[1] O kɔ, ne ye taamashyɛn wɛrɛ ye sankolo la, o ka bon, dakabana ko don. Laban tɔɔrɔ koba wolonwula bɛ mɛlɛkɛ wolonwula minnu bolo, olu bɛ Ala ka diminya ko dafa.
[2] O kɔ, ne ye bajiba ye, i n'a fɔ wɛrɛ ni tasuma kolonsolen. Minnu ye se sɔrɔ wara ni a ja ani a tɔgɔ nimɔrɔ kan, ne ye olu fana jɔlen ye wɛrɛ baji kan. Ala ka nkɔniw bɛ u bolo.
[3] U bɛ Ala ka baaraden Musa ka tanuli dɔnkili da ani Sagaden ka dɔnkili ko: «Matigi Ala, Sebaayabɛɛtigi, i ka ko kɛtaw ka bon, kabakow don! Siyaw bɛɛ ka Masakɛ, i ka siraw tilennen don. U ye tiɲɛ ye.
[4] Matigi, jɔni tɛna siran i ɲɛ ka i tɔgɔ bonya? K'a masɔrɔ i kelenpe ka senu. Siyaw bɛɛ bɛ na ka i bato, katuguni i ka kɛwale tilennenw jirala.»
[5] O kɔ, ne ye filɛli kɛ ka Ala ka seereya finiso senuma da yɛlɛlen ye sankolo la.
[6] Tɔɔrɔ koba wolonwula bɛ mɛlɛkɛ wolonwula minnu bolo, olu bɔra Alabatosoba kɔnɔ. Lenfu fini saniyalen manamanatɔ bɛ u kan na. Sanu cɛsirilan bɛ u disi la.
[7] Fɛn ɲɛnama naani la kelen ye sanu jifilen wolonwula di mɛlɛkɛ wolonwula ma, Ala min ɲɛnama bɛ to badaa-badaa, u falen bɛ ni o ka diminya ye.
[8] Alabatosoba fara Ala ni a ka sebaaya nɔɔrɔ sisi la. Mɔgɔ si ma se ka don Alabatosoba kɔnɔ, sani o tɔɔrɔ koba wolonwula ka kɛ ka dafa, olu minnu tun bɛ o mɛlɛkɛ wolonwula bolo.