[1] Ukhamasti, jichhax khitinakatix Cristo Jesusamp mayakïpki jupanakatakix janiw kuna juchañchäwis utjkiti.
[2] Cristo Jesús tuqi jakañ churir Ajayun munañapax juchan munañapampita, jiwañampit qhispiyistu.
[3] Diosax kuntix Moisesan kamachipax jan lurkän uk phuqhawayi, jaqin janchi kankañanïtap laykuw ukax jan luraskänti: Diosasti jupan mä sapa Wawap khithani, juchan jaqjam janchi kankañani, jucha layku jiwiri, ukhamat janchi kankañanïkasin juchar t'unjañataki.
[4] Uksti jiwasanakan kamachirjam phuqhañatakiw lurawayi, jiwasanakax janiw janchin munañaparjam jakxtanti, jan ukasti Ajayun munañaparjamaw jakxtan.
[5] Khitinakatix janchin munañaparjam jakapki ukanakax, ukham jakaskañatak llakisisipki; ukampis khitinakatix Ajayun munañaparjam jakapki ukanakax, Ajayun jakañxat llakisipxi.
[6] Janchin munañaparjam lurañax jiwañaruw puriyi; Ajayun munañap lurañasti, wiñay jakañampiru, sumankañampiruw puriyi.
[7] Janchin munañaparjam luririnakax Diosan uñisirinakapawa, jupanakax janiw Diosan kamachipar munapkiti, janirakiw arunakaparus jaysapkaspati.
[8] Ukatpï janchin munañaparjam jakirinakax Diosar jan kusisiyapkaspatixa.
[9] Ukampis jumanakax janiw janchin munañaparjam jakxapxtati, jan ukasti, Ajayun munañaparjamaw jakxapxtaxa, Diosan Ajayupaw jumanakan jakxi. Khititix Criston jan Ajayupanïki ukanakax janiw Cristonkirïkiti.
[10] Cristotix jumanakan jakchixa, Ajayux jakarakiwa, Diosaw aski jaqinakar tukuyapxtam, janchix jucha layku jiwañatak satäskpasa.
[11] Jesusar jaktayki uka Ajayux jumanakan jaki, uka pachpa Cristor jaktayir Ajayux jiwir janchinakamarux machaq jakañ churani, jumananakan jakki uka Diosan Ajayup tuqi.
[12] Ukhamasti jilatanaka, jiwasanakan mä lurañasaw utji, ukasti janiw janchin munañaparjam jakañäkiti.
[13] Jumanakatix janchin munañanakaparjam jakasipkätaxa, jiwapxätawa; ukampis jumanakatix Ajay tuqi janchin munañanakapar jiwayapxätaxa, wiñay jakañanïpxätawa.
[14] Taqi khitinakatix Diosan Ajayupamp irpatäki ukanakax Diosan wawanakapawa.
[15] Jumanakax janiw t'aqhisiyat tukuyir ajayu katuqapktati axsarat sarnaqaskañataki, jan ukasti, Diosan wawanakapar tukuyir Ajayu katuqapxtaxa, uka Ajay tuqiw Diosarux jak'achastan: “Nayan Awkixa” sasa.
[16] Uka pachpa Ajayuw jiwasan ajayusampi mayachasisax Diosan wawanakapätas qhanañchi.
[17] Wawanakapätas laykux, Diosax arsuwaykän uka waxt'äwi katuqañäni, uksti Cristomp chikaw katuqañäni, jupamp chika t'aqhisitas laykux, qhapaq markapan jupampïxañasataki.
[18] Jichhür t'aqhisiñanakax janiw kunäkisa, Diosan qhapaq kankañap uñjkañän ukampi kikipaysna ukaxa.
[19] Akapachan taqpach jakirinakaw suyt'aski, kunürutix Diosan wawanakapätasax qhanañchatäkani uka.
[20] Kuna amtampitix akapachax luratäkäna ukax janiw phuqhaskiti, janiw akapachan munatap laykuti, jan ukasti Diosaw ukhamäñapatak wakichatayna; ukampis suyt'äwipax utjaskapunïnwa,
[21] t'aqhisiyatäñata, t'unjatäñat qhispiyatäñapataki, Diosan wawanakapan kusiskañ qhispiyasiñ jikxatañapataki.
[22] Jichhürkamaw taqi akapachan jakirinakax ayquski, wawachasir warmir uñtataw t'aqhisiski.
[23] Janiw akapach sapaki t'aqhiskiti, jan ukasti, jiwasaxa, Qullan Ajay nayraqat katuqirinakax t'aqhisiraktanwa. Jiwasanakax chuyma manqhisan t'aqhistan Diosan jiwasanakar wawanakapjam katuqatäñas uru suyt'asa, janchinakasax qhispiyat uñjaskani uka uru.
[24] Uka suyt'äwi utjatap laykuw qhispiyatätan. Ukampis uñjatäki uka suyt'äwix, janiw suyt'äwïkxiti, ¿khitirak niy uñjatäki uksti suyisti?
[25] Ukampis kuntix suyapktan uktix janïr uñjapxstanxa, llamp'u chuymampiw suyt'apxañasa.
[26] Ukhamarakiw Qullan Ajayux janchi kankañasan yanapistu. Jiwasanakax janiw wakiski ukhamarjam Diosat mayisiñ yatipktanti, ukampis pachpa Ajayuw jiwasanakat Diosar achikt'i, jan arskay ayquñanakampi.
[27] Chuymanakas uñantir Diosasti, kuntix Ajayux sañ munki uk yati, Ajayux Diosan munañaparjamaw qullan markapatak mayi.
[28] Diosan jupar munirinakatak taqi kunsa askïñapatak wakichatap yattan, amtataparjam jawsatäpki ukanakataki.
[29] Khitinakarutix Diosax nayratpach uñt'kän jupanakarux qalltatpach yaqhachawayi, Wawapan walja jilanak taypin jilïrïñapataki.
[30] Diosasti khitinakarutix qalltatpach ajlliski jupanakarux jawsarakiwa; jawsatanakaparusti, aski jaqinakat katuqi; aski jaqinakat katuqasasti, jupamp chikäñapatakiw qhapaq kankañapan ucharaki.
[31] ¿Kunat juk'ampirak sañänisti? ¡Diosatix jiwasanakampïchixa, janiw khitis saykatkistaspati!
[32] Diosasti pachpa Wawaparuw taqi jiwasanak laykux jiwar katuyi, ukhamasti, ¿kamisarak Wawapamp chika kunsa jan churkistaspasti?
[33] ¿Khitirak Diosan ajllitanakapar kuna jan walitsa irkataspasti? Diosaw jupanakarux aski jaqinakar tukuyi.
[34] ¿Khitirak jupanakar juchañchaspasti? Janiw khitisa, Cristo Jesusaw jiwawayi; jupaw jiwatat jaktawayi, jichhasti Diosan kupïxapan qunt'atäskiwa, jiwasanakatakiw mayiskaraki.
[35] ¿Khitirak Criston munasiñapat apaqistaspasti? ¿T'aqhisiñati, jan walt'añanakacha, arknaqatäñacha, manq'at awtjayasiñacha, isit jalstañacha, chijinkañacha, jiwayatäñacha?
[36] Kamisatix Qillqatan siski: “Juma laykuw jiwañar katuyat uñjasipxta; khariñ ovejanakarjamaw uñjapxitu” sasa.
[37] Taqi akanakansti atipjirinakat sipansa juk'amp atipjirinakätanwa, khititix jiwasar munkistu jupa tuqi.
[38] Ukat nayax amuyta, janiw kunas Diosan munasiñapat apaqkistaspati: jiwasa, jakañasa, angelanakasa, ajay ch'amanakasa, jichhasa, jutir urunakasa,
[39] alayankki ukasa, manqhankki ukasa, Diosan yaqha luratanakapasa. ¡Janipuniw kunas apaqkistaspati, Diosax Jesucristo Tatitus tuqi uñacht'aykistu uka munasiñapatxa!