧᐤ ᓂ ᑭᐢᑌᔨᑖᑯᓯᐃᐧᓂᓈᐣ ᒥᓇ ᓂ ᒪᒪᐦᑖᑯᓯᐃᐧᓂᓈᐣ.