[1] Israel markan jilïrinakapa, jichhax ist'apxam, kunatix chiqäki, askïkaraki ukxa jumanakaxay yatipxañamächixa.
[2] Ukampis kunatix askïki ukxa uñisipxtawa, ñanqhäki uk munapxtaxa; markaxarux q'al lluch'supxtaxa, q'ara ch'akhak jaytapxtaxa.
[3] Markaxarux jakkirpach manq'antapxtaxa; janchipsa q'al lluch'supxtaxa, ch'akhanakapsa p'akirapxtawa; phayasiñ aychäkaspas ukham lurapxtaxa.
[4] Tatitur arnaqasipkäta uka urusti, jupax janiw ist'apkätamti. Ñanqhanak lurapxatanakam laykuxa, jumanakatxa imantasxaniwa.
[5] Profetanakan sallqjatap laykusti, markaxax pantjat thakhinakanjam saraski, khitinakatix jupanakar manq'ayki ukanakaruxa, uka profetanakax suman sarnaqasiñ yatiyi, manq'añ jan churki ukanakarusti “nuwantasiñäni” sapxarakiwa. Tatitusti uka profetanakarux siwa:
[6] “Jumanakax janiw kunanakatix luraskani ukanak uñjkxapxätati, janirakiw qhipa urunakan utjkani ukanakatsa parlkxapxätati.” Uka profetanakatakisti intix jalantxaniwa, urus ch'amakaw tukxarakini.
[7] Uñjäwinak uñjirinakasa, yatirinakasa wali p'inqachjataw uñjasipxani. Jupanakasti Tatitun jan ist'atäxasinxa, amukiw qhiparxapxani.
[8] Ukampis nayarux Tatitun ajayupawa, ch'amapampi, chiqa kankañampi, jan axsarañampi phuqt'itu, ukhamat Israel markaru Tatitur saykatatapata, jucha luratapatsa qhankatañaxataki.
[9] Israel markan jilïrinakapa, jichhax aka arunak ist'apxam, jumanakasti kunatix chiqäki ukxa uñisipxtawa, kunatix aski lurañäki uksa maysaruw q'iwipxtaxa.
[10] Tatitun Jerusalén markapsa jaqi jiwayañanakxaru, kunatix jan chiqäki ukanakxaruw sayt'ayapxtaxa.
[11] Kunatix chiqäki ukanak uñjirinakasa qullqi chilltayasipxi, sacerdotenakas qullqi laykukiw yatichapxi, profetanakasti profecía arunakapxa aljapxarakiwa; taqi akanakatxa Tatitux walikiw siskaspasa ukhama. Ukatsti sapxarakiwa: “Tatituw jiwasampïski, janiw kuna jan walis jiwasxar jutkaniti” sasa.
[12] Jumanakan juchanakam laykuw Tatitun Jerusalén markapax q'ala tukjata uñjasini, mayjaru willthapitarakïniwa, kawkhankkitix Tatitun utapax uka qullus quran qurantataw uñjasini.