[1] Jichhasti jilatanaka, Diosan suma yatiyäwi arunak yatiyapksma ukat amtasipxañam munta. Jumanakax uka suma yatiyäwi arunak iyawsapxta, ukarjamarakiw sayt'atäsipktaxa.
[2] Aka suma yatiyäwi arunak tuqirakiw qhispitäpxäta, uka arunakarjam sayt'apkäta ukapacha, kunjämtix nayax jumanakar yatiyapksma ukarjama; jan ukhamäkani ukasti, iyawsatamax inamayakïniwa.
[3] Nayraqatasti, kuna yatichäwinaktix nayax yatiqkta ukarak jumanakarux yatichapxsma, ukasti akhamawa: Qillqatanakarjamax Cristox juchanakas laykuw jiwawayi;
[4] janchipax p'amp'antatänwa, Qillqatanakarjamasti kimsa urut jaktäna;
[5] ukatsti Pedroruw uñstäna, ukhamaraki tunka payan apostolunakampiru.
[6] Uka qhipatsti phisqa patakat juk'ampi jilatanakaruw uñstäna, jupanakat waljaniw jakasipki, yaqhipanakasti jiwarxapxiwa.
[7] Uka qhipatsti Santiagoruw uñstäna, ukhamarak taqpach apostolunakaru.
[8] Qhip qhiparusti nayaruw uñstarakitu, nayax jan yuriñat yurir wawäkirista ukhama.
[9] Nayax apostolunakat sipan jan yäqatakïtwa, janirakiw apóstol satäñatakis askïkti, Diosan iglesiapar arknaqatax layku.
[10] Ukampis Diosan khuyapayasiñap laykukiw kunäktix ukätxa; munasiñapasti nayatakix janiw inamayäkiti. Jan ukasti, nayax taqi apostolunakat sipan juk'amp irnaqawayta; janiw nayat irnaqktxa, jan ukasti, Diosawa, jupasti munasiñapan nayarux yanapitu.
[11] Ukhamasti nayasa, jupanakasa, kuntix yatiyapksma uka yatiyäwiruw iyawsapxtaxa, ukaw wakiskirixa.
[12] Criston jiwatat jaktataptix jiwasax yatiystanxa, ¿kunatarak jumanakat yaqhipanakasti jiwatanakax janiw jaktapkiti sas parlapxisti?
[13] Jiwatanakatix jan jaktapkchixa, Cristox janirakipï jaktkpachatixa.
[14] Cristotix jan jaktkchixa, yatiyktan uka arunakax janiw kunatakis askïkiti, jumanakan iyawsäwimas inamayakirakiwa.
[15] Ukhamächi ukaxa, nanakax Diosan k'ari qhanañchiripäpxiristwa, janis Diosax Cristor jaktaykaspa ukhamak yatiyapxirista, janitix jiwatanak taypit jaktañax utjkaspa ukaxa.
[16] Jiwatanakatix jan jaktkchixa, Cristox janirakipï jaktkpachäntixa.
[17] Cristotix jan jaktkchïnxa, jumanakan iyawsäwimax inamayakiwa: juchanakaman sarnaqasipktaxa.
[18] Ukhamächi ukasti, khitinakatix Cristor iyawsas jiwapki ukanakax chhaqtatäsipkiwa.
[19] Cristor suyt'añasatix akapachan jakañatakikïchixa, taqi jaqinakat sipan sinti llakkañätanwa.
[20] Ukampis janiw ukhamäkiti. Chiqpachansa Cristox jiwatanak taypit jaktawayi. Jupax nayrïr achükaspas ukhamawa: jupaw jiwatanak taypit nayraqat jaktawayi.
[21] Kamisatix jiwañax mä sapa jaqit qalltixa, ukhamarakiw jiwatat jaktañax mä sapa jaqit qallti.
[22] Kamisatix Adanankasin taqi jaqix jiwixa, ukhamarakiw Cristonkxasin taqi jaqinakax jakapxani.
[23] Ukampis sapa maynitakiw wakisitarjam lurasini: Cristow nayraqat jakti, nayrïr achur uñtata, ukxarusti kunapachatix Cristox kuttankan ukkhaxa, jupar iyawsirinakaw jaktapxarakini.
[24] Uka qhipat aka uraqin tukusiñapax purinini, ukapachaw Cristox taqi munañaninakaru, marka apnaqir jilïrinakaru, ch'aman kankañaninakar t'unjani, ukatsti Dios Awkiruw marka apnaqañ katuyxani.
[25] Cristox reyïñapawa, taqi uñisirinakapar atipjañapkama;
[26] qhipïr uñisiristi jiwawa, ukas q'ala t'unjatarakïniwa.
[27] Diosax taqi kunsa Criston munañaparuw katuyi. Ukampisa, kunapachatix Qillqatanakax: “Taqi kunsa Criston munañaparuw katuyi” sixa, ukax janiw Diosas Criston apnaqatäkaspa ukham sañ munkiti, jan ukasti, Diosaw taqi kunsa apnaqi.
[28] Ukatsti kunapachatix taqi kunas Criston munañapar katuyatäxani ukkhasti, Cristo pachpaw Yuqapäkasin Dios Awkir katuyasxani, Diosax taqi kunsa jupar katuyatap layku. Ukhamat Diosax taqi kunxarus munañanïni.
[29] Mä tuqitxa, yaqhipanakax jiwatanak lantiw bautismo katuqapxi, ¿kunatakirak uk lurapxisti? Jiwatanakax jan jaktkchini ukasti, ¿kunatakirak jiwatanak lanti bautismo katuqapxisti?
[30] ¿Kunatarak jiwasanakasti sapa kutis jan walt'añankasktansti?
[31] Jilatanaka, sapüruw nayax jiwañ jak'an jikxatasta. Ukasti chiqapunïskiwa, nayasti chuymaxan wal kusista jumanakan Cristor iyawsapxatamata.
[32] Nayax Éfeso markan jaqi manq'an animalanakampjamaw jaqinakamp nuwasta. Jiwatanakan jaktañapatix jan chiqäkchi ukasti, ¿uk lurasin, kunarak jikxatsti? Kunjämtix yaqhipanakax sapki ukhamarak lursnaxa: “¡Manq'asiñäni, umt'asiñäni, qharürux jiwxchiñänixaya!” sasa.
[33] Jan sallqjayasipxamti. Kunjämtix säwix siski: “Jan wali jaqinakampi sarnaqañax, aski saräwinak chaqtayi” sasa.
[34] Jumanakax sum amuyasipxam, janirak juch lurkxapxamti, jumanakat yaqhipanakax janïraw Diosar uñt'apkiti. Uksti jumanakan p'inqa tukuñamatakiw sapxsma.
[35] Inas yaqhipanakax jiskt'aschini: “¿Kunjämarak jiwatanakasti jaktanisti? ¿Kunjäm janchinïpxanisa?” sasa.
[36] ¡Uka jiskt'ax pisi amuyunin jiskt'apawa! Kunapachatix jatha phawantktan ukkhaxa, uka jathax jiwañapawa, ukhamat alin mistuñapataki.
[37] Yapuchktan ukkhax, janiw mistunkani uka ali yapuchktanti, jan ukasti jathakwa usktanxa, trigöpasa, jan ukax yaqha jathäpasa.
[38] Ukatsti Diosaw uka jatharux kumjämarutix munki ukhamarjam tukuyi, sapa jatharusa wakisitaparjamaw ali tukuyi.
[39] Janiw taqi janchinakax kipkakïkiti; jaqin janchipax mayjawa, uywanakansa, jamach'inakansa, chawllanakan janchipas mayjarakiwa.
[40] Ukhamarakiw, alaxpachan uchatanaka, aka uraqin uchatanakas utji; ukampis alaxpachan uchatanakäki ukanakax, aka uraqin uchatanakat sipan sinti sumt'atawa.
[41] Intin qhanapax phaxsin qhanapat sipan mayjawa, warawaranakan k'ajatapas mayjarakiwa; pachpa warawaranak taypinsa, sapa warawaran k'ajatapax mayjawa.
[42] Ukhamarakiw jiwatanakat jaktañampix lurasi. P'amp'antatäki uka janchix ñusantirikiwa; jaktki uka janchisti jan ñusantiriwa.
[43] P'amp'antatäki uka janchix jan kunatak askiwa; jaktki uka janchisti wali jach'añchatawa. P'amp'antatäki uka janchix jan ch'amanikiwa; jaktki uka janchisti ch'amaniwa.
[44] P'amp'antatäki ukax tukusir janchikiwa; jaktki ukasti ajay janchiwa. Tukusir janchitix utjchixa, ajay janchix utjarakiwa.
[45] Qillqatan siwa: “Nayrïr chachax Adanawa, jupax jakkir jaqiw tukuwayi” sasa; ukampis qhipïr Adanasti jakañ churir ajayuw tukuwayi.
[46] Ukampisa, janiw ajayüki ukax nayrankkiti, jan ukasti, janchïki ukaw nayrankixa.
[47] Nayrïr chachax laq'at luratänwa; payïr chachasti alaxpachat jutiriwa.
[48] Aka uraqin jakir jaqinakan janchipasti, uka nayrïr jaqin janchipjama laq'at luratawa; alaxpachankirinakasti, kunjämäkitix alaxpachankirix ukhamarakiwa.
[49] Kunjämtix uka laq'at lurat jaqir uñtasitätanxa, ukhamarakiw mä urux alaxpachankirir uñtasitäñäni.
[50] Jilatanaka, sañ munapxaraksma, akapach janchix janiw Diosan markapar mantkaspati, tukusirïki ukasti janirakiw wiñay markankkaspati.
[51] Ukampis Diosan imantat amtäwip yatipxañam munta: Janiw taqpachan jiwkañäniti, ukampis taqiniw
[52] mä ch'ipxtanaki machaqar tukuñäni, kunapachatix trompetan qhipa phust'asitapax ist'askani ukapacha. Trompetan phust'ataparusti, jiwatanakax jan mayampi jiwañatakiw jaktapxani. Jiwasanakasti machaqar tukutäxañäniwa.
[53] Jiwasan ñusantir janchisax, jan ñusantirïki uka janchimpiw isthapisini, jiwir janchisasti jan jiwiri janchimpiw isthapisirakini.
[54] Kunapachatix jiwasan ñusantir janchisax, jan ñusantir janchimpi isthapitäxani, jiwir janchisasa, jan jiwir janchimpi isthapitäxarakini, ukapachaw Qillqatan siski ukax phuqhasini: “Jiwax wiñayatak t'unjataw uñjasi.
[55] Jiwa, ¿kawkinkarak atipjir ch'amamasti? Jiwa, ¿kawkinkarak mich'imasti?” sasa.
[56] Jiwan mich'ipax juchawa, nayra kamachiw jucharux uka ch'am churaraki.
[57] ¡Diosax yuspagaratäpan, jupaw Jesucristo Tatitus tuqi atipjayistu!
[58] Ukhamasti munat jilatanaka, jumanakax Tatitumpi sum sayt'asipxam, janirak saraqapxamti. Tatitun luräwipan juk'ampi juk'amp irnaqasa; jumanakax yatipxtawa, Tatitumpi mayaki irnaqapxatamax janiw inamayäkiti.