[1] Saúl reyin jiwxatapatsti, Davidax amalecitanakar atipjasin Siclag chiqaruw kuttxäna, ukansti pä uruw qhiparäna.
[2] Kimsïr uru saraqatarusti, Saúl reyin soldadonakapat mayniw Siclag chiqar purinïna, isinakapas ch'iyanuqata, p'iqipas qhillamp jach'xatata, llakip uñacht'ayañataki. Davidan jak'apar purisinsti, taqi axsartañ chuymampiw nayraqatapan uraqkam alt'asïna.
[3] Davidasti jiskt'änwa: —¿Kawkitsa jutta? —sasa. Soldadosti sänwa: —Nuwasïwit jaltanta, israelitanakax nuwasisipkän ukkhata —sasa.
[4] Davidax jiskt'askakïnwa: —¿Kamacharakisti? ¡Yatiyitaya! —sasa. Uka soldadosti sarakïnwa: —Israelit ejercitox nuwasïwit jaltxi. Jupanakat waljaniw jiwarapxaraki. ¡Saúl reyimpi, Jonatán yuqapampis jiwapxarakiwa! —sasa.
[5] Davidasti uka yatiyäwi apaniri soldadorux jiskt'askakïnwa: —¿Kunjämatarak jumasti Saúl reyimpina, Jonatán yuqapampin jiwatap yattasti? —sasa.
[6] Uka soldadosti sarakïnwa: —Nayax Guilboa qullunkaskäyätwa, ukhamaruw Saúl reyir pachpa lanzapxar liwxattir uñjta, uñisirinakan nuwasiñ carronakapasa, caballeriapas niya jikxatañatakjamaw jak'achasirakïna.
[7] Ukapachaw jupax qhipäxar uñtanïna, nayar uñjasinsti jawsituwa. Nayasti jawsataparux ist'araktwa.
[8] Ukat jank'akiw nayar jiskt'arakitu: “¿Khitïtasa?” sasa. Nayasti: “Amalecita jaqïtwa” sasaw sista.
[9] Ukat nayarux jak'apar jawsasin sarakitu: “Mäpit jiwayxita, t'aqhisisktwa, janiw jank'as jiwirjamäkti” sasa.
[10] Ukhamasti nayax jak'achasisin jupar jiwayta, nuwasïwin aynacht'xatapat jakañ jan munxatap amuyasina. Ukatsti jank'akiw p'iqipankkän uka pillu apaqta, ukhamarak amparapankkän uka brazaletsa; juman ukar apanxañataki —sasa.
[11] Ukat Davidampi, jupa chikäpkän uka jaqinakampix llakisiñat isinakap ch'iyanuqasipxäna,
[12] ukatsti walpun jachapxäna, wararipxarakïna, Saúl reyimpina, Jonatán yuqapampin jiwatap layku, ukhamaraki Tatitun ejercitopan atipjat uñjasitap laykusa, jayp'ukamaw ayuno lurapxäna.
[13] Ukatsti Davidax uka yatiyäwi apanir waynarux mä kutimpiw jiskt'äna: —¿Kawkinkirïtas jumaxa? —sasa. Uka waynasti sänwa: —Nayax Israel markan jakir amalecita jaqin yuqapätwa —sasa.
[14] Davidasti jach'at arsüna: —¿Kunjämarak jumasti Tatitun ajllit reyir jiwayañatak amparam ayttasti? —sasa.
[15] Ukatsti jaqinakapat maynir jawsasin sarakïna: —Saram, ¡aka jaqir jiwt'ayanim! —sasa. Ukat jupax uka amalecita waynar jiwt'ayäna,
[16] Davidasti sarakïnwa: —Juma pachpaw jiwañamatak juchanïsktaxa, juma pachparakiw Tatitun ajllit reyipar jiwayatamsa arsusisktaxa —sasa.
[17] Davidax jacht'asisaw Saúl reyimpina, Jonatán yuqapampin jiwatapat aka q'uchu q'uchüna,
[18] ukatsti uka jachañ q'uchu Judá uraqin yatichasiñapatakiw arsurakïna. Aka jachañ q'uchusti Aski Jaqin Qillqatapankiwa:
[19] “¡Israel marka! ¡Juman jach'a kankañamax qullunakan t'unjat uñjasi! ¿Kunjämarak jan axsaririnakasti aynacht'apxisti?
[20] Gat chiqan jan khitirus yatiyapxamti, janirak Ascalón marka thakhinakansa parlapxamti, filistea warminakan jan kusisipxañapataki, Tatitur jan uñt'ir warminakan kusisiñat jan sink'usipkañapataki.
[21] “¡Guilboa qullunaka, jan jumanakar jallusa, sullasa purxatkpati, janirak trigosa waxt'a churañatak achpati! Atipjirinakan jark'aqasiñanakapax ukan takisit uñjasi. Saúl reyin jark'aqasiñapan k'ajatapas ukan tukusiwayxi.
[22] “Saúl reyimpi, Jonatanampix, janipuniw espadanakapsa, mich'inakapsa uñisirin wilapampiru, lik'ipampir jan chilltasax kuttanipxirïkänti.
[23] “¡Saúl, Jonatán! Munat jaqinaka! Jakañansa, jiwañansa, janiw jaljtapxirïkiti. ¡Jach'a pakanakat sipan juk'amp jaltirïpxänwa! ¡Leonanakat sipan juk'amp ch'amanïpxänwa!
[24] “¡Israelan imill wawanakapa, Saúl reyit jachapxam, jupaw suma wila isinakampi, lino isinakamp isiyapxtam; quri yänakamp k'achachapxtam!
[25] ¿Kamisarak ch'aman jaqinakasti nuwasïwin aynacht'apxisti? ¡Jonatanax qullu pataman jiwayat uñjasi!
[26] “¡Jonatán jilaxay, jumatjamax wali llakitaw uñjasta! ¡Ukataq suma chuymampiw nayar uñjistaxa! Munasiñamax nayatak warminakan munasiñapat sipan jilt'atänwa.
[27] ¿Kunjämarak ch'amani jaqinakasti aynacht'apxisti? ¡Nuwasiñ yänakas q'ala t'unjataw uñjasi!” sasa.