[1] Сонъ Асанынъ ерине онынъ огълу Ехошафат падиша олды. О, Исраильге къаршы турмакъ ичюн, къавийлешти.
[2] Ехошафат Ехуданынъ эписи пекитильген шеэрлеринде озь аскерлерини къойды ве Ехуда топрагъында ве бабасы Аса запт эткен Эфраим шеэрлеринде къаравул отрядларыны къойды.
[3] Ехошафат бабасы Давутнынъ эски ёлларынен юргени ичюн, РАББИ онен эди. Ехошафат Баал путларына табынмады
[4] ве бабасынынъ Алласыны къыдырды, Онынъ эмирлерине коре яшады. Исраиллилернинъ япкъанларыны исе о япмады.
[5] РАББИ Ехошафатнынъ падишалыгъыны пекитти. Ехудалыларнынъ эписи онъа бахшышлар бере эди, ве Ехошафатнынъ зенгинлиги ве шурети буюк олды.
[6] РАББИнинъ ёлунда юрген Ехошафатнынъ юреги юксельди, ве Ехошафат Ехудадан ибадет тёпелерини ве Ашера путуна табынма диреклерини ёкъ этмеге девам этти.
[7] Озь падишалыгъынынъ учюнджи йылында Ехошафат озь башлыкъларыны Бен-Хаил, Овадья, Зекъарья, Нетанэл ве Микъаяны Ехуда шеэрлеринде халкъны огретмеге ёллады.
[8] Оларнен берабер де левийлилерни: Шемая, Нетанья, Зевадья, Асаэл, Шемирамот, Ехонатан, Адонья, Товьяху ве Тов-Адоньяны ёллады. Оларнен берабер руханийлер Элишама ве Ехорамны да ёллады.
[9] Олар халкъны огрете эдилер, ве оларнынъ къолларында РАББИнинъ Къанун Китабы бар эди. Олар Ехуданынъ шеэр-шеэринден юрип, халкъны огрете эдилер.
[10] Ехуданынъ этрафындаки падишалыкъларнынъ эписинде РАББИден пек къоркъа эдилер, шунынъ ичюн Ехошафатнен дженк этмей эдилер.
[11] Фелестинлилер Ехошафаткъа бахшышлар кетире эдилер ве салымны кумюшнен тёлей эдилер. Араплар биле онъа къой-эчкилерни: 7,700 баш къочкъар ве 7,700 текени кетире эдилер.
[12] Ехошафат кет-кете пек кучьлю олды. О, Ехудада къалелер ве аш сакъламакъ ичюн шеэрлер къурды.
[13] Ехуданынъ шеэрлеринде онынъ пек чокъ байлыгъы бар эди, Ерусалимде исе онынъ джесаретли къараманлары, аскерлери бар эди.
[14] Оларнынъ джедвели, къоранталарына коре, булар эди: Ехуданынъ бинъбашылары: башлыкъ Аднах ве онынъ 300,000 джесюр аскери;
[15] ондан сонъ башлыкъ Ехоханан ве онынъ 280,000 аскери;
[16] ондан сонъ озюни РАББИге багъышлагъан Зикрийнинъ огълу Амасья ве онынъ 200,000 джесюр аскери.
[17] Биньямин къабилесинден джесюр аскер Эльяда ве онынъ яй ве къалкъаннен силялангъан 200,000 аскери.
[18] Ондан сонъ Ехозавад ве онынъ 180,000 силялангъан аскери.
[19] Бу аскерлер падишагъа хызмет эте эдилер. Олар падиша бутюн Ехудадаки пекитильген шеэрлерде къойгъан аскерлеринден гъайры эдилер.