[1] Fariseonacaw Jesusarojj jac’achasipjjäna, ley yatichirinacampi cuna, qhitinacatejj Jerusalén marcat purinipcäna ucanacampi.
[2] Ucanacasti Jesusan yakhep discipulonacaparojj amparanacap jan jarekasisa mank’er uñjasinjja jisc’achapjjänwa, mank’añataquejj jan amparanacapjja yatichäwinacarjam jarekasipjjatap laycu.
[3] (Fariseonacampi takpach judionacampejj awquinacapan sarnakäwinacaparuw phokhapjje, janïr mank’casina walja cuti amparanacap jarekasisa.
[4] Khathut cutt’anisinjja janiw mank’apquiti, sarnakäwinacaparjama amparanac janïr jarekascasajja. Walja ucar uñtasit sarnakäwinacaparaquiw utji judionac taypinjja; ucanacsti sum phokhapjje, umañ vasonacsa jarisa, chatunacsa, metalat lurat phuqhunacsa, uqhamarac iquiñanacapsa).
[5] Ucatpï fariseonacampi ley yatichirinacampejj Jesusar jisct’apjjänjja: --¿Cunatsa discipulonacamajj nayra awquinacasan sarnakäwinacaparjama jan phokhapjje? ¿Cunatarac mank’añataquisti amparanacap jan jarekasipjjesti? --sasa.
[6] Jesusasti jupanacarojj sänwa: --Isaías profetajj chekwa arsüna jumanacan pä amtañan jakëpjjatamat khanañchasajja: ‘Aca jakenacajj lacampiquiw yupaychapjjetu, ucampis chuymanacapajj nayatjja jayancasquiwa.
[7] Inamayaquiw nayar yupaychatapajja, yatichäwinacapajj jaken amtäwipaquiwa’ sasa.
[8] Jumanacajj Diosan camachi arunacapjja apanucupjjtawa, jakenacan sarnakäwinacapar phokhañataqui. [Chatunacsa, vasonacsa jaripjjtawa, uqhamarac cunayman yakha ucar uñtasit sarnakäwinacwa phokhapjjtajja.]
[9] Jesusasti sascaquïnwa: --Sarnakäwinacamar phokhañataquejja Diosan camachipjja mä tokeruw apanucupjjtajja.
[10] Moisesasti sänwa: ‘Awquimaru taycamaru jach’añcham.’ ‘Qhititejj awquipar taycapar maldicinejja, jiwayatäpan’ sasa.
[11] Ucampis jumanacajj sapjjtawa: ‘Mä jakejj awquipar taycapar jan yanapañ laycojj sascaspawa: Janiw yanapquirismati, take cunajjas corbänar tucutäjjewa’ sasa. (Ucajj sañ muni: Diosar catuyatäjjewa).
[12] Uqham lurasajja, jumanacajj uca jakerojj janiw awquipar taycaparojj yanapayapctati.
[13] Uqhamatwa jumanacajj Diosan arupjja inach’usaru tucuyapjjtajja, nayra awquinacan sarnakäwinacap laycu, wawanacans wawanacapar jaytasa. Uqhamaracwa cunayman yakha ucar uñtasitanacsa phokhapjjtajja.
[14] Jesusasti wasitat jakenacar jawsasinjja sänwa: --Taken ist’apjjeta, ucatsti amuyt’asipjjaraquim.
[15] Janiw cunas ankat mantasinjja jakerojj k’añuchcaspati, jan ucasti cunatï jaken chuymapat mistojja, ucaw jakerojj k’añuchi. [
[16] Jumanacatejj ist’añ munapjjstajja, ist’apjjam.]
[17] Jakenac jaytanucjjasinjja Jesusajj utaruw manti. Ucatsti discipulonacapajj juparuw jisct’apjjäna uca uñtasitjjata.
[18] Jesusasti jupanacarojj sänwa: --¿Jumanacamppachat jan amuyapcta? Janipuniw cunas ankat mantasinjja jakerojj k’añuchcaspati.
[19] Ucajj janiw chuymapar mantquiti, jan ucasti puracaparuquiw manti, ucatsti mistjjaraquiwa --sasa. Uqham sasinjja Jesusajj take mank’asa k’omätap yatiyäna.
[20] Ucatsti sascaquïnwa: --Cunatejj jaken chuymapat mistquis ucaw jakerojj k’añuchejja.
[21] Jaken chuymapatsti jan wali amuyunacaw mistu: wachoka juch luraña, jake jiwayaña,
[22] lunthatasiña, jaken yänacap munaña, luraña, sallkjasiña, k’añu luraña, envidiasiña, c’ari arunac apnakaña, jach’a jach’a tucuña, jan amuyunjam sarnakaña.
[23] Take ucanacaw chuymatjja mistu, ucaraquiw jakerojj k’añuchi.
[24] Jesusasti ucat mistusinjja, Tiro uqhamarac Sidón tokenacaruw sarjjäna. Mä utaru purisinsti Jesusajj janiw qhitin yatiñaps muncänti, ucampis janiw jakenacatjja imantasiñjamäcänti.
[25] Mä warmisti Jesusan ucancatap ist’asinjja, jupan ucaruw jutäna, phuchapajj ñankha ajayun mantatätap laycu. Purinisinsti Jesusan nayrakataparuw quillt’asi.
[26] Uca warmejj Sirofenicia sat yakha marcanquirïnwa. Jupasti phuchapat ñankha ajayu alissuñapataquiw Jesusar achict’asïna.
[27] Jesusasti juparojj sänwa: --Nayrakata wawanacay mank’t’asipjjpan. Janiw waquisquiti wawanacat t’ant’a apakasin jisc’a anunacar churañajja --sasa.
[28] Warmisti Jesusarojj saraquïnwa: --Uqhamaw Tata, ucampis jisc’a anunacamppachaw mesa mankhat suyasinjja, mank’apjje, wawanacas jalaktayquis uca mank’a t’unanacjja --sasa.
[29] Jesusasti ucjjarojj sänwa: --Walic sasctajja. Sarjjam; ñankha ajayojj phuchamat mistuwayjjewa --sasa.
[30] Warmisti utapar purisinjja, phuchaparojj iquiñancasquir jicjjati. Ñankha ajayusti jupatjja mistuwayjjataynawa.
[31] Jesusasti Tiro marcat mistjjasinjja Sidón chekwa pasawayäna, uqhamarac Decápolis oraken utjiri marcanac cheka. Ucatsti Galilea kota jac’aruw purïna.
[32] Jesusan ucarusti mä okar amutu chacharuw irpanipjjäna. Ucatsti achict’asipjjänwa, amparapampi uca jakjjar lokjjatt’añapataqui.
[33] Jesusasti uca jakerojj jakenaca taypitjja yakhawjaru irpakasinwa ampar luc’anampi jinchupat lokantäna. Thusjjatasinsti lajjrat llamct’araquïna.
[34] Ucatsti alajjpach tok uñtasinwa wal llaquirt’asi, saraquïnwa: “¡Efata!” sasa. (Ucajj: ¡Jist’artam! sañ muni.)
[35] Ucspachaw okaran jinchunacapajj jist’artäna. Lajjrat c’umaraptasinsti sum parljjaraquïna.
[36] Jesusasti jakenacarojj ewjjt’änwa jan qhitirus ucjjat arsupjjañapataqui. Uqham ewjjt’catpachasa, jupanacajj yakhanacarojj parlasipcaquïnwa.
[37] Jupanacasti wali muspharapjjäna, sapjjaraquïnwa: --Take cuns sumpun luri. Okaranacamppacharuw c’umaraptayi; amutunacarusti arsuyaraquiwa --sasa.