[1] Damu nané matahai Tesalonika nahu Yesus Énini fimiri bahana yohoniya, gugu nugu niye Ala bake nouwané, nemohoni nugu awe habigiyoméri Nugunabo Ahuyaha Yesus Kristus Éné sisi manggoho busu fe busu fe hori kakumu yo ahayané. Damu gugu hate Ala bake nouwané, nemohoni ahu yoho Yesus Éné sisi manggoho égéki areyonangkumaka, gugu haiyangne ememere fimiri bahana hamemere ahu yohote sisi manggoho égéki dari haiyangne ememere fimiri u yohoto hamemere bohonané.
[2] Damu ahu aburoho yoho Yesus Éné sisi égéki dagenate fani hamu hanéri Énini fimiri bahana deyoho: Ahu tuhuremu esumu Énini fimiri bahanate, tuhuremu fani Énini fimiri bahana deyoho. Emohoni, gugu Ala bake nouwané, nemohoni nugu Yesus Éné sisi manggoho yohowané mériya égéki, ahu esemu keiyongkéri bahana yoho nugu bake fani poréyahamu emenan de damu fani dirimeféri yohonan deyoho.
[3] Emohote, Nugunabo Ahuyaha Égé Uku u yahamaki égéki fani munggu deyoho. Égé emoné guguna modu habigiyomenané. Damu Égé guguki etori bohoné, emohoni hohoi yohona ahuhabang Iblis fani gugu bake poréyahamu emon deyoho.
[4] Damu nugu esumu nafamériyani Nugunabo Ahuyaha guguki esumu emohoni, u hanggeramu gugu bake yoriya égéki gugu katugo hamemere emahana, damu hate awe damu yeri emenané.
[5] Damu nugu Ala bake fisini yohowané, "Nugunabo Ahuyaha Yesus Gusé enu, emohoni Tesalonika nahu yohosé awe nafamenané Nugunabo Alasé yohoki esumu aburohomu worumoho. Damu Nugunabo Ahuyaha Yesus Gusé hate enu, emohoni anggo feki Yesus Kristus Guki ahu yohosé ifiyo-tifiyomahanani, Gute mése uku demoho ememere fimiri Gané modu dongkuni habigiyoméri baki hamemere ahu fe yoho Tesalonika nahu yoho bake ifiyo-tifiyomahanate, yoho uku demoho ememere fimiri yohona modu dongkuni bohonané," ememere fisini yoriya.
[6] Nané matahai Yesus Énini fimiri bahana yohoniya, Nugunabo Ahuyaha Yesus Kristus Éné habigiyo nugu bake kurohoni, nugu nuguna na habigiyo féri gugu bake u hanggeramu yohowané: Gugu mése Yesus Kristus Énini fimiri bahana ékému ahu menohosé aneséyang rahamo kukuwoho rahamo ememere afénan niye yohona furubo esumu emenané mahana égéki fani habigiyoméri afénan de modinangkumaka, gugu fani yoho kumu imo yeri bohonan deyoho. Damu Yesus Kristus Éné sisi yokukubumérékang égéki dari mése hamemere emahana égéki ahu fe yoho fani hamemere emenan dekumaka, gugu hate fani yoho kumu imo yeri bohonan deyoho.
[7] Anggo feki nugu Tesalonika busu ékému gugu kumu kotoféri berekang égéki, nugu nuguna furubo esumu emowané mériya égéki fani muniya de esumu habigiyoméri furubo yeri berekang. Damu nugu gugu bake emesumérékang égéki gugu mése nafamahana. Emohoni, guku damu nugu berekang égéki esemu hamemere enané.
[8] Damu ahu menohosé ohoru kurohoni areyangkumaka, nugu ohoru égé niye aneséyang kuroriyaka, damu ohoru yeri inggamsumérékang. Damu nugu fani homereyaha yarekang deyoho. Damu nugu aneséyang yeri damu ohoru tokuni areyan niye asu-sawa furubo hanggeramu yarekang. Emohoni, kukuwoho fe nugu fimiriya égéki fengféyonan niye nugu fani ememere yohoki fisini berekang deyoho.
[9] U feki Yesus nuguki kubumu yohoni Éné sisi yo hohomusuméri beriyani nuguna na habigiyo de égé. Emohoni, nugu awe gugu bake ditini emiyohowané, "Gugu esemu nugu bake ohoru damu nugu kukuwoho fe fimiri beriya égéki kunoro," ememere ditini yohowané. Emohote, nugu fani ditini yohowan deyoho, mite nugu habigiyoméri furubo yeri berekang. Nugu gugu niye emesuméri berekang, emohoni gugu nuguki etohonané, damu nugu emesuméri berekang hamemere emesuméri bohonan niye.
[10] Nugu hate anggo feki gugu kotoféri beri gugu bake akiya nogoki yorékang, "Ahu fe furubo fani hanggerakéri afén dekumaka, égé bake ohoru fani kurohonané fani aren deyoho," ememere yorékang.
[11] Emohote, nugu katugo dariyani gugu égena ékému ahu fe yoho furubo afénané mahana égéki undomahana. Damu hate ahu énéyuhuwoho furubo fani yahana de, damu ahu fe yohona u égéki kotoféri pafufoméri bahana, damu ahu fe yohona furubo afénané mahana égéki abusahagiyomahana.
[12] Emohoni, ahu ememere égena yoho niye Nugunabo Ahuyaha Yesus Kristus nugu bake nuguna na habigiyo kuroho égé féri hanggerakéri yoho bake yohowané, emohoni yoho awe dakumu furubo yeri damu aneséyang yeri yoku yoho niye ohoru tokunsuméri arenané.
[13] Damu nané matahai Yesus Énini fimiri bahana yohoniya, gugu wayamu emesuméri bahana égéki fani modinan deyoho.
[14] Ahu menohosé nugu u kara uniya baha nogoki femu dari hamemere emenan de undoméri yohongkumaka, ahu éné fi iri nouwané. Damu gugu égé kumu fani imo yeri bohonan deyoho. Emohoni, égéte awe hosuméri damu égé poréyahamu emoho égéki ukuni degemu wayamu eméri bohoné.
[15] Emohote, fani égére emiyohonané, "Nuguna kufe kéré," fani ememere yohonan deyoho. Emohote, gugu gugunahu yoho bake wayamu emahana hamemere égé bake wayamu eméri éné akiya hanggeramu nouwané.
[16] Nu Ala bake fisini yahae, "Nugunabo Ahuyaha Yesus Kristus, Gusé Ganahu bake emohoni, yohona modu gemu wayamu bahana kéré. Gusé Tesalonika nahu yoho bake wayamu enu, emohoni yohona modu awe gemu wayamu bohonané. Damu Nugunabo Ahuyaha Yesus, Gusé yoho kumu kotoféri bunané," ememere fisini yoriya.
[17] Damu Paulus nuku nané beromu nané u gugu bake yofiye ahainé méré nogoki uni, "Gugu fake bunané." Kara emu-hori-daha nusé uni éné akimamaga ékému ememere emesuméré, emohoni kara nogoki ahu emu-hori-daha yoho nusé uni égéki nafamenané.
[18] Damu nugu Ala bake fisini yoriya, "Nugunabo Ahuyaha Yesus Kristus, Gané modu kuyomu woruméri yoho bake enu, emohoni yoho awe wayamu bohonané." U fe karawoho.