[1] Jesus ē‑kī-kīsi-ayamihāt kī‑sipwēhtēw okiskinohamawākana asici ēkwa kī‑ati-āsowahamwak Kidron sīpīsis. ēkotē kī‑ayāw kiscikānis ēkwa ati-pīhtikwēwak ēsa.
[2] Judas omisihiwēw kī‑kiskēyihtam tānita ōma, ayisk mihcētwāw ēkota Jesus ēkwa okiskinohamawākana kī‑itohtēwak ēsa māna.
[3] ēkosi ēkota kiscikānisihk Judas kī‑itohtahēw Roman simākanisa asici okanawēyihcikēwa kihci-ayamihēwikamikohk ohci, kihci-ayamihēwiyiniwa ē‑isitisahwāyit ēkwa Phariseewa; kī‑nīmāskwēyiwa ēkwa ē‑tahkonamiyit wāsaskotēnikana mīna wāstēnamākana.
[4] Jesus kī‑kiskēyihtam tānisi ē‑wī-ispayihikot, ēkosi kī‑nīkānikāpawiw ēkwa itēw ēsa, “awīna kā‑natonawāyēk?”
[5] “Jesus Nazarethihk kā‑ohcīt,” itik ēsa. “niya ēwako,” kā‑itāt ēsa. ēkota ēsa wīcikāpawīstawēw Judas omisihiwēw.
[6] mayaw Jesus ē‑itwēt, “niya ēwako,” kī‑asēkāpawiwak mīna kī‑pahkisinwak.
[7] āsay mīna kakwēcimēw ēsa, “awīna kā‑natonawāyēk?” “Jesus Nazarethihk ohci,” itik mīna.
[8] “āsay kiwīhtamātināwāw ēwako niya,” itēw ēsa Jesus. “ēkosi kīspin kinatonawināwāw, kiyām ōki kā‑wīcēwicik kita-ati-sipwēhtēwak.”
[9] ēwako ōma ē‑kī-itwēt, “nohtā, namōya pēyak nitohci-wanihāw kā‑kī-miyiyan,” kita-tipipayiyik.
[10] Simon Peter kī‑otihtinam omōhkomān mīna ē‑pakamahwāt māwaci-kihci-ayamihēwiyiniwa otatoskēyākaniyiwa Malchus ē‑isiyihkāsoyit kī‑kīskatahamwēw ohtawakāyiw kihciniskihk.
[11] ōmisi kā‑itāt ēsa Jesus Petera, “awas asowatā kimōhkomān! ē‑itēyihtaman cī ēkāya kita-kakwātakihtāyān nohtāwiy kā‑kī-itakimit kita-kakwātakihtāyān?”
[12] ēkwa ēsa Roman simākanisak asici simākanisiwikimāwa ēkwa Jewak okanawēyihcikēwak otinēwak Jesusa, ēkwa ē‑tahkopitahkik ocihciyiwa,
[13] ēkwa itohtahēwak ēsa Annasa. ēwako otānisa kā‑wīkimāyit Caiaphasa, mēkwāc ēkospīhk ē‑māwaci-kihci-ayamihēwiyinīwiyit ēwako askīwin.
[14] ēwako awa Caiaphas nistam ēsa kā‑kī-itāt Jewikimāwa nawac ta‑miywāsin kīspin pēyak nāpēw kita-nipōstamawāt kahkiyaw ayisiyiniwa.
[15] Simon Peter mīna kotak kiskinohamawākan kī‑pimitisahwēwak Jesusa ēsa. ana kotak kiskinohamawākan ēsa kwayask kiskēyimik māwaci-kihci-ayamihēwiyiniwa, ēkosi kī‑ati-pīhtikwēw wayawītimāyihk owāskāhikaniyihk māwaci-kihci-ayamihēwiyiniwa.
[16] Peter wiya kī‑na-nīpawiw iskwāhtēmihkānihk, ēkwa ana kotak kiskinohamawākan kī‑nitawi-kitotēw oskinīkiskwēwa ē‑kanawiskwāhtawēyit, ēkosi pīhtikwahēw Petera.
[17] ana oskinīkiskwēw iskwāhtēmihk kā‑nīpawit ōmisi itēw ēsa Petera, “namōya cī kiya pēyak okiskinohamawākana ana nāpēw?” “namōya niya,” itēw ēsa Peter.
[18] kī‑kisin tipiskāw, ēkosi atoskēyākanak ēkwa okanawēyihcikēwa kī‑kotawēwak kaskaskisēkān ē‑pōnahkik ēkota ē‑awasocik, ēkwa Peter wīsta ēkota kī‑nitawi-nīpawiw ē‑awasot.
[19] māwaci-kihci-ayamihēwiyiniw kī‑kakwēcimēw Jesusa awīniwa okiskinohamawākana mīna kīkway kā‑kiskinohamākēt.
[20] Jesus ēsa ōmisi itēw, “namōya kīkway niwīhtēn kīmōc. ni‑kī-kiskinohamākān ayamihēwikamikwa ēkwa kihci-ayamihēwikamikohk piko, ita ayisiyiniwak ē‑māmawi-ayācik. namwāc wīhkāc kīmōc kīkway nititwān.
[21] tānēhki kā‑kakwēcimiyan? kakwēcimik ayisiyiniwak kā‑kī-pēhtawicik. kakwēcimik tānisi ē‑kī-itakik. kiskēyihtamwak tānisi ē-kī-itwēyān.”
[22] ispīhk Jesus ē‑pōni-pīkiskwēt, pēyak anihi okanawēyihcikēwa pasihkwēhok ēsa ē‑itwēyit, “namōya ēkosi kita-kī-isi-pīkiskwātat māwaci-kihci-ayamihēwiyiniw.”
[23] Jesus itēw ēsa, “kīspin kīkway nikī-māyi-pīkiskwātēn, wihtamawik ōki kīkway anima kā‑kī-itwēyān. māka kīspin nikī-tāpwān, tānēhki kā‑pasihkwēhoyan?”
[24] ēkosi ēsa Annas itisahamaēw Caiaphasa māwaci-kihci-ayamihēwiyiniwa. kēyāpic ēsa ē‑tahkopitēyiki ocihciya Jesus.
[25] Peter wiya ē‑mēkwā-awasot ēkota kēyāpic ē‑nīpawit. ōmisi kā‑itikot awiya, “namōya cī kiya mīna okiskinohamawākana ana nāpēw?” Peter ēsa ānwēhtam, “namōya niya,” kā‑itāt ēsa.
[26] pēyak ana māwaci-kihci-ayamihēwiyiniw otatoskēyākana ēkota ayāyiwa ēsa, ēwako atoskēyākan ē‑wāhkōmāt anihi Petera kā‑kī-kīskwēpahamwāt ohtawakāyiw, ē‑kakwēcimikot ēsa, “namōya cī ki‑kī-wāpamitin kiscikānisihk ē‑wīcēwat ana nāpēw?”
[27] “namōya,” kā‑itwēt Peter āsay mīna. sēmāk ēsa kā‑matwē-kitot nāpē-pāhpahāhkwān.
[28] wīpac ē‑kīkisēpāyāk Caiaphas owāskāhikanihk ohci Jesus kī‑itohtahāw Pilate okihci-wiyasiwēwikimāw owāskāhikanihk ēsa. Jewak okimāwak namwāc ohci-pīhtikwēwak namōya ē-nohtē-wīhpācihocik, ayisk ē‑kanātisi-isihcikēcik wiya ē‑wī-mīcisocik miyāskākēwi-wīhkohtowinihk.
[29] ēkwa Pilate kī‑pē-wayawītotawēw ēkwa kakwēcimēw ēsa, “tānisi ē‑itwēyēk, kīkway cī ē‑māyi-tōtahk awa nāpēw?”
[30] ōmisi itēwak ēsa, “kīspin namwāc ohci-ma-māyinikēw, namwāc nika-pē-itohtāmātinān.”
[31] Pilate itēw ēsa, “ēkosi māka, kiyawāw otinihk ēkwa wiyasiwātihk kiyawāw kiwiyasiwēwiniwāhk ohci.” ōmisi itēwak, “namōya nipakitinamākawinān awiyak kita-nipahāyāhk.”
[32] kī‑ihkin kita-tipipayik ēsa Jesus kā‑kī-itwēt tānisi ē‑wī-isi-nipit.
[33] Pilate ēsa kī‑pīhtikwēw kīhtwām okimāwikamikohk ēkwa kī‑tēpwātēw Jesusa kita-pēsīmiht ēkwa itēw, “kiya cī Jewak okihci-ōkimāmiwāwa?”
[34] Jesus ēsa ōmisi itēw, “kiya cī kititēyihtamowin ōma kā‑kakwēcimiyan, ahpō cī ē‑kī-pēhtawacik kotakak ē‑ācimicik?”
[35] Pilate itēw, “niya cī Jew ē‑itēyimiyan? kiya aniki kitiyinīmak mīna kihci-ayamihēwiyiniwak kā‑pakitinamawicik. kīkway kā‑kī-tōtaman?”
[36] Jesus ōmisi itēw ēsa, “nitōkimāwiwin namōya ōta ohci askiy. kīspin ōta ohci nitōkimāwiwin ēkosi ōki kā‑pimitisahocik nika-kī-nōtinikēstamākwak ēkāya kita-otinicik Jewikimāwa. nitōkimāwiwin namōya ōta ohci askiy!”
[37] Pilate itēw, “ēkosi cī ōma kiya ē‑kihci-okimāwiyan?” Jesus ōmisi kā‑itāt ēsa, “kiya ōma kā‑itwēyan ē‑kihci-okimāwiyān. ōta askīhk nikī-pē-itohtān, ēkwa nikī-nihtāwikin pēyak kīkway ohci: kita-wīhtamān tāpwēwin. awiyak kā‑ayāt tāpwēwin ninatohtāk.”
[38] “kīkway māka anima tāpwēwin?” kā‑itwēt ēsa Pilate. ēkosi ōma ē‑kī-itwēt Pilate kī‑ati-wayawīw, ayisiyiniwa ē‑itāt ēsa, “namwāc kīkway nimiskēn kita-ohci-misihot awa nāpēw.
[39] māka kiyawāw ē‑itastēk kitisīhcikēwiniwāw, kipakitinamātināwāw māna pēyak kipahwākan tāpitawi kā‑miyāskākēwi-wīhkohkēyēk. kinitawēyihtēnāwāw cī kita-pakitinamātakok awa okihci-ōkimāmiwāwa Jewak?”
[40] kī‑tēpwēwak ayisiyiniwak ē‑itwēcik ēsa, “namōya ēwako, māka Barabbas.” (ēwakoni ōhi okimotiska.)