[1] اؤولادلاریم، بونلاری سئزه یازیرام کی، گوناه اتمه‌یه‌سئنئز. اگر بئری گوناها باتسا بله، آتانین یانیندا شفاعت اده‌نئمئز وار، یعنی صالح اولان عئسا مسئح.
[2] او اؤزو، گوناهلاریمیزی باغیشلادان قورباندیر؛ آنجاق تک بئزئم گوناهلاریمیزی یوخ، بوتون دونیانین گوناهلارینی باغیشلادان.
[3] اونو تانیدیغیمیزی بوندان بئلئرئک کی، اونون امرلرئنی یرئنه یتئرئرئک.
[4] هرکس کی، «اونو تانی‌ییرام» دیئر، آمّا اونون امرلرئنی یرئنه یتئرمئر، او یالانچی‌دیر و اوندا دوغرولوق یوخدور.
[5] لاکئن هرکس کی، اونون سؤزونو یرئنه یتئرئر، تاری محبّتی اوندا حقئقتن کامئل اولوب. بوندان بئلئرئک کی، اونداییق.
[6] هرکس کی، اوندا یاشادیغینی ائدّئعا ادئر، او دا گرک عئسانین رفتار اتدئیی کئمی رفتار اتسئن.
[7] عزئزلر، سئزه تزه بئر حؤکم یازمیرام؛ قدئم حؤکمو یازیرام کی، باشلانیشدان بری اونا مالئک ائدئنئز. قدئم حؤکم باشلانیشدان بری او سؤزدور کی، اونو اشئتدئنئز.
[8] گئنه ده، سئزه تزه بئر حؤکم یازیرام؛ بونون دوغرو اولدوغو هم مسئحده، هم ده سئزده گؤرونور، چونکی قارانلیق کچئر و حقئقی نور ائندئدن پارلاییر.
[9] هرکس کی، نوردا اولدوغونو دیئر، لاکئن قارداشیندان نئفرت ادئر، ائندئیه کئمی قارانلیقدادیر.
[10] قارداشینی سِوَن نوردا یاشاییر و اوندا بودره‌دن بئر شی یوخدور.
[11] آمّا قارداشیندان نئفرت ادن قارانلیقدادیر و قارانلیقدا گزئر؛ هارایا گتدئیئنی بئلمئر، چونکی قارانلیق اونون گؤزلرئنی کور ادئب.
[12] ای اؤولادلار، سئزه یازیرام، چونکی اونون آدینین خاطئرئنه گوناهلارینیز باغیشلانیب.
[13] آتالار، سئزه یازیرام، چونکی باشلانیشدان بری وار اولانی تانی‌ییرسینیز. ای جاوان اوغلانلار، سئزه یازیرام، چونکی شرئره قالئب گلدئنئز، اوشاقلار، سئزه یازیرام، چونکی آتانی تانی‌ییرسینیز.
[14] ای آتالار، سئزه یازدیم، چونکی باشلانیشدان اولانی تانی‌ییرسینیز. جاوان اوغلانلار، سئزه یازدیم، چونکی گوجلوسونوز و تارینین کلامی سئزده یاشاییر. شرئره ده قالئب گلدئنئز.
[15] دونیانی و دونیادا اولان شیلری سِومه‌‌یئن. دونیانی سِوَن آدامدا آتانین محبّتی یوخدور.
[16] چونکی دونیادا اولان هر شی، ائنسانین جئسمانی طبئعتئنئن هوسلری، گؤزلرئن هوسلری، و دونیانین تکبّورو آتادان یوخ، دونیاداندیر.
[17] دونیا و اونون هوسلری کچئر، لاکئن تارینین ائسته‌یئنی یرئنه یتئرن ابده کئمی قالار.
[18] ای اوشاقلار، آخیر زاماندیر. و اشئتدئیئنئز کئمی، مسئحئن ضئدّئنه اولان گلئر. اله ائندی ده، بئر چوخلو مسئحه ضئدّ اولانلار گلئبلر. بوندان بئلئرئک کی، آخیر زاماندیر.
[19] اونلار بئزئم آرامیزدان چیخدیلار، آمّا بئزدن دیئلدئلر. اگر بئزدن اولسایدیلار، بئزئمله قالاردیلار. آمّا اونلار چیخدیلار کی، هچ بئرئنئن بئزدن اولماماسی بئلئنسئن.
[20] آمّا سئز موقدّس اولان طرفئندن مسح اولونوبسونوز و هر شیی بئلئرسئنئز.
[21] من سئزه اونا گؤره یازمادیم کی، حقئقتی بئلمئرسئنئز. اونا گؤره یازدیم کی، حقئقتی بئلئرسئنئز، هچ یالان دا حقئقتدن دیئل.
[22] اگر عئسانین مسئح اولدوغونو ائنکار ادن یالانچی دیئل، بس یالانچی کئمدئر؟ مسئحه ضئدّ اولان اودور کی، آتا و اوغولو ائنکار ادئر.
[23] اوغولو ائنکار ادن هرکس آتادان دا محرومدور. لاکئن هرکس کی، اوغولا اولان ائمانینی ائقرار اتسه، آتا دا اونوندور.
[24] قوی باشلانیشدان بری اشئتدئیئنئز سئزده قالسین. اگر باشلانیشدان بری اشئتدئیئنئز سئزده قالسا، سئز ده اوغول و آتادا قالارسینیز.
[25] و اونون بئزه وعده وردئیی بودور، یعنی ابدی حیات.
[26] بونلاری سئزی یولدان چیخاردانلار باره‌سئنده سئزه یازدیم.
[27] سئزه گلئنجه، اوندان آلدیغینیز مسح سئزده قالیر و احتئیاجینیز یوخدور کی، کئمسه سئزه تعلئم ورسئن. لاکئن نجه کی، همن او مسح هر شیئن حاقّیندا سئزه تعلئم ورئر و یالان یوخ، دوغرودور دا، نجه کی، او سئزه تعلئم ورئب، اوندا قالین.
[28] ائندی اؤولادلار، اوندا یاشایین کی، او ظوهور ادنده یقئنئمئز اولسون و او گلنده اونون قاباغیندا اوتانمایاق.
[29] اگر اونون صالح اولدوغونو بئلئرسئنئز، بئلئن کی، دوغرو اولانی یرئنه یتئرن هرکس اوندان دوغولوب.