[1] Jumanakasti nanakarux Criston yanapiripjamak uñjapxañama, Diosan jan amuyt'kay amtäwinakap yatichañataki.
[2] Jichhasti walikiwa, khititix lurañ katuqki ukax askïtap uñacht'ayañapa.
[3] Nayasti, jumanakan taripatäñata, jilïrinakan taripatäñatsa janiw llakiskti. Janirakiw naya pachpas juchañchaskti.
[4] Chuymaxan janiw kunas nayar juchañchirix utjkiti, ukax janiw sañ munkiti nayan jan juchanïtaxa. Khititix taripkitani ukax Tatituwa.
[5] Ukhamasti, jumanakax jan kunatsa mäkix taripapxamti; Tatitun jutañap suyt'apxam, jupaw ch'amakankki uk qhanar apsuni, chuyman amtäwinakapsa qhanstayarakini. Ukatsti Diosaw sapaqat maynirux luräwipatjam jach'achaskani.
[6] Jilatanaka, akanaksti jumanakan askimatakiw parlapxsma, Apolosampita naya pachpampit amuyt'ayasa. Nanakat yatiqasis kunatix qillqatäki ukat jumanakan jan saranukuñamatakiw sapxsma, ukhamat maynir munatap laykux jan khitis jach'achasiskañapataki, maynir jan walt'ayasa.
[7] Ukampis, ¿khitirak jumarusti mayninakat sipan juk'ampi sum churtamsti? ¿Kunatix utjktam uksti, janit Diosasti churktamsti? Jupatix churstam ukasti, ¿kunatarak jach'a jach'a tukta jumas jikxataskasma ukhamsti?
[8] Jumanakax amuyatax niy qamirïxapxtawa, munatamarjamax taqi kunanïxapxtawa, reyinakjam tukusax janiw nanakar munkxapxistati. ¡Añchakit chiqpach reyinakäpxasma, ukhamat nanakan jumanakampi chik markamankapxañaxataki!
[9] Nayan amuyataxat Diosax nanak apostolunakarux qhiparjamakiw uchapxitu, jiwañatak juchañchat jaqinakjamäpxtwa. Angelanakansa, taqi jaqinakansa, uñch'ukitäñatakiw tukupxta.
[10] Cristor iyawsapxatax laykux luqhinakarjamaw jaqinakax uñjapxitu; ukatsipana, jumanakarux Cristo laykux ch'ikhinakarjamaw jaqinakax uñjapxtam. Nanakax pisi ch'amanïpxtwa, ukampis jumanakax wali ch'amanïpxtawa. Nanakarux jisk'achapxituwa, jumanakarusti yäqapxtamwa.
[11] Jichhürkamas manq'at awtjata, umat pharjata, isit jalstataw sarnaqapxta; jaqis uñisipxituwa, janiw utanïpkaraktsa,
[12] ukatsti qariñkamaw amparanakaxampi irnaqapxta. Ñanqhachirinakarux sumampiw kutiyapxta; arknaqataw uñjasipxta, uksti amukiw mutupxta.
[13] Nanakxat jan walinak parlapxi, ukampis llamp'u chuymampiw nanakax kunsa amuyt'ayapxarakta. Mä t'unarjamaw uñjapxitu, jan kunatak aski jaqirjamaw uñjapxitu. Jichhürkamas taqi jaqinakat sipansa wali jisk'achatäpxaraktwa.
[14] Aksti janiw jumanakar p'inqachañatak qillqanipksmati, jan ukasti wawanakaxarjam amuyt'ayañatakiw qillqanipxsma, jumanakarux wal munasipxsma.
[15] Jumanakax Cristor iyawsirjamax tunka waranqa yatichirinïsipkamsa, janiw walja awkinïpktati. Nayakiw jumanakan awkimätxa, nayaw jumanakarux Diosan suma yatiyäwi arunakap parlapxsma, uka tuqiw jumanakax Cristo Jesusamp mayakïpxtaxa.
[16] Ukhamasti, nayat yatiqasis sarnaqapxañamatakiw achikt'apxsma.
[17] Ukat Timoteorux khithanipxsma. Jupax Tatitunkir munat aski wawaxawa. Jupaw Cristo Jesusampi sarnaqäwixat amtayapxätam, kunjämtix taqi chiqansa iglesianakan yatichkta ukarjama.
[18] Jumanakat yaqhipanakax jach'a jach'aw tukupxi; janis jumanakar uñjir purinkirista ukham amuyapxaraki;
[19] ukampisa, Tatitun munañapächi ukaxa, jank'akiw jumanakar tumpt'ir jutä. Ukkhapï uñjäxa kuntix uka jach'a jach'a tukur jaqinakax lurapkani ukxa, janiw parlapki ukakxa.
[20] Diosampi jakañax janiw lakakïñapäkiti, jan ukasti, luräwimpi uñacht'ayañarakiwa.
[21] ¿Kunsa jichhax jumanakax jutkä ukkhax munapxta? Purinisinxa, ¿mutuyapxämati, jan ukax, munasiñampi, suma chuymamp tumpt'ayasiñcha munapxtaxa?