[1] عئسا بو سؤزلری دئیندن سونرا گؤزلرئنی گؤیه قالدیریب ددی: «آتا، ساعات یتئشئب. اوغلونا عئزّت ور کی، اوغول دا سنه عئزّت ورسئن.
[2] نجه کی، بوتون ائنسانلار اوستونه سن اونا حاکئمئیّت وردئن کی، اونا وردئیئن ائنسانلارین هامیسینا ابدی حیات ورسئن.
[3] و ابدی حیات بودور کی، اونلار سنی، تک حقئقی تاری و گؤندَ‌ردئیئن عئسا مسئحی تانیسینلار.
[4] من سنی یر اوزونده عئزّتلندئردئم؛ یرئنه یتئرمک اوچون منه تاپشیردیغین ائشی تاماملاماقلا.
[5] و ائندی سن ای آتا، اؤز یانیندا منی عئزّتلندئر. او عئزّتله کی، دونیا یارانمامیشدان سنئن یانیندا واریم ائدی.
[6] من سنئن آدینی بو دونیادان منه وردئیئن ائنسانلارا تانیتدیرمیشام. اونلار سنئن ائدئلر و سن اونلاری منه وردئن. و سنئن ددئکلرئندن ائطاعت ادئبلر.
[7] ائندی اونلار بئلئبلر کی، منه وردئکلرئنئن هامیسی سندندئر.
[8] چونکی منه وردئیئن سؤزلری اونلارا وردئم و اونلار قبول اتدئلر. سنئن یانیندان گلدئیئمی حقئقتن آنلادیلار و ائناندیلار کی، منی سن گؤندَ‌رئبسن.
[9] من اونلار اوچون یالواریرام. دونیا اوچون یوخ، منه وردئکلرئن اوچون یالواریرام. چونکی اونلار سنئندئرلر.
[10] منئم اولان هر شی سنئندئر و سنئن اولانلار دا منئمدئر. و من اونلاردا عئزّتلنمئشم.
[11] آرتیق من اوزون بئر مودّت اوچون بو دونیادا دیئلم، آمّا اونلار بو دونیادادیرلار. و من سنئن یانینا گلئرم. ای موقدّس آتا، منه وردئیئن آدینلا اونلاری حئفظ ات کی، اونلار دا بئزئم کئمی بئر اولسونلار.
[12] اونلارین یانیندا اولان زامان، منه وردئیئن آدینلا اونلاری حئفظ اتدئم و هلاکت اوغلوندان باشقا، اونلاردان هچ بئری هلاک اولمادی کی، موقدّس کئتابین ددئیی سؤز یرئنه یتئشسئن.
[13] آمّا ائندی سنه گلئرم و بو سؤزلری بو دونیادا ائکن دیئرم کی، منئم شادلیغیم اونلاردا کامئل اولسون.
[14] سنئن سؤزونو اونلارا وردئم و دونیا اونلاردان نئفرت اتدی. چونکی اونلار بو دونیادان دیئللر، نجه کی، من بو دونیادان دیئلم.
[15] یالوارمیرام کی، اونلاری بو دونیادان گؤتوره‌سن. یالواریرام کی، اونلاری شردن قورویاسان.
[16] نجه کی، من بو دونیادان دیئلم، اونلار دا بو دونیادان دیئللر.
[17] اونلاری حقئقتله موقدّس ات. حقئقت سنئن سؤزوندور.
[18] نجه کی، سن منی بو دونیایا گؤندَ‌ردئن، من ده اونلاری بو دونیایا گؤندَ‌رئرم.
[19] اونلار اوچون من اؤزومو وقف ادئرم کی، اونلار دا حقئقتن وقف اولونسونلار.
[20] فقط اونلار اوچون یالوارمیرام. اونلارین سؤزو ائله منه ائمان گتئره‌جک آداملار اوچون ده یالواریرام کی،
[21] هامیسی بئر اولسونلار. نجه کی، سن ای آتا منده‌سن و من سنده‌یم، اونلار دا بئزده اولسونلار کی، دونیا سنئن منی گؤندَردئیئنه ائنانسین.
[22] منه وردئیئن عئزّتی من اونلارا ورمئشم کی، بئز بئر اولدوغوموز کئمی، اونلار دا بئر اولسونلار.
[23] من اونلاردایام و سن منده‌سن کی، اونلار بئرلئکده کامئل اولسونلار و دونیا سنئن منی گؤندَردئینه و اونلاری سودئیئنه ائنانسین، نجه کی، منی سودئن.
[24] ای آتا، ائسته‌یئرم کی، منه وردئکلرئن ده من اولان یرده منئمله اولسونلار و سنئن منه وردئیئن عئزّتی گؤرسونلر. چونکی دونیانین یارانماسیندان منی سودئن.
[25] ای عادئل آتا، دونیا سنی دوغرودان تانیمادی، آمّا من سنی تانیدیم و بونلار دا آنلادیلار کی، سن منی گؤندَ‌رئبسن.
[26] سنئن آدینی اونلارا بئلدئردئم و بئلدئره‌جه‌یم. اله کی، منی سودئیئن او محبّت اونلاردا اولسون و من ده اونلاردا اولوم.»