[1] Samarañ uru pasatatjja, semana kallta uru willjtanipanwa, María Magdalenajja maynïri Mariampi sepultur uñjiri sarapjjäna.
[2] Ucatsti acatjamatwa orak qhathatejj sartäna, alajjpachata mä angelan sarakanitap laycu. Sepulturar jac’achasisinjja uca jach’a kaljja apakänwa, ucatsti uca patjjaruraquiw kont’asïna.
[3] Jupasti wali c’ajquirïnwa, isipasa qhunjam jank’oraquïnwa.
[4] Uc uñjasinjja soldadonacajj ajjsarañat wal qhathatipjjäna, jiwatäpcaspas uqhamaraquiw ucawjan liwisipjjäna.
[5] Angelasti warminacarojj saraquïnwa: “Jan ajjsarapjjamti, nayajj yattwa ch’accatatäcäns uca Jesusar thakasipcatama.
[6] Janiw acancjjeti, jan ucasti jactawayjjewa, cunjämtejj siscäna uqhama. Jutapjjam, uñjapjjaraquim cawquirutejj imatäcän uca.
[7] Janc’aqui sarapjjam, jupan discipulonacaparusti sapjjaraquim: ‘Jiwatanac taypitjja jacatatjjataynawa’ sasa. Jichhasti sarasquiwa Galilearu jumanacats nayra, ucanwa juparojj uñjapjjäta. Ucaquiw nayan jumanacar sañajj waquisi” sasa.
[8] Warminacasti uc ist’asinjja janc’aquiw sepulturat sarjjapjjäna, wali sustjata ucampis cusisitaraqui. Jalapjjaraquïnwa cunatejj pascatayna uca discipulonacapar yatiyañataqui.
[9] Uqhamäquïpanwa Jesusajj jupanacarojj uñstaraquïna, ucatsti aruntaraquïnwa. Jupanacasti cayunacapar khomantasinwa Jesusataquejj quillt’asipjjäna.
[10] Jupasti sänwa: --Jan ajjsarapjjamti, yatiyanipjjam jilanacajjaru, sapjjaraquim: ‘Galilean jumanacampejj jiquisï’ sasa.
[11] Warminac marcar sarapjjañapcamajja, soldadonacat mayninacajj marcar sarasinjja sacerdotenacan jilïrinacaparojj yatiyapjjaraquïnwa cunatejj pascataynas ucanaca.
[12] Uca sacerdotenacan jilïrinacapasti chuymani jilïrinacan ucaruw sarapjjaraquïna jupanacampi arust’asiñataqui, ucatwa walja kollke churapjjäna soldadonacarojja.
[13] Jupanacarusti sapjjaraquïnwa: “Jumanacajj sapjjätawa jakenacarojja: ‘Discipulonacapaw Jesusan jiwat janchipjja lunthatjjapjjetu nanacan iquisipcañajjcama’ sasa.
[14] Jach’a marca apnakeritejj uc yatin ucapachajja, nanacaw jupampejj parlasipcä jan cunsa jumanacar camachañapataqui” sasa.
[15] Soldadonacasti kollke catokasinjja sarjjapjjänwa cuntejj luram satäcänsa uc luriri. Ucsti judionacajj jichhacamaw uqham sasipqui.
[16] Uca tunca mayan discipulonacasti Galilearuw sarjjapjjäna, cawqui kollurutejj Jesusajj: “Sarapjjam” sawaycatayna ucaru.
[17] Jesusar uñjasinjja quillt’asipjjänwa, yakhepanacasti pächasipjjaraquïnwa.
[18] Jesusasti jupanacar jac’achasisinjja siwa: “Nayar churatawa take munañanïñajja alajjpachansa, acapachansa.
[19] Take acapachanquir jakenacar yatiyir sarapjjam, nayar arquir tucuyapjjam; bautisapjjam Dios Awquina, Dios Yokana, Dios Kollan Ajayun sutiparu.
[20] Yatichapjjaraquim take cuntejj nayajj jumanacar yatichapcsma ucanaca phokhaña. Amtasipjjapunim, nayajj sapürupuniw jumanacampïscta acapachan tucusiñapcama.”