[1] Salomonax Israel markar pusi mara apnaqkän ukkhaw Tatitun utap lurañ qalltäna, Ziv sata payïr phaxsina. Israelitanakan Egipto markat mistunitapax pusi patak kimsaqallqu tunkan maräxäna ukapacha.
[2] Salomón reyix Tatitutak utachkän uka utasti, sayt'urux pä tunka paqallqun metroni, iranarux llätunka metroni, alayarusti tunka kimsa chikatan metronïnwa.
[3] Nayräxa tuqit mantañ punkusti sayt'urux llätunka metroni, iranarusti pusi metro chikatanïnwa.
[4] Salomón reyix Tatitun utapar rejanakan ventananak uchayäna.
[5] Ukatsti utanak lurayäna, utar muytki uka pirqa jak'aru, chikachika utaru muytata, ukhamarak patäxa utarusa, ukatsti uka muytarux jisk'a utanak lurayarakïna.
[6] Aynach utasti iranarux pä metro pä tunka phisqan centimetronïnwa. Chikachikankir utasti pä metro paqallq tunka centimetronïnwa, patäxa utasti kimsa metro tunka phisqani centimetronirakïnwa; anqäxatxa, utan tupunakapax jisk'aptayatäxänwa, q'iru lawanak uta pirqar jan uchañataki.
[7] Tatitun utapax, k'uthat qalampkamaki luratänwa, ukat martillona, hachana, hierrot lurat yaqha yänakan liq'isitapas jan ist'askänti.
[8] Aynachankir jisk'a utan punkupasti, kupïxankänwa; ukatsti chika taypi alay utanakar makhatañatakix muytas makhatañaw utjäna.
[9] Salomón reyix Tatitun utap lurañ tukuyxän ukapachasti, t'alpha lawanakampiw utachxatäna, ukarusti cedro lawampiw k'achacharakïna.
[10] Tatitun utap jak'arux muytpacharuw utanak luräna, ukasti alayarux pä metro pä tunka phisqan centimetronïnwa, uka utanakasti cedro lawampi uta pirqar acht'ayatänwa.
[11] Ukapachaw Tatitux Salomonar säna:
[12] “Niyakixay aka uta lurañ qalltstaxa, yatiyañ munsma, jumatix kamachinakax imäta, kamachi arunakaxarus phuqhäta, iwxanakaxarjam sarnaqarakïta ukkhaxa, nayax David awkimar arskäyäta ukxa juma tuqiw phuqhä;
[13] ukatsti nayax israelita jaqinak taypin jakä, janiw Israel markaxarux apanukkäti” sasa.
[14] Salomonasti Tatitun utap lurayañ tukuyxänwa.
[15] Uta manqhäxa pirqanakapsti cedro t'alpha lawanakampiw apakipäna. Amstat aynachkamaw lawanakamp uchäna, uraqirusti pino lawanakampiw suk'akipäna.
[16] Tatitun utap mantañ uñkatasiparusti Qullanansa Qullanap chiqawjäñapatakiw wakt'ayarakïna, ukasti llätunka metronïnwa, ukarusti amstat aynachkamarak cedro lawanakampix uchakipäna.
[17] Qullan chiqawja nayräxasti sayt'urux tunka kimsaqallqun metronïnwa.
[18] Uta manqha pirqasti cedro t'alpha lawanakamp uchakipatänwa, ukarusti panqaranakampi, achunakampi lurt'atänwa. Taqi ukanakasti cedro lawatkamakïnwa. Janiw mä qalas pirqan uñstkänti.
[19] Salomonax Qullanansa Qullanap chiqawja wakt'ayäna, Tatitun arust'äwi arcap ukar uchañataki.
[20] Qullanansa Qullanap chiqawjax sayt'urusa, iranarusa, alayarusa llätunka metronïnwa. Uka nayräxarusti Salomón reyix cedro lawat mä altar luräna, ukarusti qurimpiw lip'ikipayäna.
[21] Ukhamarakiw Tatitun utap manqhïxampi, Qullanansa Qullanap chiqawjampi qurimpkamakiw lip'ikipayäna, uka nayräxarusti quri cadenanakampiw ucharakïna.
[22] Ukhamawa utpach qurimpi lip'suyäna, ukhamaraki Qullanansa Qullanap chiqawja nayräxan utjir altarsa.
[23] Ukxarusti Qullanansa Qullanap chiqawjatakix olivo lawat pä querubines sat chhiqhaninak lurarakïna. Sapa mayasti alayarux pusi metro chikatankamänwa,
[24] sapa maya chhiqhanakapasti pä metro pä tunka phisqani centimetronïnwa. Ukhamasti mä chhiqhata maysa chhiqkamasti pusi metro chikataniw tupt'asïna.
[25] Paypach querubines sat chhiqhaninakasti, mä pachpa tupunikïnwa; panpachaniw pusi metro chikatankamäna, mä kipkakïnwa.
[26] Alayarusti pusi metro chikatankamarakïnwa.
[27] Ukanaksti Salomonax Qullanansa Qullanap chiqawja taypiruw uchäna. Uka chhiqhaninakasti janatatat chhiqhanakanïnwa, maynïrin chhiqhapax mayskat pirqaruw purïna, maynïrin chhiqhapasti mayskat pirqarurakiw purïna, pä chhiqhanakasti Qullanansa Qullanapäki uka chikachikan purapat jikisirakïna.
[28] Ukatsti Salomonax uka pä chhiqhaninakarux qurimpkamakiw lip'suyäna,
[29] ukatsti manqhäxa, anqäxa pirqanakansti, querubines sat chhiqhaninak kipkaki, palmeranak kipkaki, panqaranak kipkak khithsüna.
[30] Templon uraqipxa qurimpkamakiw lip'suyäna, manqhita, anqäxata.
[31] Qullanansa Qullanap chiqawjar mantañ punkunaksti olivo lawat luräna, umbralampi sayirinakampisti phisqa thiyanïnwa.
[32] Paypach punkux olivo lawat luratkamakïnwa, uka punkunakarusti querubines sat chhiqhaninaka, palmeranaka, panqaranakas kipkak khithsüna; taqi ukanakarusti qurimpkamakiw lip'suyäna.
[33] Tatitun utapan chikachikapäwjar mantañäki ukatakisti, olivo lawat pusi thiyani sayirinak luräna.
[34] Punkun pä jist'katañapasti pino lawat luratänwa, paypach punkunakarakiw muyjtir punküna.
[35] Uka punkunakarusti chhiqhaninaka, palmeranaka, panqaranak kipkak khithsüna, ukanakarusti sillp'a qurimpiw lip'ikipayäna.
[36] Manqhäxankir atrio satäki ukxa, kimsa siqi k'uthat qalanakampi, mä siqi cedro lawa q'irumpi lurarakïna.
[37] Tatitun utapa lurañax, Ziv sat phaxsin qalltasïna, kunapachatix Salomón reyix pusïr mara marka apnaqkäna ukapacha;
[38] ukatsti Tatitun utapa taqi phuqhatpacha lurañax, Bul sat kimsaqallqür phaxsin tukuyasirakïna, tunka mayan mara jupax marka apnaqkäna ukapacha, kunjämatix amtatäkän ukhamarjama. Uka utsti Salomonax paqallq maran luräna.