[1] Nayaw jach'a t'aqhisiñanak katuqta, Tatitun jach'a phiñasiñap tuqiw katuqarakta.
[2] Tatitux ch'amak tuqinakaruw irpitu, ch'amak thakhinakan sarnaqayitu,
[3] nayar mutuyañatakix sapa kutiw mayamp mayampi amparap ayti.
[4] Janchixsa q'ala chuymankipstayxi, ch'akhanakaxsa q'al t'unjaraki;
[5] nayarusti t'aqhisiñampi jachañanakampiw mä pirqampjam muyuntayitu;
[6] ch'amak tuqinakan utjayitu, nayra pachan jiwarapki ukanakar uñtata.
[7] Jan mistuñani pirqampiw muyuntayitu; jathi cadenanakamp chinuntasaw t'aqhisiyitu;
[8] yanap mayisa arnaqaskchïyäta ukasa, janiw mayisitaxarux ist'kituti;
[9] qala pirqampiw sarañaxar jark'antitu, ¡thakhinakaxsa maysaruw uñtayaraki!
[10] Tatitusti nayatakix mä imantasit leonjamänwa, manq'antañ munir osor uñtataraki.
[11] Thakhit maysaruw saranukuyitu, jisk'a jisk'a tukjitu, ¡jach'a axsarañampiw phuqhantarakitu!
[12] ¡Mich'inakap wakicht'asisasti, mich'imp wakt'ayañatakiw illapjitu!
[13] Tatitun antutt'ata mich'inakapaxa, chuyma manqharuw chhuqhuntitu.
[14] Jaqinakaxax taqiniw nayat larusipxitu; sapa kutis jupanakan larusiñakïtwa.
[15] Tatitux jachañanakampiw phuqhantitu; k'allk'u uma umañ churitu.
[16] Laka ch'akhanakaxsa uraqir liwnuqasaw williritu; laq'a jallq'ayarakitu.
[17] Sumankañas nayat jayarst'xiwa, janiw yatkxti kunäskchix kusisiñasa.
[18] Amuyatax Tatitut janjamakiw kuns katuqxäti.
[19] Llakisitanakaxsa, sapak sarnaqatanakaxsa, jachatanakaxsa, t'aqhisitanakaxsa amthapisiraktwa;
[20] ukanakat amthapisisasti, jan ch'amanjamaw uñjasirakta.
[21] Ukampis nayax may chuymaxan amtasiñ munta, ukaruw suyt'añ munarakta:
[22] Tatitun munasiñapax jan tukuskiriwa, khuyapayasiñapas jan pist'kiriwa.
[23] Sapärmanthiw machaqar tukuraki; ¡kunja jach'as Tatitun chiqapätapaxa!
[24] Naya pachpas sasiraktwa: “¡Nayatakix Tatitukiw taqi kunasa; ukatpï jupar iyawsaraktxa!” sasa.
[25] Tatitux jupar iyawsirinakatakix askiwa, jupar jak'achasipki ukanakatakisa.
[26] Tatitur llamp'u chuymamp suyt'añaw wakisi, jupaw jiwasar yanapt'ir jutaskani.
[27] Jaqix waynatpacha t'aqhisiñanak katuqañ yatiqañapa.
[28] Jaqix sapaki, amukirakiw qhiparañapa, Tatitux munañap lurañ munkani ukkhaxa;
[29] llamp'u chuymampiw uraqir alt'añapa, inampis kuna suyt'añas utjaskaspa;
[30] nuwantiriparux maysa ajanut nuwataxa, maysa ajanumppachat nuwayasiñapawa; jach'a ñanqhachäwinaksa katuqañaparakiwa.
[31] Tatitux janiw jiwasar wiñayatak apanukkistaniti.
[32] T'aqhisiykchi ukasa, jupax khuyapt'ayasirakiwa, munasiñapax sinti jach'apuniwa.
[33] Jupax janiw llakisiyañ munkapuniti, janirakiw jaqirus t'aqhisiyañ munkiti.
[34] Markankir katuntatanakar jan khuyapt'ayasis t'aqhisiyañasa;
[35] Tatitun nayraqatapan jaqin jakañap t'unañasa,
[36] chiqapar uñjañäki uk maysar q'iwiñasa, Tatitux taqi ukanakarux juchañchiwa.
[37] Kunapachatix mä kunas parlasi, jan ukax mä kunas utjki ukanakaxa, Tatitun munañapat ukham lurasi.
[38] Ñanqhanakasa, askinakasa alaxpachankir Tatitun munañapat ukham lurasi.
[39] Juchanakasat mutuyaskistu, janiw kunat arusiñasäkisa.
[40] Sarnaqäwinakasat sum amuythapisiñäni, ukatsti Tatitur wasitat kutkatxañäni.
[41] Alaxpachankir Tatitur luqtañäni jiwasan amtäwinakasa, mayisïwinakassa.
[42] Nanakax juchañchasipxtwa, jumarus saykatapxaraksmawa, jumasti janiw pampachapkistati.
[43] Phiñasiñamampiw muyuntayapxista, arknaqapxarakista, ¡jan khuyapt'ayasisaw jakañanakaxsa apaqapxarakista!
[44] Nanakan mayisitanakax jan ist'añatakisti qinay taypiruw imantastaxa.
[45] Jaqinak nayraqatansti q'añu t'unar uñtat jisk'achjapxistaxa.
[46] Taqi uñisirinakaxaw nanakatak arsupxi;
[47] axsarañanakampi, sipitanakampi, t'unjatäñanakamp katuqapxta.
[48] Nayranakaxatsti jachax jawir umjamaw jalaritu, nayan munat markaxa t'unjat uñjasaxa.
[49] Nayranakaxas jan samart'asaw jacharaki, janiw samarañax utjkaniti,
[50] alaxpachankir Tatitux jiwasar alayatpach uñtaniñapkama.
[51] Markaxankir warminakan t'aqhisitap uñjasaxa, chuymaxax sintipuniw usurakitu.
[52] Jan yänikiw uñisirinakaxax mä jamach'irjam katuntxapxitu;
[53] jakkirpach mä phuch'ur allintapxitu, mistuñaxarus mä qalampiw atxatapxitu.
[54] Umax q'al chhaqtayitu, ukatsti: “Jiwxakipunchïxaya” saraktwa.
[55] Nayax Tatay, uka phuch'u manqhatpach juman sutimar art'asinsma:
[56] arunakax jumax ist'istawa, mayisitaxarus ist'arakistawa.
[57] Kunürutix nayax jawsksma uka urux nayan ukarux juttawa, ukat sarakista: “Jan axsaramti” sasa.
[58] Tatay, jumaw taqi jan walt'añanakaxan yanapt'ista, jumaw jakañaxsa qhispiyarakista.
[59] Tatay, jumaw nayan t'aqhisitax uñjta, ¡kunatix chiqäki ukhamarjamay uñjarakita!
[60] Jumaw nayar jan wal lurañ amtapki ukanak uñjtaxa, nayar ñanqhachañ amtapki ukanaksa uñjaraktaxa.
[61] Tatay, nayar chuyma usuchjatanakap ist'amaya, nayataki jan wali amtatanakap uñjarakimaya;
[62] uñisirinakaxan parlatanakapsa ist'amaya, sapa kutis nayatakikiw jan walinak arsusipki.
[63] ¡Uñtanimaya, taqi luräwinakapansa, jupanakatakix larusiñakïtwa!
[64] Tatay, jupanakarux kunatix wakt'ki ukhamar uñjam, luräwinakaparjam jupanakarux uñjarakim.
[65] Amuyunakapsa qalarayam, ñanqhachañam jupanakxar wakt'ayam.
[66] Tatay, jupanakarux jach'a phiñasiñamamp arktam, ¡aka uraqitsti chhaqtayarakim!