[1] ¡Kunakïkani khitinakatix ikiñanakapansa jan walinakak amtapki ukanakatakixa, urutatanxipansti jupanakan munañanïpxatapatxa, uka jan wali amtatanakapxa phuqhapxapuniwa!
[2] Uraqinak munasax katuntasipxiwa; utanak munasas lunthatapxiwa. Utanirusa, utapankirinakarus wal t'aqhisiyasaw k'arimpi alisnukupxi.
[3] Ukat Tatitux saraki: “Jumanak tuqi nayan amtatanakaxax utjarakituwa. Jumanakarux mä jan walt'aña apayanipxäma, ukatsti janiw qhispipkätati, sinti aynacht'aña urunakätapatsti, janirakiw jach'a jach'a tukusas sarnaqkxapxätati.
[4] Khaya urunakansti jumanakat larusisaxa, jachañ q'uchunak q'uchupxani. Sapxarakïtamwa: ‘Q'ala tukjatapunïtanwa; jiwasax Tatitun markapätanwa, jichhax yaqhan amparapankxtanwa, janirakiw khiti jark'aqt'iris utjkiti; uraqinakasasti atipjirinakasar lakinuqatawa’ ” sasa.
[5] Ukat jichhax jumanakax Tatitun markapanxa, janiw mä jisk'a uraqsa katuqkxapxätati.
[6] Israelit jaqinaka, jumanakax janiw munapktati profetanakan uka jan wali yatiyäwinak parlañapxa. Janirakiw jaysañsa munapktati uka jan walinakan jumanakxar jutaskatapxa, ukat jupanakar jan ist'añ munapktati.
[7] Janiw Tatitux phiñasitäkiti sapxtawa, Tatitun luräwipax janiw ukhamäkiti sapxtawa. Khitinakatix askinak lurapki ukanakarux askinak churaraki sapxaraktawa.
[8] Jumanakax markaxatakiw sayt'asipxta, nuwasïwit kutt'anirinakarusa, uñisirinakamäkaspas ukham isinakap aparapxtaxa.
[9] Warminakarusti munat utanakapsa aparapxtawa, wawanakarusti kuna askinaktix nayax churkta ukanakatsa, wiñayatakiw jark'apxta.
[10] ¡Jichhax sartapxam! ¡Akat sarapxam! Aka chiqax janiw samarañatakïkiti; ñanqha lurañampi phuqhantatawa, ukat q'al tukjatarakïni.
[11] Maynitix k'ari arunak parlaspa, ukat sarakispa: “Vinompi yaqha umañanakampitix utjani ukkhakiw jutir urunakatxa sapxäma” sasa, jumanakax uka k'ari profetanakampix kusisitakïpxasmawa.
[12] Jacobun saraqirinakaparux taqpachaniruw tantacht'xä, Israel markat mä qawqha jilt'irinakarusti apthapxarakïwa. Ovejanakjam mayaru anthapxä, suma chhuxllanakas utjki ukkhanakaruw ananuqarakï; waljanïpkaspas ukham uxupxarakini.
[13] Tatituw jupanakatakix thakhi jist'arani, jupanakasti uka thakhinjam arkapxarakini, marka punku chiqaw mistuwayapxani. Tatitu reyipasti, jupanakan nayrap sararakini.