[1] Jewak otayamihēwi-kīsikāmiwāw kīsipayiyiw, kotak kīsikāw wīpac ēsa kēyāpic ē‑wawāninākwahk, Mary Magdalene kī‑itohtēw sēkwātihkānihk ēkwa ēsa kā‑wāpamāt asiniya ē‑kī-wīkatē-tihtipinimiht kā‑kī-kipapiyit sēkwātihkānihk ohci.
[2] kī‑ispahtāw Simon Petera ēkwa ana kotak kiskinohamawākan Jesus kā‑sākihāt ita ē‑ayāyit, ēkwa wīhtamawēw ēsa ē‑itwēt, “kī‑otināw ēsa kā‑tipēyihcikēt sēkwātihkānihk ohci, ēkwa namōya nikiskēyihtēnān tānitē ē‑itohtahācik.”
[3] ēkosi Peter ēkwa ana kotak kiskinohamawākan kī‑nitawāpēkinikēwak.
[4] ē‑isi-nīsicik kī‑ispahtāwak, ēkwa ana kotak kiskinohamawākan kī‑nakacipahēw Petera ē‑nīkāni-takopahtāt sēkwātihkānihk.
[5] ē‑nawakīt kī‑wāpahtam ēsa wāpiskēkinwa ēkota ē‑astēyiki, māka namwāc ēsa pīhtikwēw.
[6] ēkwa ēkota ē‑takopahtāt Simon Peter, kī‑ati-pīhtikwēw. kī‑wāpahtam wāpiskēkinwa ē‑astēyiki.
[7] ēkwa anima wāpiskēkinos kā‑kī-ohci-wēwēkistikwānēpitiht Jesus, ohpimē ēsa astēyiw.
[8] kotak ana kiskinohamawākan kā‑kī-nīkāni-takopahtāt ēsa wīsta ati-pīhtikwēw. ē‑wāpahtahk kī‑tāpwēhtam ēsa.
[9] (kēyāpic ēsa namōya ohci-nisitohtamwak kihci-masinahikan ē‑itastēyik ohcitaw piko kita-āpisisiniyit.)
[10] ēkwa ēsa ati-kīwēwak ōki kiskinohamawākanak.
[11] Mary ēsa wayawītimihk sēkwātihkānihk kī‑mā-mātow. ēkwa ē‑mēkwā-mātot kī‑nawakīw ē‑pīhtikwē-itāpit sēkwātihkānihk.
[12] ēkota wāpamēw ēsa nīso okīsikowa ē‑wāpiskisīhoyit, ē‑apiyit ita Jesusa kā‑kī-pimisiniyit, ana pēyak ita kā‑kī-itiskwēsiniyit ēkwa ana kotak ē‑apit ositiyihk isi.
[13] “tānēhki ōma kā‑mātoyan, iskwēw?” itēwak ēsa ōki. ōmisi itēw ēsa, “ē‑kī-sipwētahācik ēsa nōtipēyihcikēma, ēkwa namwāc nikiskēyihtēn tānitē ē‑itohtahācik!”
[14] ēkwa ēsa ē‑kwēskikāpawit kā‑wāpamāt nāpēwa ē‑nīpawiyit ēkota, ēkāya ē‑kiskēyihtahk ēsa ōhi Jesusa kā‑nīpawiyit.
[15] ōmisi kā‑itāt ēsa Jesus, “tānēhki ōma kā‑mātoyan, iskwēw? awīna ōma kā‑natonawat?” kā‑nānapācihtāyit kiscikānisa ē‑itēyimāt ēsa, ōmisi itēw, “nitōkimām, kīspin kī-sipwētahāw, mahti wīhtamawin tānitē wiyaw kā‑kī-itohtatāyan, ēkosi nika-nitawi-nātēn.”
[16] Jesus ēsa ōmisi itēw, “Mary.” ēkwa ē‑nācikāpawīstawāt itēw, “Rabboni!” okiskinohamākēw ē-itwēhk.
[17] “ēkāya miciminin. namōya cēskwa ninātāw ohtāwīmāw,” itēw ēsa Jesus. “māka nāsik nisīmak ēkwa wīhtamawik ē‑wī-kīwētotawak nōhtāwiy, wīstawāw ohtawīwāwa, nikisē-manitōm ēkwa wīstawāw okisē-manitōmiwāwa,” itēw ēsa.
[18] Mary Magadalene kī‑nitawi-ācimostawēw ēsa kiskinohamawākana ē‑wāpamāt kā-tipēyihcikēt, ēkwa anima kā‑kī-itikot ēsa ātotam.
[19] ē‑ati-otākosik ēwako pēyakwan kīsikāw ēkwa kiskinohamawākanak kī‑māmawi-ayāwak ē‑kiskāpiskahahkik iskwāhtēm ēsa wiya ē‑astāhikocik okimāwa Jewa. ēkwa ēsa Jesus kā‑pē-nīpawīstawāt ē‑itāt, “pēyahtakēyimowin ayāk.”
[20] ēkosi ēkwa ati-wāpahtihēw ocihciya mīna otihkokan. okiskinohamawākana ēsa mistahi miywēyihtamiyiwa ē‑wāpamācik kā-tipēyihcikeyit.
[21] āsay mīna Jesus ōmisi itēw, “pēyahtakēyimowin ayāk. e‑isi-pē-itisahot ohtāwīmāw ēkosi kitisahotināwāw.”
[22] ēkwa ēsa pōtātēw ē‑itāt, “tawinamāhk kā‑kanātisit ahcāhk.
[23] kīspin kipōnēyihtamawāwak ayisiyiniwak omaci-tōtamowiniwāwa, ēkosi kisē-manitow wīsta kita-pōnēyihtamawēw; māka kīspin ēkāya kipōnēyihtamawāwak namōya kakī-pōnēyihtamawāwak.”
[24] peyak ana nīsosāp kiskinohamawākanak ohci, Thomas (nīsohtēw kā-itiht), namōya ohci wīcēwēw ispī Jesus kā-pē-itohtēt.
[25] ēkosi kotakak kiskinohamawākana wihtamāk, “niwāpamānān kā-tēpēyihcikēt!” Thomas itēw, “piko ka‑wāpahtamān ita sakahikana kākī-sakahikātēyiki ocihciya ēkwa sāminamāni anihi ocihciya ēkwa nicihciy owiyawihk, namōya nika-tāpwētēn.”
[26] pēyak ē‑kī-ispayik okiskinohamawākanak kī‑māmawi-ayāwak kihtwām pihcāyihk, ēkwa Thomas wīcihiwēw. iskwahtēma kī-kipahpiskahikātēwa, maka Jesus pē‑nīpawīstawēw ēkwa itwēw, “pēyahtakēyimowin ayāk.”
[27] ēkosi itēw Thomasa, “ōta astā kicihcīs, ēkwa kitāpahta nicihciya; ēkwa isiniskēyi ēkwa astā ōta nitihkokanihk. pōni-ānwēhta, ēkwa tāpwēhta!”
[28] Thomas naskwēwasimēw, “nitēpēyihcikēm ēkwa nimanitōm!”
[29] Jesus itēw, “ē-tāpwēhtaman cī osām ē-wāpamiyan? mistahi miywēyihtamwak aniki kā‑tāpwēhtākik ēkāya ē-ohci-wāpamicik!”
[30] ita ē‑ayāyit okiskinohamawākana Jesus mihcet kotaka kī‑nōkohtāw mamahtāwi-kīkwaya ēkāya ē‑masinahikātēyiki ōta masinahikanihk.
[31] māka ōhi masinahikātēwa kita-tāpwēhtamēk Jesus onawasōnākan, manitowi-okosisān, kā‑tāpōwakēyimāyēk ohci kita-ayānāwāw pimātisiwin.