[1] Tatitux taqi akapachan jakir jaqinakaruw uñch'ukiski. Ukat aka yatiyäwi arunak Hadrac, Damasco markanakatak arsu, uka kipkaraki Israelan ayllunakapatakisa,
[2] Hamat sata uka jak'a markatakisa Tiro, Sidón uka qamir markanakatakis arsuraki.
[3] Tiro markax jark'aqasiñatakix jach'a uyu pirqanak lurasïna, uka markax qurimpi, qullqimp ñiq'ir uñtat qullucht'äna.
[4] Ukampis Tatitux taqpach aparani, qamir yänakapsa qutaruw warantani, marksti q'ala nakhantayarakini.
[5] “Uk uñjasasti, Ascalón markax walpun mulljasini. Gaza markasti ukhamarakiw t'aqhisini, Ecrón markan suyt'äwipax jan kunatakïniwa. ¡Gaza markax jan reyiniw qhiparani, Ascalón markasti jan jaqinakanirakiw uñjasini!
[6] Asdod markansti kunayman jaqinakaw jakani, ukhamat filisteonakan jach'a jach'a tukutapxa jisk'achjä.
[7] Lakanakapatsti manq'apki uka wilararpach aychsa apaqäwa, laka ch'akhanakapatsa jan manq'añ manq'anak apaqarakïwa. Ukampis uka jaqinakatxa yaqhipanakax nayatak qhipaririw utjani; Judá markankiriw tukupxani, Ecrón markasti jebuseo jaqinakjamäpxarakiniwa.
[8] Nayasti wakicht'atakïskäwa, nayankirinakar arxatañataki, khitisay aka chiqa jutaskpan ukanakata. T'aqhisiyirix janiw wasitat t'aqhisiykxaniti, jichhasti naya pachpaw markaxar uñjaskta.”
[9] ¡Sión marka, walpun kusisim! ¡Jerusalén marka, kusisiñat q'uchum! Reyimaw juman ukar jutaski, chiqa kankañani, taqi atipt'añ churiri, mä jisk'a asno qallur qunxatata.
[10] Jupaw Israelan nuwasiñ carronakap t'unjani, Jerusalenan caballonakapsa tukjani, nuwasïwin mich'inak antutt'añanaksa p'akirani. Markanak taypin sumañkañ yatiyani, maysa qutata, maysa qutakamaw apnaqani, Éufrates jawirat qalltasina uraq tukuykamaw marka sarayani.
[11] Tatitux akham siwa: “Jerusalén, nayaw jumampi mä arust'äwi lurta, ukasti wila tuqi luratawa; ukat jumanakan katuntat jaqinakamxa, kawkïri jan umani phuch'unkapkitï jichhax ukat apsü,
[12] ukatsti suyt'äwi chuyman phuqt'ataw kutt'anxapxani, suma uyuchrantat markanakaru. Sapxsmawa, nayasti taqi t'aqhisitanakamatxa aski waxt'äwinakampi phuqt'apxäma, kusisiñanakxa pä ukkhampi katuqapxarakïta.
[13] Judá markankirinakampi, Israel markankirinakampiw Grecia markankirinakarux tukjä.”
[14] Tatituw markapxarux uñacht'ayasini; mich'inakap lliju llijunakjam antutt'ani. Dios Tatituw trompet phust'ani, aynach jach'a thayamp chikaw sarantarakini.
[15] Taqi ch'amani Tatituw jupankirinakarux imani, jupanakasti q'urawt'anita qalanaksa takichasipxaniwa, uñisirinakaparusti jiwarayapxaniwa; atipjäwipat kusisiñatakisti mä jach'a manq'äwi lurapxani. Umjasiñkamaw umapxani; qirunakap vinompi phuqharapxani, kunjämtix altarar warxatañatak wilax qirunakar phuqharatäki ukhama.
[16] Khä urunwa, Tatitu Diosapax markaparu qhispiyani, mä oveja tamarjama, jupankirinakasti kipka markapan k'ajapxani, pillun uchat suma qalanakapar uñtata.
[17] ¡Kunja sumakïkani uka markaxa! Trigopasa, vinopas walja utjatap laykusti, yuqall wawanakasasa, imill wawanakasas sumapuniw jilarapxani.