[1] Pascua fiestataquisti sojjtüruquïpanwa Jesusajj Betaniaru saräna, Lazarojj jaccäna ucaru, cawquïrirutejj Jesusajj jiwatat jactayäna ucaru.
[2] Ucansti Jesusataquejj mä mank’äwi waquichapjjäna; Martajj sirvïnwa, Lazarosti Jesusamp chicaw mayninacamp mesan mank’äna.
[3] Mariajj apanïnwa, niya quimsa patac gramo nardocamac lurat k’apquir kolla. Uca kollasti wali jila alanïnwa, ucampisti Jesusan cayuparuw warjjatäna, ucatsti ñic’utapampiraquiw phisqhuräna. Uca k’apquir kollasti utpacharuw k’aphipampejj phokhantäna.
[4] Ucatsti Simonan yokapa Judas Iscariotejja, Jesusan tunca payani discipulonacapatjja maynirïnwa, cawquïritejj Jesusaru aljantañapäcän uquïristi, sänwa:
[5] --Aca k’apquiri kollajja ¿cunatsa jan aljasqui mä quimsa patac denario kollkerojja ucat pobrenacaru yanapt’añatakejja? --sasa.
[6] Ucampis Judasajj janiw pobrenacat qhuyapt’asiñat ucjj arscänti jan ucasti jupajj lunthatänwa, jupaw kollke bolsjja catüna, uca bolsatsti lunthatasirïnwa.
[7] Jesusasti ucjjarojj sänwa: --Uqhamaquïpan, acjja imascänwa nayan imäwejj urutaqui.
[8] Jumanac taypinjj pobrenacajj utjapuniniwa, ucampis nayajj jumanac taypinjja janiw wiñayäcäti --sasa.
[9] Judionacatjja waljaniw yatipjjäna Jesusajj Betaniancatapa, ucatsti sarapjjänwa Jesusar uñjiri, uqhamarac Lazarorusa, cawquïrirutejj Jesusajj jiwatanac taypita jactaycäna ucaru.
[10] Ucatsti sacerdotenacan jilïrinacapajj amtapjjaraquïnwa Lazarompir cuna jiwayaña,
[11] jupa laycu walja judionacan Jesusar iyawsañatac t’akaktapjjatap laycu.
[12] Walja jakenacaw Jerusalenan Pascua fiestaru sarapjjäna; yatipjjaraquïnwa khepürojj Jesusan marcaru puriñapa.
[13] Ucatsti layminac qhuchurasin mistupjjäna Jesusar catokañataqui; aqham sasaw jach’at art’apjjäna: --¡Jach’achatäpan Diosaru! ¡Bendecitäpan Tatitun sutiparu jutirejja! ¡Bendecitäpan Israelan Reyipajja! --sasa.
[14] Jesusajj mä asno jicjjatäna, ucaruw konjjatawayäna, cunjämtï Kellkatanjj sisqui uqhamarjama:
[15] “Jan ajjsaramti, Sión marca; uñtam, Reyimaw juti, mä asnor konjjatata.”
[16] Kalltanjja discipulonacapajj acanacjja janiw amuyt’apcänti. Cunapachatejj Jesusajj alajjpachar aptatäjjän ucqhaquiw amtapjjäna take acanacajj jupjjat kellkatäscatapa, uqhamarjama phokhasiscataparaqui.
[17] Jesusajj Lazaror jawscäna imäwipat mistuniñapataqui, ucatsti jiwatanac taypit jactayiri uñjiri jakenacajj, yatiyapjjänwa yakhanacaru cuntejj uñjapcatayna uca.
[18] Ucatwa jakenacajj Jesusar jicjjatiri mistupjjäna, unañchanac, milagronacsa luratapa yatisina.
[19] Ucatsti fariseonacajj jupanac puraw sapjjäna: --Jumanacajj uñj-jjapjjtawa, janiw cuns lurañjamäcjjeti. Takeniraquiw jupar arcjjapjje --sasa.
[20] Jerusalenaru fiesta urunacajj yupaychir sarapcatayna; uca jakenacatjja maynïrinacajj griegonacänwa.
[21] Aca griegonacasti, Galilea Betsaidanquir Feliperuw jicjjatapjjäna, ucatsti achict’asipjjänwa: --Tata, Jesusaruw uñjañ munapjjta --sasa.
[22] Felipesti sarasina Andresaruw yatiyäna, ucatsti paninpachaw Jesusaru yatiyir sarapjjaraquïna.
[23] Jesusasti ucjjarojj sänwa: --Jaken Yokapan jach’añchatäñap horasajj purinjjewa.
[24] Khanacwa sapjjsma, mä trigo granotejj jan orakeru jalantcchejja ucat janirac jiwcchi ucajja, mä sap granoquïsquiwa, ucampis jiwchi ucajja waljaw achjje.
[25] Qhititejj jacañaparu munchi ucajja apt’asiniwa, ucampis qhititejj aca oraken jacaña uñiscchi ucajja, wiñay jacañanïniwa.
[26] Maynitejj sirviñ munchitu ucajja arquitpan, cawquinccätejj nayajj ucancaraquiniw sirvirejjajja. Qhititejj sirvquitani ucarojj Awquejjajj jach’añchaniwa --sasa.
[27] “Jichhajj wali llact’atätwa; ¿camsäsa? ¿‘Awqui, khespiyita cunatejj jichhajj pasquitani ucat’ säti? Uqhamäñapataquipuniw nayajj jutta.
[28] Awquiy, sutimajj jach’añchatäpan. Ucatsti mä aruw alajjpachat ist’asïna: Nayajj jach’añchawayjjtwa, wasitampis jach’añchascaquïwa” sasa.
[29] Ucancapcäna uca jakenacajj uc ist’asin sapjjänwa: Mä khejjokhejjowa, sasa. Mayninacasti sapjjaraquïnwa: --Mä angelaw juparu parljjaypacha --sasa.
[30] Ucatsti Jesusajj jupanacarojj saraquïnwa: --Janiw nayïpanti aca arojj ist’asqui, jan ucasti jumanaquïpanwa.
[31] Jichhapï horasajja acapachasti taripatäniwa, jichharaquiwa acapacha apnakerejj jaksutäni.
[32] Cunapachatejj nayajj oraket aptatäjjä ucqhajja, takeniruw apthapëjja naya pachparu --sasa.
[33] Acampejj cunjämtejj jiwcani uc sañwa munäna.
[34] Ucjjarojj jakenacajj sapjjaraquïnwa: --Nanacajj ist’apjjtwa ley libronacajj toke: ‘Cristojj wiñayataquiw jacani’ siri. ¿Cunjämsa jumajj sista: ‘Jaken Yokapajj aptatäñapawa’ sasajja? ¿Qhitis uca Jaken Yokapajja? --sasa.
[35] Jesusasti ucjjarojj sänwa: --Mä juc’a urunacaquiw khanajj jumanac taypincani. Sarnakapjjamay khana utjquipanjja, jan ch’amacamp catjayasiñataqui; ch’amacan sarnakeristi janiw cawcsaru saratapsa yatquiti.
[36] Iyawsapjjam khanaru utjquipanjja, khananquir jakenacäpjjañamataqui --sasa. Ucanac arsusinjja, Jesusajj sarawayjjänwa ucatsti jupanacatjja imantasjjaraquïnwa.
[37] Jesusajj walja milagronaca jupanac nayrakatana lurcchïna ucasa, janiw judionacajj juparojj iyawsapcänti.
[38] Acajj phokhasiñapapunïnwa cunjämtejj Isaías profetajj kellkcäna uqhamaru: “Tata, ¿qhitis arunacasaru iyawsejja? ¿Qhitirus Tatitojj ch’amapa uñacht’ayi?” sasa.
[39] Uqhamasti janiw iyawsirjamäpcänti; Isaías profetajj kellkaraquïnwa aqham sasa:
[40] “Diosajj jupanacarojj juyqhwa tucuyi chuymanacapsa kalarayaraquiwa, jan nayranacapampi uñjapjjañapataqui, ni chuymanacapampis amuyt’apjjañapataqui; jan cuttanisinsa nayampi kollatäñapataqui.”
[41] Isaiasasti acjja arsünwa Jesusan jach’a cancañapa uñjatap laycu, jupataracwa parläna.
[42] Uqhampachas walja judionacaw Jesusar iyawsapjjäna, yakhep jilïri wali aytat jakenacasa. Ucampis jupanacajj janiw jakenacan ist’cata arsupcänti, fariseonacar ajjsaratanacap laycu, sinagogat jan jaksuyasiñataqui.
[43] Diosamp jach’añchayasiñat sipansa, jakenacampiw jach’añchayasiñ munapjjäna.
[44] Jesusajj jach’at arsusin jupanacarojj sänwa: “Qhititejj nayar iyawsquitu ucajja, janiw nayaruquiti iyawsquitu, jan ucasti qhitanquitu uca Awquejjaruw iyawsaraqui.
[45] Qhititejj nayar uñjquitojja, qhitanquitu ucarojj uñjaraquiwa.
[46] Nayajj khanätwa, qhitinacatejj nayaru iyawsquitu ucanacajja jan ch’amacan sarnakapjjañapataquiw acapacharojj jutta.
[47] Ucampis qhititejj arunacajj ist’ejja, ucatsti janirac ucarjama lurqui ucarojja janiw juchañchcti. Nayajj janiw acapacharu juchañchiri jutcti, jan ucasti khespiyiriw jutta.
[48] Qhititejj nayaru jisc’achquitu, ucatsti janiraqui arunacajjarjam lurquiti, ucan juchañchiripajj utj-jjewa. Cawquïr arunactejj nayajj arsctjja ucanacaw juchañchascani juparu khepa urunjja.
[49] Janiw naya pachpatacti parlctjja; qhitanquitu uca Awquejjaw situ cuntejj arsuñajjäqui, yatichañajjäcaraqui ucjja.
[50] Nayajj yattwa Awquejjan camachipajja wiñay jacañataquiwa. Uqhamwa nayajj sista cunjämtejj Awquejjajj sisquitu uqhamarjama.”