[1] ōmisi itēw Jesus okiskinohamawākana, “pēyakwāw pēyak nāpēw ē‑wēyōtisit, ēkwa pēyak atoskēyākana ē‑pimipayihtamākot kahkiyaw kā‑tipēyihtahk. ana kā‑wēyōtisit nāpēw wīhtamawāw ēsa otatoskēyākana ē‑mōhco-mēstināyit osōniyāma.
[2] ēkosi tēpwātēw ē‑itāt, ‘tāpwē cī ōma kā‑itikawiyan? mahti masinaha kahkiyaw tānisi ē‑isi-mēstinikēyan ōta nitaskīhk. ayisk namōya ayiwāk kika-kī-pimipayihtamawin ōta nitaskīhk.’
[3] ana atoskēyākan ōmisi itēyihtam, ‘nitōkimām niwī-pakitinik. tānisi ēkwa kita-kī-tōtamān? namōya nimaskawisīn kita-wātihkēyān, ēkwa ninēpēwisin kita-papāmi-natotamāyān.
[4] hāw, nikiskēyihtēn tānisi kita-tōtamān, nika-wīcēwākanihkān, ēwakonik nika-pamihikwak wīkiwāhk ispīhk pakitinikawiyāni.’
[5] ēkosi tēpwātēw kahkiyaw ayisiyiniwa kā‑masinahamawāyit otōkimāma. kakwēcimēw anihi nistam, ‘tānimayikohk kā‑masinahamawat nitōkimām?’ itēw.
[6] ‘mitātahtomitanaw mahkahk pimiy askihtakomina ohci,’ itik. ‘ōmīta kā‑masinahikātēk, kēsiskaw api ēkwa niyānanomitanaw itasinaha,’ itēw awa atoskēyākan.
[7] ēkwa kotaka kakwēcimēw, ‘kiya māka, tāniyikohk kā‑masinahamawat?’ ‘kihci-mitātahtomitanaw mahkahk pahkwēsikanihkān,’ itik. ‘hāw, ōta masinahikātēw, mahti masinaha ayinānēw tahtwāw mitātahtomitanaw.’
[8] ōma kā‑tōtahk ohci, kā‑kakayēyisit atoskēyākan otōkimāma mamihcimik ē‑iyinīsi-tōtahk tānisi ē‑wī-isi-pimācihot, ayisk ayisiyiniwak ōta askīhk iyinīsiwak askīwi-kīkwaya kita-isi-paminahkik, ispīhci aniki kīsikāstēnohk kā‑ayācik, kisē-manitow otipēyihcikēwinihk.”
[9] ēkosi Jesus ōmisi itēw, “ēkosi kiwīhtamātināwāw, wīcēwākanihtamok wēyōtisiwin ēkosi mēscipayiki, kika-pīhtikwahikawin kihci-kīsikohk.
[10] awiyak ē‑mamisītotāht kita-pimipayihtāt apisīs kīkwaya kita-mamisītotawāw mistahi kīkwaya kita-pimipayihtāt; ēkwa awiyak ē‑kakayēyisit apisīs kīkwaya ohci kita-kakayēyisiw mistahi kīkwaya ohci.
[11] kīspin namōya kwayask kitōtēnāwāw ē‑paminamēk askīhk ohci wēyōtisiwina, tānisi kita-kī-isi-mamisītotākawināwāw ta‑paminamēk wēyōtisiwina kā‑mā-mawaci-kistēyihtākwahki?
[12] ēkwa kīspin namwāc kwayask kitōtēnāwāw anihi ohci kotak awiyak kā‑tipēyihtahk, awīna kika-miyikowāw anima ka‑tipēyihtamēk?
[13] “namōya awiyak ē‑atoskēyākaniwit kita-kī-atoskawēw nīso okimāwa. kita-pakwātēw pēyak anihi ēkwa kita-miywēyimēw kotaka. kwayask kita-tōtawēw anihi pēyak ēkwa kotaka kita-pīwēyimēw. namōya kika-kī-atoskawāw kisē-manitow ēkwa sōniyāw.”
[14] ispīhk Phariseewak ōma ē‑pēhtahkik, kī‑mētawākātēwak Jesusa, ayisk ē‑kī-sākihācik sōniyāwa.
[15] Jesus itēw, “kiyawāw ōma ē‑miyohtwāyēk kā‑itakimisoyēk kita-ohci-miyo-kitāpamikoyēkok ayisiyiniwak, māka kisē-manitow kiskēyihtam kitēhiwāwa. anihi kīkwaya ayisiyiniwak kā‑ayiwākēyihtahkik, ēwakoni kisē-manitow namōya nānitaw itāpatakēyihtam.
[16] “owiyasiwēwina Moses ēkwa omasinahikēwiniwāwa okiskiwēhikēwak kī‑āpatanwa isko John osīkahāhtākēw ē‑pimātisit; ēkospīhk ohci miywācimowin otipēyihcikēwin kisē-manitow ātocikātēw ēkwa kahkiyaw ēkota kakwē-pīhtikwahisowak.
[17] nawac wēhcasin kihci-kīsik mīna askiy kita-pōni-ihtakwahki ispīhci ē‑māwaci-apisāsik icwēwinis wiyasiwēwinihk ohci kita-pōni-āpatahk.
[18] “awiyak nāpēw ē‑wēpināt wēpinito-masinahikanihk owīkimākana ēkwa kotaka iskwēwa wīkimēw kakēpātisiw; ēkwa nāpēw ē‑wīkimāt ē‑kī-wēpinimiht iskwēwa kakēpātisiw.
[19] “pēyakwāw ēsa nāpēw ē‑wēyōtisit ē‑miyohot, mitoni ē‑āhkwakihtēyiki ē‑kī-kikiskāk, ēkwa tahto-kīsikāw mitoni ē‑miyo-pamihot.
[20] ēkwa otiskwāhtēmihkānihk māna ē‑pē-itohtahimiht nāpēwa ē‑kitimākisiyit, Lazarus ē‑isiyihkāsoyit, misiwē ē‑omikīyit.
[21] ē‑pakosēyimot anihi iskwascikana kā‑pahkihtiniyiki kā‑wēyōtisiyit nāpēwa omīcisowināhtikohk ohci. ahpō piko atimwa kī‑nōhkwātamiyiwa otomikiya.
[22] kā‑kitimākisit kī‑nakataskēw ēkwa okīsikowa kī‑tahkonik ēkotē Abrahamwa ka‑wītapimāt ē‑wīhkohkēwiht kihci-kīsikohk. ana kā‑wēyōtisit wīsta kī‑nakataskēw mīna kī‑nahināw.
[23] ēkwa nipiwinihk ohci ē‑kakwātakihtāt, wāhyaw ohci ispimihk ē‑itāpit kī‑wāpamēw Abrahamwa ēkwa Lazarusa ē‑wītapimāyit.
[24] ēkwa kā‑tēpwātāt, ‘hāw, nohtā Abraham, kitimākinawin. pē‑itisaw Lazarus, wīhtamaw ocihciy nipīhk kita-sāminam nitēyaniy kita-tahkāpāwatāt, ayisk nikakwātakihtān ōta iskotēhk.’
[25] māka Abraham itēw, ‘nikosis, kiskisi ē‑mēkwā-pimātisiyan kikī-miyikawin ē‑miywāsiki kīkwaya, ēkwa awa Lazarus māyi-kīkwaya kī‑miyāw. māka ēkwa kākīcihāw ōta ēkwa kiya kikakwātakāhpinān.
[26] māka cikēmā, ita kā‑ayāyan mīna ōtē, tastawāyihk ē‑misi-pasatināk namōya wīhkāc kita-kī-asiwāhikātēw, namwāc awiyak ēkotē ohci kita-kī-pē-itohtēw ōta, mīna ōta ohci namōya awiyak kita-itohtēw ēkotē.’
[27] ōmisi itēw, ‘kitimākihtawin, nohtā Abraham, kita-itisahwat Lazarus nohtāwiya wīkiyihk.
[28] ayisk niyānaniwak nīcisānak kita-kitahamawāt, ēkosi ēkāya kita-pē-itohtēyit ōtē kakwātakihtāwinihk.’
[29] Abraham ōmisi kā‑itāt, ‘ayāwēwak wiyawāw Mosesa mīna okiskiwēhikēwa, kiyām ēwakoni ta‑natohtawēwak.’
[30] kā‑wēyōtisiyit māka itik, ‘namōya, nohtā Abraham, māka kīspin awiya ē‑āpisisiniyit kita-nātikocik, kita-kwayaskātisiwak.’
[31] ēkosi itēw, ‘kīspin namōya natohtawēwak Mosesa mīna okiskiwēhikēwa, namōya awiya kita-sākōcimikwak, kiyām āta waniskāyici nipiwinihk ohci.’”