[1] O kɔ, Paul taara Dɛrbɛ ni Lisitre. Dannabaa dɔ tun bɛ yen, o tɔgɔ ko Timote. A ba tun ye Yahutu dannabaa dɔ ye, a fa tun ye Grɛki ye.
[2] Lisitre ni Ikonɛ balimaw tun bɛ a tɔgɔ ɲuman fɔ.
[3] Paul tun b'a fɛ Timote ka taa u fɛ. A ye Timote boloko o jamana Yahutuw kosɔn, katuguni u bɛɛ tun y'a dɔn ko a fa tun ye Grɛki ye.
[4] U tɛmɛnna dugu minnu bɛɛ fɛ, cidenw ni cɛkɔrɔbaw ye ko minnu latigɛ Jerusalɛm, u tun bɛ olu fɔ dannabaaw ye ko u ka o ciw mara.
[5] Egilisiw mɔgɔw tun bɛ sabati dannaya la. Dɔw tun bɛ fara u kan don o don.
[6] U ye Friji ni Galasi jamanaw cɛtigɛ, katuguni Ni Senu tun ye u bali ka Ala ka kuma fɔ Asi jamana la.
[7] U sera Misi da fɛ tuma min na, u tun b'a fɛ ka taa Bitini jamana la, nka Yesu Ni ma sɔn u ka taa yen.
[8] U tɛmɛnna Misi kɛrɛ fɛ ka se Troas.
[9] O su fɛ Paul ye jiralifɛn dɔ ye. A ye Masedwanɛ cɛ dɔ ye, o jɔlen tun bɛ ka a deli ko: «Na Masedwanɛ jamana la ka an dɛmɛ.»
[10] O jiralifɛn yelen kɔ Paul fɛ, an y'an labɛn o yɔrɔnin kelen ka taa Masedwanɛ. An y'a dɔn ko Ala ye an wele ka taa Kibaru Duman fɔ o jamana mɔgɔw ye.
[11] An donna kurun dɔ kɔnɔ Troas ka sin Samotrase ma. O dugusajɛ an sera Nɛapolis.
[12] An bɔra yen ka taa Filipe, Masedwanɛ jamana fan kelen duguba dɔ don. Romɛkaw ka dugu tun don. An ye tile dama dɔ kɛ o dugu kɔnɔ.
[13] Lafiɲɛ don na, an bɔra dugu kɔnɔ ka taa ba da la, an tun bɛ miiri ko an na Ala deli yɔrɔ dɔ sɔrɔ yen. Muso dɔw lajɛlen tun bɛ yen, an ye an sigi ka kuma olu fɛ.
[14] Muso dɔ tun bɛ yen min bɔra Tiyatirɛ, o tɔgɔ ko Lidi. Lomaasa fini feerebaa tun don. A tun bɛ Ala bato. Ale de ye an ka kuma lamɛn. Matigi y'a dusu dayɛlɛ, fo a y'a tulo majɔ Paul ka kuma la.
[15] A ni a so mɔgɔw batiselen kɔ, a ye an deli, a ko: «Ni aw bɛ ne jate dannabaa ye Matigi la, a' ye na jigin ne ka so.» A ye an karaba fo an sɔnna.
[16] An taatɔ Ala deli yɔrɔ la, an ni jɔnmuso dɔ bɛnna. Jinɛ yelikɛla tun b'a la, a makɛw tun bɛ wari caman sɔrɔ a ka filɛli la.
[17] A tugura an ni Paul nɔfɛ ka to ka pɛrɛn ko: «Nin cɛw ye Ala Kɔrɔtalenba ka jɔnw ye. U bɛ kisili cogo fɔ aw ye.»
[18] A tora ka o kɛ tile caman kɔnɔ. Paul sɛgɛnnen, a y'i yɛlɛma k'a fɔ jinɛ ye ko: «Ne b'a fɔ i ye Yesu Krisita tɔgɔ la, bɔ a la.» Jinɛ bɔra o yɔrɔnin kelen.
[19] O jɔnmuso makɛw y'a ye ko u tɛ wari sɔrɔ a ka filɛli la minkɛ, u ye Paul ni Silasi minɛ ka olu sama ka taa n'u ye kiritigɛlaw ɲɛ kɔrɔ fɛrɛkɛnɛ la.
[20] U ye u jɔ kiritigɛlaw ɲɛ kɔrɔ k'a fɔ ko: «Nin cɛw bɛ an ka dugu ɲaami haali.
[21] Yahutuw don, u bɛ laada dɔw fɔ, a dagalen tɛ an Romɛkaw ye ka sɔn olu ma wala ka u kɛ.»
[22] Jama fana wulila u kama. Kiritigɛlaw ye Paul ni Silasi wɔrɔn k'a fɔ ko u ka gosi ni berew ye.
[23] U gosilen kɔ kosɛbɛ, u ye u bila kaso la k'a fɔ kasotigi ye ko a ka u kɔlɔsi kosɛbɛ.
[24] Kasotigi y'o mɛn minkɛ, a ye u bila kasobon dogodogo la ka u senw don jirikuru la.
[25] Dugutila fɛ Paul ni Silasi tun bɛ Ala deli ka Ala tanuli dɔnkiliw da. Kasolamɔgɔ tɔw tun bɛ u lamɛn.
[26] O yɔrɔnin kelen, dugukolo yɛrɛyɛrɛla kosɛbɛ. Kasobon jusigilanw yuguyugura, kasobon daw bɛɛ yɛlɛla. Kasolamɔgɔw bɛɛ ka jɔlɔkɔw fonina.
[27] Kasotigi kununna. A ye kasobon daw yɛlɛlen ye tuma min na, a ye a ka npan foosi ko a bɛ a yɛrɛ faga. A tun bɛ miiri ko kasolamɔgɔw bɛɛ bolila.
[28] Nka Paul pɛrɛnna ni kanba ye ko: «I kana foyi kɛ i yɛrɛ la, an bɛɛ bɛ yan.»
[29] O tuma la kasotigi ko u ka na ni yeelen ye. A bolila ka don kasobon kɔnɔ, a sirantɔ yɛrɛyɛrɛtɔ y'i bin Paul ni Silasi sen kɔrɔ.
[30] O kɔ, a ye u labɔ ka u ɲininka ko: «Cɛmɔgɔbaw, ne ka mun kɛ walisa ne ka kisi?»
[31] U y'a jaabi ko: «Da Matigi Yesu la, i na kisi, i ni i ka denbaya.»
[32] U ye Matigi ka kuma fɔ a ni a so mɔgɔw bɛɛ ye.
[33] Kasotigi taara n'u ye o su waati yɛrɛ la ka u jogindaw ko. O kɔ, a batisera, a ni a so mɔgɔw bɛɛ.
[34] A taara ni Paul ni Silasi ye a ka so ka dumuni di u ma. O kasotigi ni a ka denbaya bɛɛ ɲagalila, k'a masɔrɔ u dara Ala la.
[35] Dugu jɛlen kɔ, kiritigɛlaw ye garadiw ci kasotigi ma ko a ka o cɛw bila.
[36] Kasotigi nana k'a fɔ Paul ye ko: «Kiritigɛlaw ye ci bila k'a fɔ ko ne ka aw bila. Ayiwa, a' ye bɔ ka taa hɛrɛ la.»
[37] Nka Paul y'a fɔ u ye ko: «U ye an Romɛkaw gosi mɔgɔw bɛɛ ɲɛ na k'a sɔrɔ kiri ma tigɛ, o kɔ, u ye an bila kaso la. Sisan u b'a fɛ ka an bila dogo la wa? Ayi dɛrɛ! U yɛrɛw ka na ka an labɔ.»
[38] Garadiw taara ka o kuma fɔ kiritigɛlaw ye. Olu y'a mɛn ko Romɛkaw don minkɛ, u siranna.
[39] U nana yafa ɲini Paul ni Silasi fɛ, o kɔ, ka u labɔ ka u deli ko u ka bɔ o dugu kɔnɔ.
[40] U bɔlen kɔ kaso la, u taara Lidi ka so. U ye balimaw ye ka u laadi, o kɔ, u taara.