[1] Nínive marka, jumar t'unjirix jutantaskiwa. ¡Soldadonakam tantachthapim! ¡Thakhi sum uñch'ukirakim! ¡Espadam apxarusim! ¡Walpun ch'amañcht'asim!
[2] Tatitux Jacobun jach'añchäwinakapa, Israelan jach'añchäwinakap wasitat kuttayxani, kunjamäkäntix yänakap janïra aparatäkäna, q'ara uva lawanakjam janïra jaytatäkän ukhama.
[3] Nuwasirinakapan jark'aqasiñanakapax wila samikamakiwa, soldadonakapan isinakapas wila samirakiwa. ¡Nuwantañatakisti jank'akïpxiwa! Nuwasir sarañ carronakapasti ninar uñtatawa; caballonakapas wal takisipxaraki.
[4] Carronakapax wali phiñasitäpkaspas ukhamaw marka thakhinakanjam jalnaqapxi, plazanakansa maysat maysa jalapxi, nina wiyanakar uñtata, lliju llijunakjamarakiw chhaqtawayapxi.
[5] Reyisti jilïri soldadonakaparuw jawsi, jupanakasti phuqhañatakix jalakamakiw ukkhar puripxi, nuwantañatakiw jach'a pirqanak wakichasipxi, ukampis pirqa patar mistkasin liwiqtanipxi.
[6] ¡Asiria marka, uñisirinakamaw markaman punkunakap t'unantanipxi! Markax soldadonakan phuqhantatawa, reyin utapansa taqiniw axsarañat khathatipxi.
[7] Reyin warmiparusti jayaruw katuntat apapxi; jupar luqtirinakas jupa chika apataw uñjasipxi, urpilar uñtataw walpun ayqupxi, chuymanakap jacht'asisaw liq'isipxaraki.
[8] Nínive markan utjirinakax taqiniw jaltxapxi, kunjämatix uma chakt'atax phallasin taqi tuqir jalixa ukhama. “¡Suyt'apxam! ¡Kuttanipxam!” sasaw art'apxaraki, ukampis janiw maynis kuttankiti.
[9] ¡Qullqsa, qursa, q'al lunthatsupxam! ¡Asiria markan qamir kankañapasti jan tukuskiriwa!
[10] T'unjata, ch'usa wasarar tukuyata, jachkañ lurjataw Nínive markax uñjasi. Chuymanakapas axsarañat tukusiwayxiwa, kayunakapas wal khathatiraki, taqinis ch'ama thayjtatkamakiwa, ajanunakapasti q'illuw tukuwayxi.
[11] Asiria markax mä qhuru leonar uñtatänwa: Uñisirinakaparux jan kunak jiwarayasin q'al tukjäna, yänakap katuntasisinsti jaqinakaparuw lakirpayarakïna. Janiw khitis uraqipar mantañatak ch'amanïkänti. Jichhasti, ¿kawkinkarak uka jach'a ch'amapasti? ¿Kawkinkarak uka qhuru soldadonakapasti?
[13] Taqi ch'amani Dios Tatitux siwa: “Akanktwa jumar saykatañataki; nuwasiñar sarir carronakamsa nakhantayäwa, jaqinakamarus q'al jiwarayä; lunthatasiñanakamsa q'al tukjarakï; yatiyirinakaman arunakapax janiw juk'ampi ist'askxaniti. Nayätwa Israel markan Diosapaxa, arsutaxsa phuqhapunïwa” sasa.