[1] بوتلره تقدئم اولونان قوربانلار حاقّیندا؛ بئلئرئک کی، هامیمیز علم صاحئبی‌یئک. علم تکبّور گتئرر، لاکئن محبّت بئنا ادر.
[2] اگر کئمسه دوشونور کی، بئر شی بئلئر، او حله لازیم اولان قدر بئلمئر.
[3] آمّا کئم تارینی سوئر، او آدام تارینین طرفئندن تانینیر.
[4] بله‌جه، بوتلره تقدئم اولونان شیلرئن یمه‌سی باره‌ده؛ بئلئرئک کی، بوت اصلئنده دونیادا هچ بئر شیدئر و واحئد تاریدان باشقا تاری یوخدور.
[5] حتّا اگر گؤیده و یا یرده تاری چاغیریلانلار اولسا دا، نجه کی، حقئقتن بئر چوخ تاریلار و ربلر وار-
[6] بئزئم اوچون بئر تاری وار، یعنی آتا کی، هر شی اونداندیر و بئز اونون اوچون واریق. و بئر ربّئمئز وار یعنی عئسا مسئح کی، هر شی اونون واسئطه‌‌سی‌ائله‌دئر و بئز اونون واسئطه‌سی‌ائله واریق.
[7] آمّا هامیدا بو علم یوخدور؛ بعضئلری ائندئیه‌جک بوتلره اله آلیشیبلار کی، یدئکلری زامان اونون بوته تقدئم اولوندوغونو دوشونورلر و وئجدانلاری ضعئف اولدوغوندان نجئس اولور.
[8] یمک بئزی تارییا مقبول اتمز. یمه‌سَک، اَسکئیئمئز اولماز، یِسَک ده، بئر شی آرتیرماریق.
[9] آمّا احتئیاط ادئن کی، بو آزادلیغینیز ضعئف اولانلاری یره ییخماسین.
[10] چونکی اگر ضعئف وئجدانلی بئر آدام گؤرسه کی، سن بو علمه صاحئب اولان حالدا، بوتخانادا سوفره‌یه اوتوروبسان، مگر جسارت آلماز کی، بوتلره تقدئم اولونان یمکلردن یسئن؟
[11] و سنئن علمئنئن نتئجه‌سئنده وئجدانی ضعئف اولان هلاک اولور؛ او قارداش کی، مسئح اونون خاطئری اوچون اؤلدو.
[12] بله‌جه، اؤز قارداشلارینیزین ضئدّئنه گوناه اِتمکله و اونلارین ضعئف وئجدانلارینی یارالاماقلا، سئز، مسئحئن ضئدّئنه گوناه اِدئرسئنئز.
[13] بونا گؤره، اگر یمک قارداشیمین یره ییخیلماسینا سبب اولور، من داها ات اصلا یمه‌رم کی، قارداشیمی ییخماییم.