[1] Jumasti mayninakar taripatam laykuxa, janiw jan juchanit uñt'atäkasmati, khitïskamsaya. Mayninakar taripasax jumapachaw juchañchjastaxa, jumax jupanakjamaw luraraktaxa.
[2] Ukampis yatipxtanwa, Diosax chiqa kankañarjamaw taripi, kunapachatix ukham luririnakar juchañchki ukkhaxa.
[3] Jumasti mayninakar taripasax jupanakjamaw luraraktaxa, jumax Diosan juchañchäwipat jaltirjam jan amuyasimti.
[4] Jumasti Diosan jan tukuskir munasiñapsa, walikiw sañapsa, llamp'uchasiñapsa janiw yäqktati, munasiñapan jupa tuqir kutikipstatamsa janiw amuyasktati.
[5] Ukampis jumax qala chuymanïtam layku, Diosar makhatañ jan munatam laykux, juma pachpaw mutuñ urutakix mutuyäwi katuqañatak wakichasisktaxa, kunapachatix Diosax chiqpach juchañchir uñstankani,
[6] ukat sapa maynir luräwipatjam churkan ukapacha.
[7] Diosax wiñay jakañ churani taqi khitinakatix Diosan markapa, chiqa kankañampi jan inakt'as thaqhirinakaruxa;
[8] ukampis kutkatasirinakaru, chiqa kankañ jan munirinakaru, ñanqha lurañarus walikiw sirinakarux q'apisiñampiw mutuyani.
[9] Jan wali luririnakatakix t'aqhisiña, llakisiñaw utjani, nayraqatax judionakataki, ukhamarak jan judiöpki ukanakatakisa.
[10] Ukampis Diosax aski luririnakarux qhapaq kankaña, jach'ar aptatäña, sumankañ churani, nayraqatax judionakaru, ukhamarak jan judiöpki ukanakarusa.
[11] Diosasti khuskhak taripani.
[12] Taqi khitinakatix Moisesan kamachip jan yatkas juch lurapki ukanakaxa, jan uka kamachimpikiw juchañchatäpxani; Moisesan kamachip yatkas juch luririnakasti, uka pachpa kamachimpi juchañchatäpxaniwa.
[13] Diosan nayraqatapansti, janiw kamachi ist'atapampik askïpkiti, jan ukasti uka kamachirjam phuqhirinakaw askixa.
[14] Jan judiöpki ukanakansti janiw kamachipax utjkiti, ukampis kuntix kamachix siski ukarjamaw lurasipki, kamachix jupanak pachpäkaspas ukhama,
[15] sarnaqatanakapampiw uñacht'ayapxi, chuymanakapan kamachin qillqatätapa. Pachpa chuymapaw qhanañchi, pachpa amuyunakaparakiw juchañchani, jan ukax arxatanisa,
[16] kunürutix Diosax taqinin jamasan luratanakap taripkan ukapacha, Cristo Jesús tuqi, nayax Diosan suma yatiyäwi arunakap yatiykta ukarjama.
[17] Jumasti “judío jaqït” sistawa, Moisesan kamachiparuw yäqtaxa, ukatsti Diosamat jach'a jach'arakiw tuktaxa.
[18] Jumax Diosan munañapsa uñt'tawa, uka kamachisti kunatix askïki uk ajlliñ jumarux yatichtam.
[19] Jumax juykhunakar irpirjamaw tuktaxa, ch'amakan sarnaqir qhanapjamaw tukuraktaxa;
[20] jan yatirinakarusti yatichirjamaw amuyastaxa, jan amuyt'irinakarus amuyt'ayirjamaraki, uka kamachin kunatix chiqäki yatiñäkaraki uk yatitam layku.
[21] Ukhamasti mayninakar yatichkasasti, ¿kunatarak juma pachpa jan yatichasktasti? Janiw lunthatasiñäkit sas yatichkasasti, ¿kunatarak lunthatasiskaktasti?
[22] Janiw wachuq juchan sarnaqätati sas yatichkasasti ¿kunatarak wachuq juchan sarnaqaskaktasti? Jumatix jaqin lurat diosanakar uñisisksta ukasti ¿kunatarak uka yaqha diosanakan utapat yänakap lunthatasiskaktasti?
[23] Jumax uka kamachit jach'achastaxa, ukampis uka kamachir jan jaysatamampiw Diosarux jisk'ar tukuytaxa.
[24] Ukatpï Qillqatanakax sixa: “Jan judiöpki uka jaqinakax jumanak laykuw Diosarux ñanqhachapxi” sasa.
[25] Chiqpachansa, Moisesan kamachipar phuqhiritakix circuncisión katuqañax askiwa; jan phuqhiritakisti janis circuncisión katuqkaspa ukhamawa.
[26] Ukampis, khititix circuncisión jan katuqkasin kamachirjam sarnaqkani ukaxa, circuncisión luräwi katuqirit uñt'atäniwa, janisay uka luräwi katuqkpan.
[27] Kamachir jaysir jaqix, janisay janchipan circuncisión luräwi katuqkpan, khititix kamachinïkasina, circuncisión luräwi katuqkasinsa jan phuqkan ukarux taripaniwa.
[28] Ukampis judío jaqït sañax janiw patxa chuymakïñapäkiti; circuncisión katuqañas janiw janchin circuncisión katuqañakïkiti.
[29] Jan ukasti chiqpach judío jaqïñax, taqi chuymampi iyawsañawa. Circuncisión katuqañasti chuymatäñapawa. Ukasti janiw kuna kamachitsa jutkiti, jan ukasti ajayutwa juti. Khititix ukhamäki ukax Diosampi katuqatawa, janiw jaqinakampiti.