[1] Ukatsti yaqha unañchäwimp uñjta. Nuwasïwir sarir pusi carronak pä bronce qullunak taypit uñstasinkir uñjarakta.
[2] Nayrïr carrorusti wila caballonakaw qatatïna; payïrirusti ch'iyar caballonaka;
[3] kimsïrirusti janq'u caballonaka, pusïrirusti ch'ikhu caballonakarakiw qatatïna.
[4] Nayamp parlkäna uka angelaruw jiskt'arakta: “Tata, ¿kun sañsa muni akaxa?” sasa.
[5] Angelasti sarakituwa: “Aka carronakax pusi tuqinkir alaxpach thayanakawa, akapach apnaqir Tatitun nayraqatapat taqi akapach muytiriw mistunipxi.
[6] Ch'iyar caballonakan qatatit carrox amstankir markaruw sari; janq'u caballonakan qatatit carrosti, jalanta tuqinkir markaruw sari; ch'ikhu caballonakan qatatit carrosti aynachankir markaruw sararaki” sasa.
[7] Ch'ikhu caballonakasti jank'akiw aka uraqpach muytir misttanipxäna. Angelasti caballonakar sänwa: “¡Taqi aka uraqpach muytanipxam!” sasa. Caballonakasti jaysapxarakïnwa.
[8] Uka qhipatsti, angelax nayaruw art'anitu: “Uñtam, amstankir markar sarapkis ukanakaru, uka markan Tatitun q'apisitap t'akuyapxani” sasa.
[9] Tatituw aka yatiyäwi churitu:
[10] “Babilonia markar apanukutäsin kutt'anirinak taypit qullqi, quri apthapim: Heldai, Tobías, Jedaías, jupanakata. Ukatsti, ukürpach Sofonías chachan Josías yuqapan utapar saram.
[11] Apthapkäta uka qullqimpita, qurimpitsti pillunak luram, ukatsti Josué jilïr sacerdoten p'iqipxarux mä pillu ucham, Josadacan yuqaparu.
[12] Juparusti sarakim: ‘Taqi ch'amani Tatitux siwa: Machaqa Külli sutini chachatxa, kipka saphinakapat mistusin Tatitun utap wasitat sayt'ayani.
[13] Tatitun utap wasitat sayt'ayasinsti, mä reyjamaw jach'añchäwinak katuqani. Reyi qunuñapar qunt'asisaw apnaqani, qunuñap thiyapanxa sacerdotew qunt'asirakini, jupanak taypinsti sumankañaw utjani.
[14] Pillunakasti Tatitun utapan qhiparani, Heldai, Tobías, Jedaías, Josías ukanakar jach'añchas amtasiñataki.’ ”
[15] Jumanakatix arunakaxar sum ist'apxäta ukapachaxa, jayanakatpach Tatitun utap wasitat sayt'ayañ yanapt'irix jutapxani; ukkhaw jumanakax taqi ch'amani Tatitun nayaru khithanitapxa yatipxäta.