[1] ēkospīhk anima ātiht ayisiyiniwak ēkota ē‑ayācik kā‑wīhtamawācik Jesusa, ātiht anihi Galileehk ohci Pilate ē‑nipahāt mēkwāc ē‑pakitināsōstawāyit kisē-manitowa.
[2] ōmisi itēw Jesus, “aniki Galileehk ohci ē‑nipahihcik, ē‑itēyihtamēk cī nawac ayiwāk ē‑macātisicik ispīhci kahkiyaw Galileewiyiniwak?
[3] namōya! kiwīhtamātināwāw, kīspin ēkāya pōnihtāyēko kimacātisiwiniwāwa, kīstawāw kahkiyaw kika-nipināwāw.
[4] tānisi māka aniki ayinānēwosāp ayisiyiniwak Siloam ohci kā‑kī-nipahiskōsocik asawāpiwikamik ē‑kīpipayiyik? ē‑itēyihtamēk cī nawac ē‑māwaci-macātisicik ispīhci kotakak ayisiyiniwak kā‑ayācik Jerusalemihk?
[5] namwāc aniki! kiwīhtamātināwāw, kīspin ēkāya pōnihtāyēko kimacātisiwiniwāwa, kahkiyaw kīstawāw kika-nipināwāw.”
[6] ēkwa Jesus kī‑ācimostawēw ē‑aspahākēmot, “kētahtawē pēyak nāpēw kī‑ohpikihēw misi-sōmināhtikwa okistikānihk. kī‑natonam mahti kita-mīnisiwiyit, māka namōya kīkway miskam.
[7] ōmisi itēw kā‑atoskātamiyit okistikān, ‘hāw, nisto askiy ēkwa nipē-nitawāpēnēn mahti kita-mīnisiwit awa misi-sōmināhtik, ēkosi namwāc mīnisiwiw. ka‑kīskatahwāw nitawāc. pikonita ōta kakēpiskam.’
[8] māka ana okistikēwiyiniw itēw, ‘kiyām pitamā kita-ohpikiw, nitōkimām, kēyāpic pēyak askiy. nika-pīkopitēn asiskiy wāsakām ēkwa nika-astān mostos omēya.
[9] ēkwa kīspin mīnisiwici kotak askiy ka‑miywāsin; kīspin ēkāya mīnisiwici kika-kīskatahwāw.’”
[10] otayamihēwi-kīsikanisiwāhk Jewak, Jesus kī‑kiskinohamākēw otayamihēwikamikoyihk pēyak.
[11] pēyak iskwēw ēkota kī‑pīhciyawēskāk maci-ahcāhkwa ayinānēwosāp askiy ē‑āhkosīskākot; kī‑wākisiw ēkāya ē‑kī-tasokāpawit.
[12] ē‑wāpamāt Jesus kī‑tēpwātēw ē‑itāt, “iskwēw, kinakatikon ēkwa kitāhkosiwin!”
[13] kī‑sāminēw ostikwāniyihk ēkwa sēmāk ana iskwēw ē‑tasokāpawit, kī‑mamihcimēw kisē-manitowa.
[14] ana kā‑nīkānīstahk ayamihēwikamikohk kī‑kisiwāhik Jesusa ē‑iyinīhkahāyit otayamihēwi-kīsikanisiwāhk. ēkosi pīkiskwātēw ayisiyiniwa, “nikotwāsik kīsikāwa kita-atoskēhk, ēkwa pē‑itohtēk ēkota kita-iyinīhkahikawiyēk, namōya ē‑ayamihēwi-kīsikāk.”
[15] ē‑naskwēwasimāt kā‑tipēyihcikēt ōmisi itēw, “kitōtamohkāsonāwāw! kitāpihkonāwāwak kitotāpēwi-mostosomiwāwak ahpō kisōsōwacimosiwāwak ēkwa kinitawi-minihkwahāwāwak ē‑ayamihēwi-kīsikāk.
[16] ēkwa ēwako awa iskwēw Abrahamwa ē‑ohtaskānēsit, macāyisa ē‑tipēyimikot ayinānēwosāp askiy; namōya cī kita-kī-pakitiniht ē‑ayamihēwi-kīsikāk?”
[17] mitoni nēpēwisiyiwa anihi kā‑māyēyimikot, wiya ōki ayisiyiniwak miywēyihtamwak kahkiyaw mamāhtāwi-kīkwaya kā‑tōtahk.
[18] Jesus kakwēcihkēmow, “tānisi anima itēyihtākwan kisē-manitow otipēyihcikēwin? kīkway ē‑ohci-tāpiskōtēyihcikātēk?
[19] tāpiskōc ōmisi isi: pēyak nāpēw ispīhk ē‑otināt pīsi-kiscikānis ēkwa ē‑kistikēt okistikānihk, ana kiscikānis ohpikiw ēkwa ati-mistikowiw, ēkwa ēkota piyēsīsak watihkwanihk wacistonihkēwak.”
[20] āsay mīna kakwēcihkēmow, ē‑itwēt, “kīkway ē‑ohci-tāpiskōtēyihcikātēk kisē-manitow otipēyihcikēwin?
[21] ōmisi itēyihtākwan: pēyak iskwēw kikinam ohpihkasikan miscahīs pahkwēsikanihk. piyisk ana pahkwēsikan ohpipayiw.”
[22] Jesus kī‑sāpo-pimohtēhow mihcēt ōtēnawa mīna ōcēnāsa ēkwa ē‑ati-kiskinohamawāt ayisiyiniwa, Jerusalemihk ē‑isi-itohtēt.
[23] awiya ēsa kakwēcimik, ē‑itikot, “okiskinohamākēw, ātiht cī piko ayisiyiniwak kita-pimācihāwak?” Jesus itēw,
[24] “ē‑isi-kaskihtāyēk kakwē-pīhtikwēk anima kā‑sākāwāsik iskwāhtēm, ayisk mihcēt ayisiyiniwak kita-kakwē-pīhtikwēwak māka namōya kita-kaskihtāwak.
[25] ana kā‑tipēyihtahk wāskāhikan kita-pasikōw mīna kita-kipaham, ēkosi wayawītimihk nīpawiyēko ē‑matwēhikēyēk, ōmisi kika-itwānāwāw, ‘kā‑tipēyihcikēyan, mahti yōhtēnamawinān.’ ōmisi kita-itwēw, ‘namōya nikiskēyihtēn tānitē ē‑ohtohtēyēk.’
[26] ēkwa ōmisi kika-itāwāw, ‘kikī-wīci-mīcisōmitinān ēkwa kikī-wīci-minihkwēminān, ēkwa kikī-kiskinohamākān nitōtēnāmināhk!’
[27] māka kēyāpic kita-itwēw, ‘namōya nikiskēyihtēn tānitē ē‑ohtohtēyēk. nakasik, kahkiyaw kiyawāw maci-ayisiyiniwak.’
[28] māka kika-mātonāwāw ē‑cīskāpitēyēk ispī wāpamāyēkwāwi Abraham, Isaac, ēkwa Jacob, ēkwa kahkiyaw okiskiwēhikēwak otipēyihcikēwinihk kisē-manitow, ē‑mēkwā-wayawī-wēpinikawiyēk.
[29] ayisiyiniwak kita-takohtēwak māmihk ohci ēkwa natimihk ohci, nātakām ohci, ēkwa nimitāw ohci, ēkwa kahkiyaw kita-apiwak wīhkohtowinihk otipēyihcikēwinihk kisē-manitow.
[30] nākatohkēk, aniki mēkwāc iskwēyānihk kā‑ayācik ka‑nīkānīwak, ēkwa aniki kā‑nīkānīcik iskwēyānihk ka‑ayāwak.”
[31] ēkwa ēkota ātiht Phariseewak pē‑nātēwak Jesusa, ē‑itācik, “ōta ohci sipwēhtē, osām Herod kinōhtē-nipahik.”
[32] ēkwa ōmisi itēw Jesus, “niyāk, wīhtamāhk ana maci-mahkēsīs, ‘niwayawī-wēpināwak maci-ahcāhkwak mīna nitiyinīhkahiwān anohc mīna wāpahki, ēkwa kī‑nīso-tipiskāki nika-kīsihtān nitatoskēwin.’
[33] ēkosi piko kita-pimohtēhoyān anohc mīna wāpahki mīna awasi-wāpahki, ayisk namōya kita-kī-ihkihk okiskiwēhikēw kita-misiwanātisit ohpimē Jerusalemihk ohci.
[34] “Jerusalem, Jerusalem! kinipahāwak okiskiwēhikēwak, asiniya kitohci-pimosinātāwak itisahwākanak kisē-manitow kā‑pē-itisahamākoyēk! tānitahtwāw kā‑kī-nohtē-ākwaskitinakik kitayisiyinīmak, tāpiskōc pāhpahāhkwān kā‑māwasakonāt opāhpahākwānisisa sīpā otahtahkwaniwāhk māka namōya kikī-ohci-pakitinināwāw!
[35] ēkosi kikihci-ayamihēwikamikiwāw ka‑wēpinikātēw. kikēhcināmitināwāw namōya ka‑wāpamināwāw isko itwēyēko ka‑ispayik, ‘kisē-manitow sawēyimēw anihi kā‑pē-itohtēyit owīhowinihk ohci kā‑tipēyihcikēt.’”