[1] Taqi ukanak qhipatsti, Absalonax mä carrompi, caballonakampi jikxatäna, jupar uñjiritakisti phisqa tunka jaqinak utt'ayasirakïna.
[2] Sapüruw wali willjtat sartasïna, ukatsti marka mantañawja thakhi thiyan sayt'asïna. Ukatsti uka chiqaru kuna ch'axwanakatsa reyimp taripayasir purinipkäna uka jaqinakarux, sapa maynir jawsasin jiskt'irïna: “¿Kawki markatsa jutta?” sasa. Uka jaqitix: “Nayax Israelan ayllupankirïtwa” säna ukapachasti,
[3] Absalonax sarakirïnwa: “Mayitamax wakiskiriwa, chiqaparakiwa, ukampis reyi lantix janiw jumar khiti ist'iris utjkiti” sasa.
[4] Ukxarusti saskakirïnwa: “Nayatix aka markan taripañatak uchatïrista ukax, ch'axwaninakarux ist'iristwa, chiqaparuw uñjarakirista” sasa.
[5] Ukhamarusa, kunapachatix maynix jupar aruntir jak'achasïna ukapachasti, Absalonax sum qhumantt'asa, jamp'att'asarakiw katuqäna.
[6] Absalonax ukham luräna, reyin ukar taripayasir jutir israelitanakaruxa, ukhamat jaqinakamp munayasïna.
[7] Pusi mara qhipatsti, Absalonax reyiruw säna: —Reyixay, achikt'asïma, Hebrón markar kuntix nayax Tatitur arskäyät uka phuqhiri sarañaxataki.
[8] Kunapachatix nayax Guesur markana, Siria uraqin jakkäyäta ukapachaw Tatitur akham arsüyäta: “Tatitutix Jerusalén markar kuttayxitani ukapachaxa, nayax Hebronaruw sarä jupar yupaychañataki” sasa. Reyisti sänwa:
[9] —Saraskakim —sasa. Ukat Absalonax Hebrón markar saräna.
[10] Ukatsti jank'akirakiw mä qawqha jaqinak khithäna taqpach Israel ayllunakar akham sapxañapataki: “Kunapachatix trompeta phust'asir ist'apkäta ukapachasti Absalonan Hebrón chiqan reyit utt'ayatäxatap yatiyapxäta” sasa.
[11] Ukhamarus Jerusalén markat pä patak jaqinakaruw jawsayatayna, uka jaqinakasti taqi chuymaw Absalonampi chikax sarasipkatayna, janiw Absalonan amtatanakap amuyapkataynati.
[12] Ukatsti, Absalonax Davidan amuyt'ayiri jaqinakapat, Guiló sat markan jakasir Ahitófel sat chacharuw jawsayanïna, jupamp chika wilañchanak luqtañapkam ukankañapataki. Ukchañkamasti sapüruw Absalonar jaqkattir jaqinakax jilxattäna, Davidatak sayt'asiñ amtäwisti wali ch'amampiw jilxataskäna.
[13] Mä jaqiw Davidan ukar sarasin jupar yatiyäna: “Israelita jaqinakax Absalonaruw jaqkattasipki” sasa.
[14] Ukat Davidax Jerusalenan jupa chika ukankir yanapirinakapar sarakïna: —¡Jichhpach Jerusalén markat jaltxañäni, jan ukasti janiw Absalonat qhispkañäniti! ¡Jank'ak sarxarupxam, inampis jupax purinisin jiwasar jan wali luristaspa, espadampkamaw taqinir jiwarayistaspa! —sasa.
[15] Jupanakasti reyir sapxarakïnwa: —Nanakax kuntix juma reyix sapxitäta uk lurañatakix jank'akïsipktwa —sasa.
[16] Ukhamaw David reyix, qawqhanitix reyi utan utjkän jupanakamp chika mistuwayxäna. Tunka warminakaparukiw jaytawayäna reyi uta uñjapxañapataki.
[17] Reyisti taqi khitinakatix jupampi chika sarkän ukanakampix marka thiya utäkis ukawjaruw sayt'apxäna.
[18] Jilïr yanapirinakapasti David jak'an taqpachani sayt'asipxäna, ukchañkamasti reyi uta uñjiri taqpach cereteonakampi, peleteonakampi, Gat markatpach jupar arkanipkatayna uka suxta pataka geteo jaqinakampix, reyin nayraqatapan siqiki sarantapxäna.
[19] Ukapachaw reyix Gat markankir Itai sat jaqir säna: —¿Kunatarak jumasti nanakamp chika juttasti? Kutt'xam, machaq reyimp qhiparam, ukhamarus jumax yaqha markat jutiri, apanukut jaqïsktawa.
[20] Wasürukiw purisinktaxa, ¿kamisarak jichhürusti nanakamp chika sarañamatak mayïmasti? Janiw naya pachpas yatiskti kawksar sarataxsa. Kuttxakim, marka masinakamarus jumamp chik irpasxam. ¡Tatitusti jumar yanappan, jumamp chikapunïpan! —sasa.
[21] Itai chachasti reyir sarakïnwa: —Tatitun sutipxaru, juma reyin sutimxaruw juramentompi arsta, kawkhantix juma reyix jikxatasïtaxa, ukan nayax jikxatasirakï, jiwañansa jakañansa jumamp chikapunïyäwa —sasa.
[22] Davidasti sarakïnwa: —Ukhamax nanakamp chika saraskakim —sasa. Ukhamaw Itai jaqix Davidampi sarxäna, taqpach jaqinakapampi, reyi chika sarkän uka jaqinakampi.
[23] Davidan jaqinakapamp sarakipañapkamasti, markpachaw jach'at walpun jachapxäna, reyix Cedrón sat jisk'a jawir makhatkän ukapachasti; taqpach jaqinakaw wasar tuqir sarantañ qalltapxäna.
[24] Sadoc chachax sararakïnwa, Tatitun arust'äwi arcapa apapkän taqi uka levitanakampi, uka arcsti Abiatar jak'aruw jaytapxäna taqi jaqinakan markat mistuniñapkama.
[25] Ukampis reyix Sadoc jaqir sänwa: —Tatitun arcap markar kuttayxam; Tatitutix munani ukapachasti nayarux kuttayasinkitaniwa, arcapsti wasitat uñjaskarakïwa kawkhankkanitix uka chiqana.
[26] Ukampis Tatitutix sitani: “Janiw nayatakjamäktati” sasaxa, ukapachasti jupan khuyapayasiñap suyä, kuntix nayampi lurañ munkani uk luraskakpan —sasa.
[27] Reyisti Sadoc sacerdoterux sarakïnwa: —Ist'ita, jumampi, Abiatarampix jan axsarasak pani yuqanakamampi markar kuttxapxam. Jumax Ahimaas yuqamampi, Abiatarasti Jonatán yuqapampiraki.
[28] Ukchañkamasti nayax wasar pampanakan qhiparä, jumanakat mä yatiyäwi katuqañkama —sasa.
[29] Ukatsti Sadoc, Abiatar chachanakax Jerusalén markaruw Tatitun arcap kuttayxapxäna, ukaruw qhiparapxarakïna.
[30] Davidasti Olivos qullu amsta makhatäna; llakisiñat q'ara kayukiw saräna, jacht'asisa, p'iqipas ch'uqt'ata. Jupampi chika sarapkäna uka jaqinakasti p'iqinakap ch'uqt'atkamakiw jacht'asis makhatapxarakïna.
[31] Ukatsti kunapachatix, Davidaru Ahitófel jaqin Absalonampi chika, Davidatak jan wali amtasipkatap yatiyapxän ukapachasti, Davidax Tatituruw achikt'asïna, Ahitófel jaqin amtatanakapan aynacht'ayañapataki.
[32] Qullu patar purisinsti, kawkhantix Tatitur yupaychañäki ukawjaruw, arquita ayllunkir Husai jaqix Davidar jikxatäna, isinakapas ch'iyanuqata, p'iqipas laq'ampi jach'xatataraki.
[33] Jupar uñjasasti Davidax sänwa: —Jumatix nayamp chika sarasmaxa, nayatak ch'ama tukuñäspawa;
[34] Jerusalenaruk kuttxam, ukatsti Absalonaruw säta: “Reyixay, uywatamätwa, kamisatix nayrax awkimar luqtawaykta ukhamarakiw jumar luqtäma” sasa; ukhamat nayarux Ahitófel chachan amtatanakap t'unjañ yanapt'itäta,
[35] ukansti Sadoc, Abiatar sacerdotenakaw jumar yanapt'ätam. Ukhamasti, jupanakar kuntix reyi utan ist'käta taqi ukanak yatiyapunïtawa.
[36] Jupanakan Ahimaas, Jonatán yuqanakapas ukankasipkarakiwa, jupanak tuqiw yatiyanitäta, kuntix yatkäta, ist'karakïta taqi ukanaka —sasa.
[37] Ukhamaw Davidan jilat masipa, Husai jaqix Jerusalenar kutt'äna, ukatsti kunapachatix Absalonax markar mantaskän ukapachaw purirakïna.