[1] اوچونجو گون اِستِر ملکه پالتارینی گِیئندی و پادشاهین سارایینین ائچه‌ری حَیَطئنده پادشاهین اوتاغی ائله اوزبه اوز دایاندی. پادشاه اوتاغیندا اوزو قاپی‌یا طرف سلطنت تختئنده اوتورموشدو.
[2] پادشاه، ملکه اِستِرئن حَیَطده دایاندیغینی گؤرنده، اِستِر اونون گؤزونده لوطف قازاندی. پادشاه قیزیل عصاصینی اونا طرف اوزاتدی. اِستِر ده یاخینلاشیب عصانین اوجونا توخوندو.
[3] پادشاه اوندان سوروشدو: «ملکه اِستِر، سنه نه اولوب؟ ائسته‌یئن نه‌دئر؟ حتّا پادشاهلیغین یاریسی اولسا بِله، سنه ورئله‌جک.»
[4] اِستِر جاواب وردی: «اگر پادشاهین خوشونا گلسه، بو گون اونون اوچون قوردوغوم ضئیافته گلسئن، هامانی دا گتئرسئن.»
[5] پادشاه امر وردی: «هامانی تِز بورایا گتئرئن، اِستِرئن سؤزونو یرئنه یتئرَک!» پادشاهلا هامان اِستِرئن قوردوغو ضئیافته گلدئلر.
[6] شرابلارینی ائچَنده پادشاه اِستِردن سوروشدو: «آرزون نه‌دئر؟ دِه، سنه ورئله‌جک! ائسته‌یئن نه‌دئر؟ حتّا اگر پادشاهلیغین یاریسی اولسا بله، ادئله‌جکدئر.»
[7] اِستِر جاواب وردی: «آرزو-ائسته‌یئم بودور:
[8] اگر پادشاهین گؤزونده لوطف تاپمیشام و منئم آرزو-ائسته‌یئمی یرئنه یتئرمک پادشاها خوش گؤرونور، قوی پادشاهلا هامان اونلار اوچون قوراجاغیم ضئیافته گلسئنلر. من ده صاباح پادشاهین سوآلینا جاواب وره‌رم.»
[9] او گون هامان شادلیقلا، گؤیلو خوش اورادان چیخدی، لاکئن سارای دروازاسیندا موردوکایین آیاغا قالخمادیغینی و حوضوروندا یرئندن بِله، تَرپَنمه‌دئیئنی گؤرنده موردوکایین ضئدّئنه قضبله دولدو.
[10] هامان اؤزونه حاکئم اولوب اِوئنه گتدی. آدام گؤندَ‌رئب دوستلارینی و آروادی زِرِشی چاغیرتدیردی.
[11] اونلارا جاه-جلاللا، چوخ اوغوللاریندان، پادشاهین نِچه دفه روتبه‌سئنی قالدیریب اونا آیری ریئسلردن و اعیانلاردان اوستون منصب ورمه‌سئندن دانیشدی.
[12] و بله ده ددی: «بلی، حتّا ملکه اِستِر ده قوردوغو ضئیافته مندن باشقا هچ کسی لایئق گؤرمه‌دی کی، پادشاهلا برابر اورایا گلسئن. صاباح دا او منی پادشاهلا برابر ضئیافته دعوت ادئب.
[13] آمّا من یهودی موردوکایی، سارای دروازاسیندا اوتوران گؤرنده، گؤزومده هر شی قئیمتدن دوشور.»
[14] آروادی زِرِش و بوتون دوستلاری بله ددئلر: «اَلّی قول‌آچ اوجالیغیندا بئر دار آغاجی دوزَلتدئر. سحر آچیلاندا دا پادشاها دِه کی، موردوکایی اوندان آسدیرسین و پادشاهلا ضئیافته شادلیقلا گت.» بو سؤز هامانین اوره‌یئنه یاتدی و دار آغاجی دوزَلتدئردی.