[1] Nané matahai Yesus Énini fimiri bahana yohoniya, sawa Nugunabo Ahuyaha Yesus Kristus awe tafe defené moho éné sisi égéki nugu hanggerakéri kageto kara uniya. Damu Ala awe yohoné, gugu kotoféri dukuméri Yesus Kristus gebufunané mahana éné sisi égéki katugo nugu hate hanggerakéri kara uniya. Damu u égéki nugu fisini gugu bake hanggerakéri yohowané:
[2] Gugu moguri fimiri gagitoméri hagigisakumenan deyoho. Ahu tuhuremu hanggerakéri emiyohonané, "Nugunabo Ahuyaha Yesus mése soho nokumu daha." Ememere yohonanéte, gugu fani ememere bagumu fimiri gagitoméri hagigisakumenan deyoho. Ahu fe yoho Ala Éné Ubana Hayo yoho bake embahae ukukuwoho éyoné moho éné sisi égéki yohoné dagena ememere yohonan kiyoho. Damu ahu tuhuremu ememere yohonan kiyoho, "Paulus damu éné matahai yoho Nugunabo Ahuyaha Yesus mése soho nokumu daha ememere kara unggunaka, damu mése kusumahanani daha égéki dariya," ememere yohonan kiyoho. Emohote, gugu yohona u dari haiyangne fani ememere fimenan deyoho.
[3] Emohote, gugu modinani ahu fe fani gugu bake u fe ememere yahamu yohonan deyoho, "Nugunabo Ahuyaha Yesus Égé mése daha." Ememere yahamu yohona égéki dari haiyangne fani ememere fimenan deyoho, menefeyané. Emohote, Nugunabo Ahuyaha Yesus Kristus fani defen de, dakasuhumu ahu aburoho yoho awe Ala bake sembayang yeri Énaukungguna égéki muni undomenané. Damu ahu énéyuhuwoho Ahu Kamisige égé Alaki muni undoméri esumu keiyongmu baha égéki hanikéri éné u dari bohonané. Ahu Keiyong égéki sawa akimamagaki indo fani bunéri égé de éné busu ékému pemoné otohoiné.
[4] Damu égé awe Ala kumu taki arufoné, damu ahu yoho kukuwoho ala kusi kiri eméri énaukungguna, damu kukuwoho fe emu-hori-daha Ala kéré ememere fimiri yohonaukungguna égéki égésé taki arufonané. Damu égé uku égére emiyohoné, "Gugu emu-hori-daha amiféri égenate, nusé esemu ahuyaha kiri éré," emiyohoné. Damu égé awe Ala Éné Afahang osuri beri damu uku égére yori emiyohoné, "Nuki Ala kéré," ememere yohoné.
[5] Damu gugu esemu haiyangmu fifinané! Nu Tesalonika busuyaha ékému gugu kotoféri bereké égéki, u nogoki mése gugu bake yosuméréké.
[6] Damu gugu mése nafamahanani katugo Ala yohoni ukukuwoho fe abusahagiyomoho égéki emoné Ahu Keiyong égéte damu baha, emohoni égéte fani kibikubumoho deyoho. Emohote, katugo hohoi yohona ahuhabang Iblis hate Ahu Keiyong égéki hafuféri éri égé soho nokumu defen niye furubo fake-fakemu e yaha. Damu katugo ukukuwoho fe abusahagiyomoho égéte awe uku damu emohoni, Ahu Keiyong égé fani maraha deyoho, mite sawa Ala yori inggemaki égéki awe marefené. Embahae Ala awe yohoné, ukukuwoho abusahagiyomoho égéte Ahu Keiyong égéki undomoné dogohoiné,
[8] damu Ahu Keiyong égéte fake marefené. Emohote, Nugunabo Ahuyaha Yesus deri Éné u féri yohoné, Ahu Keiyong égéte awe akumoné. Damu Yesus Égé awe deri kibikubuméri Éné habigiyo manggohomu égé égéki kubuméri emoné Ahu Keiyong égéte aniginé.
[9] Ahu Keiyong égé soho nokumu defené moho égéki, égé awe hohoi yohona ahuhabang Iblis Éné habigiyo fikoyaha afénéka, marefené. Damu égé awe ahu yoho bake yahamu yori damu ukukuwoho-mujizat ahu yoho fani emesumahana de égéki emoné. Emohoni, ahu aburoho yoho degemu fimenané Ahu Keiyong égésé Ala kin kiyoho.
[10] Damu Ahu Keiyong égé ukukuwoho emu-hori-daha esumu yahamu poréyahamu égena égéki eméri ahu aburoho yoho bake yahamu yori emenané. Emohoni, ahu énéyuhuwohote haiyangne ememere fimenané. Damu ahu énéyuhuwoho ememere emahana égéki yoho Yesus Kristus Éné sisi manggoho dagenate, yoho fani hanikéri dari u yohoto hamemahana de muni undomahana. Emohoni, Ala mungguni Ahu Keiyong égé yoho bake yahamu yohoni, yohote haiyangne ememere fimahana. Damu ahu yohoki Ala awe indo fani bunéri égé de éné busu ékému pemoné otohonané.
[11] Emohoni, Ala Éné habigiyo féri emohoni ahu Yesus Éné sisi manggoho égéki dari muni undomahana yohote Ahu Keiyong égé yahamu yoho égéki dagenaka, damu kakumu haiyangne ememere fimahana.
[12] Emoho nemohoni, ahu emu-hori-daha Yesus Éné sisi manggoho égéki dari muni undoméri esumu hanikéri keiyongmu emesumahana yohona u égéki Alasé efefeméri yori emiyohoné, "Gugu poréyahamu emahana." Ememere yori inggeméri yoho bake poréyahamu emoné.
[13] Damu nané matahai Yesus Énini fimiri bahana yohoniya, Nugunabo Ahuyaha guguki worumoho. Damu nugu asu-sawa gugu niye Ala bake degi kuroho ememere yosumériya. Anggo posuyahaki Ala soho damu hou yori emaki égéki, Égésé mése guguna fi iri kubumu yaki. Emohoni, gugu Yesus Éné sisi manggoho égéki dari haiyangne ememere fimenangkumaka, Ala guguna dosa tobunsuméri umburomoné. Damu Ala Éné Ubana Hayo guguna modu kumu osuri bohoné, damu gugu awe dosa afénané bemenangkumaka, Ala Éné Ubana Hayo ememere emiyohoné, "Dosa nogoki fani manggohokigi deyoho." Ememere yohoné dari wayamu emenané. Damu gugu tafe Éné u dari esumu manggohomu bohonané barohori komukuni manggohomu bohonané embahae Ala guguki umburoméri feyahafumoné. Emoho nemohoni, nugu Ala bake degi kuroho ememere yosumériya égéki haiyangmu égé, damu fani ukuni muniya deyoho.
[14] Ememere Ala mése emohoni nugu Yesus Éné sisi manggoho égéki mése gugu bake yoriyani, gugute dari haiyangne ememere fimahana. Ememere emahana égé féri Ala mése guguna fi iri kubumu yoho kéré. Damu gugute hanikéri dagena. Damu katugo nogoki Ala emohoni Nugunabo Ahuyaha Yesus Kristus esumu asuféri baha hamemere gugute hate esumu asuféri bohonané.
[15] Emoho nemohoni, nuguna matahai yangna besingna Yesus Énini fimiri bahana yohoniya, gugu Yesus Énini fimiri bahana égéki modu dongkuni damu Énini fimiri bunané. Damu nugu gugu kumu kotoféri berekang égéki, Yesus nugu bake yokukubumaki égéki nugu hate abuméri nuguna umu gugu bake yokukubumériya égéki damu haiyangne ememere fimiri bunané. Damu kara uni kusumériya daha égé féri gugu bake yokukubumériya égéki damu haiyangne ememere fimiri bunané.
[16] Nugu Nugunabo Ala damu Nugunabo Ahuyaha Yesus Kristus bake u yohowané, "Nugunabo Ala Gusé Nuguki esumu worumoho. Damu Gusé nuguna modu yaha égéki fani ukuni munggu deyoho embahae posu-posukiné, emohoni nugu Gu kumu kotoféri sifing harahaimu fimiri bohowané embahae posu-posukiné," ememere fisini fimiriya, damu tafe habigiyoméri fisini fimiriya. Damu nugu fani haiyangmu beriya deyohote, Yesus Kristus Gusé nuguki woruméri kuyomu emohoni, nugu Ala kumu kotoféri sifing harahaimu fimiri bohowané embahae posu-posukiné ememere habigiyoméri fisini fimiri beriya.
[17] Damu Nugunabo Ala damu Nugunabo Ahuyaha Yesus Kristus, Gugu yohona modu neriyané. Damu yoho bake enané, emohoni yoho awe habigiyoméri esumu wayamu emesumenané damu yoho habigiyoméri u wayamu yori bohonané.