[1] Mɛlɛkɛ ye ɲɛnamaya baji jira ne la, a bɛ yɛrɛn i ko krisital. A bɔtɔ don Ala ni Sagaden ka masasigilan na,
[2] ka woyo dugu fɛrɛkɛnɛ cɛmancɛ la. Ɲɛnamaya jiri bɛ o ba fan fila la. A den bɛ kari siɲɛ tan ni fila san kɔnɔ. Kalo o kalo a bɛ den. O jiri furaw bɛ siyaw kɛnɛya.
[3] Danga tɛna kɛ tun fewu. Ala ni Sagaden ka masasigilan na kɛ o dugu kɔnɔ. A ka jɔnw na a bato.
[4] U na a ɲɛda ye, a tɔgɔ na kɛ u tenw na.
[5] Su tɛna ko tun. U mago tɛna kɛ lanpa la tun, wala tile, katuguni Matigi Ala yɛrɛ na kɛnɛ bɔ u ye. U na kɛ masaw ye badaa-badaa.
[6] O kɔ, a y'a fɔ ne ye ko: «Nin kumaw ye kuma jɛlenw ye, kuma sɛbɛw don. Ko minnu bɛna kɛ sɔɔni, kiraw niw ka Matigi Ala, o ye a ka mɛlɛkɛ ci ka na o kow jira a ka jɔnw la.»
[7] «A filɛ, ne bɛ na sɔɔni. Min bɛ nin kitabu kiraya kumaw mara, o ye dubaden ye.»
[8] Ne Yuhana ye o kow mɛn ka u ye. Ne ye u mɛn ka u ye minkɛ, mɛlɛkɛ min ye o kow jira ne la, ne ye n'bin o sen kɔrɔ, ne tun b'a fɛ k'a bato.
[9] A y'a fɔ ko ne kana o kɛ, ko a ye ne jɔnɲɔgɔn ye, ani minnu bɛ nin kitabu kumaw mara, ko ne ka Ala bato.
[10] O kɔ, a y'a fɔ ne ye ko: «I kana nin kitabu kiraya kuma datugu, katuguni a waati surunyara.
[11] Min ye tilenbali ye, o ka to a ka tilenbaliya la. Min nɔgɔlen don, o ka to a ka nɔgɔlenya la. Min tilennen don, o ka to a ka tilennenya la. Min ka senu, o ka to a ka senumaya la.»
[12] «A filɛ, ne bɛ na sɔɔni. Ne ka sara fɛnw bɛ ne bolo, walisa ne ka mɔgɔw bɛɛ kelen-kelen sara ka kɛɲɛ ni u ka kɛwalew ye.
[13] Ne ye Alifa ni Omega ye, fɔlɔ ni kosa, daminɛ ni laban.»
[14] Minnu bɛ u ka finiw ko walisa u ka se ka ɲɛnamaya jiriden dɔ sɔrɔ, ka don o dugu daw fɛ, olu ye dubadenw de ye.
[15] Nka wuluw bɛ kɛnɛma, ani subaaw ni jatɔw ni mɔgɔ fagalaw ni bolibatobaaw ani nkalon ka di minnu bɛɛ ye ani minnu bɛɛ bɛ nkalon tigɛ.
[16] «Ne Yesu ye ne ka mɛlɛkɛ ci ka taa o kow seereya kɛ aw ye egilisiw kɔnɔ. Ne ye Dawuda dili ni a bɔnsɔn ye, ani kɛnɛbɔda dolo manamanatɔ.»
[17] Ni Senu ni kɔɲɔmuso b'a fɔ ko: «Na!» Min b'a mɛn, o k'a fɔ fana ko: «Na!» Minnɔgɔ bɛ min na, o ka na. Min b'a fɛ, o ka ɲɛnamaya ji min gansan.
[18] Minnu bɛ nin kitabu kiraya kumaw mɛn, ne bɛ nin kuma fɔ olu bɛɛ ye ko: «Ni mɔgɔ min ye dɔ fara o kumaw kan, tɔɔrɔ ko minnu sɛbɛnnen bɛ nin kitabu la, Ala na olu fara o tigi ta kan.
[19] Ni mɔgɔ min ye dɔ bɔ nin kitabu kiraya kumaw la, Ala na o tigi niyɔrɔ bɔ ɲɛnamaya jiri ni dugu senuma la, olu minnu ko sɛbɛnnen bɛ nin kitabu la.»
[20] Min bɛ nin kow seereya kɛ, o ko: «ɔwɔ, ne bɛ na sɔɔni.» Amiina, i ka na, Matigi Yesu.
[21] Matigi Yesu ka nɛɛma ka kɛ aw bɛɛ fɛ. Amiina.