[1] Marka apnaqirinakasti Jerusalén markan utt'asipxäna; ukxaru jilt'iri jaqinakasti suertet jaqupxäna, sapa tunka wila masi tamatxa mä wila masi taman Jerusalén qullan markar jakir sarañapataki, llätunk wila masi tamasti yaqha markanakan jakapxañapatakiraki.
[2] Ukatsti markachirinakax khitinakatix chuymapatjam Jerusalén markan jakañatak amtasipkäna ukanakatakix Diosat mayipxäna.
[3] Ukxarusti, sacerdotenakasa, levitanakasa, Tatitun utapan yanapasirinakasa, Salomonan uywatanakapat saraqir wawanakapasa, ukat ukxar utjir israelitanakasa Judá uraqin jakañatakiw utt'asipxarakïna, sapa maynisa markapana, uraqipanaraki. Jerusalenan jakapkän uka aytat jilïr irpirinakax akanakawa:
[4] Judá ayllunkir Ataías sat chacha, jupasti utapankirinakapampiw Jerusalenan jakäna. Jupan nayra awkinakapaxa: Ozías, Zacarías, Amarías, Sefatías, Mahalalel, Fares ukanakänwa.
[5] Maaseías chachan nayra awkinakapa: Baruc, Colhozé, Hazaías, Adías, Joiarib, Zacarías, Siloní, ukanaka.
[6] Fares chachat saraqirinakax pusi pataka suxta tunk kimsaqallquni chachanakaw Jerusalenan jakapxäna, taqi jupanakasti jan axsariri ch'amani chachanakäpxänwa.
[7] Benjamín ayllunkiritsti Salú chachaw Jerusalenan jakir qhiparäna, jupan nayra awkinakapax akanakänwa: Mesulam, Joed, Pedaías, Colaías, Maaseías, Itiel, Isaías, ukanaka;
[8] ukhamaraki Salú chachan Gabai, Salai jilanakapa. Taqpachanisti llätunka pataka pä tunka kimsaqallqunïnwa.
[9] Jupanakan jilïri sarayiripasti Zicrí chachan Joel yuqapänwa; Senuá chachan Judá sat yuqapasti, markana payïri jilïrïki ukänwa.
[10] Sacerdotenakatsti: Jedaías, Jaquín,
[11] ukhamarak Seraías. Jupan nayra awkinakapax Hilquías, Mesulam, Sadoc, Meraiot ukanakänwa, Ahitub chachasti Tatitun utapan jach'a jilïripänwa.
[12] Jupamp chikasti Tatitun utapan irnaqapkäna uka masinakapax, kimsaqallqu pataka pä tunka payanïnwa; Adaías sacerdotex uka markan jakarakïna. Jupan nayra awkinakapax akanakänwa: Jeroham, Pelalías, Amsí, Zacarías, Pashur, Malquías, ukanaka.
[13] Adaías chachan wila masinakapan jilïri sarayirinakapasti taqpachanix pä pataka pusi tunka payanïnwa; Amasai sacerdotex Jerusalenan jakarakïna, jupan nayra awkinakapaxa: Azarel, Ahzai, Mesilemot, Imer ukanakänwa.
[14] Jilanakapasti jan axsariri ch'amani chachanakäpxänwa, jupanakax pataka pä tunka kimsaqallqunïpxänwa, jilïri irpiripax Guedolim chachan Zabdiel yuqapänwa.
[15] Levitanakatsti, Semaías, jupan nayra awkinakapaxa: Hasub, Azricam, Hasabías, Binuy ukanakänwa;
[16] Sabtai, Jozabad ukanakax levitanakan jilïr sarayirinakapänwa, jupanakasti Tatitun utapat anqäxan lurañanak sarayapxäna.
[17] Matanías, jupasti quch'urinakan sarayiripänwa, jupax yupaychañ q'uchunak q'uchuyäna, Tatitur mayisiñäki ukkhax yuspagarañ luqtayarakïna; Mataniasan nayra awkinakapax: Micaías, Zabdí, Asaf ukanakänwa. Bacbuquías chachax, jilanakap taypit payïrïnwa; Abdá chachan nayra awkinakapax: Samúa, Galal, Jedutún ukanakänwa.
[18] Levitanakata Jerusalén qullan markan qhiparirinakasti, taqpachanix pä pataka kimsaqallq tunka pusinïnwa.
[19] Punku uñjirinakatsti: Acub, Talmón, ukhamarak wila masinakapampi, taqpachanisti pataka paqallq tunka payanïnwa.
[20] Ukat ukxar taqi israelitanakasa, sacerdotenakasa, levitanakasa, Judá uraqin utjir yaqha markanakan sapa maynis uraqipankam jakasxapxäna;
[21] Tatitun utapan luqtirinakasti Ófel chiqan utjasipxäna; jupanakan jilïr sarayirinakapax Sihá, Guispá ukanakänwa.
[22] Jerusalén markan jakir levitanakan jilïripasti Uzí chachänwa; jupan nayra awkinakapax: Baní, Hasabías, Matanías, Micaías, Asaf, ukanakänwa, jupanakarakiw Tatitun utapan q'uchuñanak sarayapxirïna,
[23] reyiw q'uchurinakan sapüru lurañanakapat arsurakitayna.
[24] Markachirinak taypit reyi nayraqatar uñstañataki uchatax Petahías chachänwa, jupasti Mesezabel, Zérah, Judá uka chachanakat saraqirïnwa.
[25] Judá ayllunkirinakat yaqhipanakax aka markanakan jakañatakiw utt'asipxäna: Quiriat-arbá, Dibón, Jecabseel,
[26] Josué, Moladá, Bet-pélet,
[27] Hasar-sual, Beerseba,
[28] Siclag, Meconá,
[29] En-rimón, Sorá, Jarmut,
[30] Zanóah, Adulam, Laquis, Azecá uka markanakana. Jupanakasti Beerseba uka chiqata, Hinom uka qhirwakamaw jakañatak utt'asipxäna.
[31] Benjamín ayllunkirinakasti: Gueba, Micmás, Aías, ukhamarak Betel jisk'a markanakapan jakañatak utt'asipxäna.
[32] Yaqhipanakasti: Anatot, Nob, Ananías,
[33] Hasor, Ramá, Guitaim,
[34] Hadid, Seboím, Nebalat,
[35] Lod, Onó uka markanakan utt'asipxäna, ukhamarak kunaymaninaka luririnakan qhirwapana.
[36] Ukxarusti yaqhip levitanakarux, Judá, Benjamín uka chiqanakaruw uraqi churapxäna.