[1] Gugu nuguki etori ememere finané, "Kristus Égé Paulus damu ahu fe yohona fi iri kubumu yohoni, yohote Éné u dari Éné furubo yahana nahu kéré. Damu Ala yoho bake yohona furubo yohona bero teyo kumu égena égéki kurohoni, yohote Ala Éné sifing fimaki anggo posuyahaki kasuni égéni ahu yoho fani nafamakena de égéki awe yobuwoméri yo hohona," ememere finané.
[2] Damu nugu ememere beriyani, nugu ahu nogo gahakumu emowané: Ahu yohonabo yohona u dari furubo yahana yoho yohonabo yohona furubo kurohoni, yohona bero teyo kumu égena égéki fani mungguna de esumu u yohoto hamemere emenané.
[3] Damu gugu bahana ékému ahu tuhuremu yoho nuki efefeméri ememere fimenan kiyoho, "Paulus égé Ala furubo kuroho égéki yeri wayamu emoho." Ememere fimahanate, ahu fe emu-hori-daha yoho nuki efefeméri ememere fimenan kiyoho, "Paulus égé Ala furubo kuroho égéki yeri fani wayamu emoho deyoho." Emohote, ahu yoho fimahana égéki nute fani butumu fifimiri deyoho. Damu hate nuku fani nané furubo Ala kuroho égéki wayamu eméré rahamo kara rahamo fani efefeméri yori inggeméré deyoho.
[4] Damu nu fimiri ukukuwoho fe fani degemu poréyahamu emesuméré deyoho. Emohote, nu ememere bere égéki esumu haiyangmu emesuméré bere fani ememere kubuméré deyoho. Kamu Nugunabo Ahuyaha Égésé nané ukukuwoho égena égéki efefeméri yori inggemoné.
[5] Emoho nemohoni, sawa feniki Nugunabo Ahuyaha Égé defen de égéki, dakasuhumu gugu ahu Yesus Éné furubo yeri bahana yohona furubo égéki efefeméri yori inggemenan deyoho, meneféyané. Sawa Yesus defené moho égéki Égé awe ukukuwoho kasuni égena égéki emoné haharemu éyonané, damu Égé awe ahu yoho yohona ukukuwoho yoku yohona sifingmu fifimiri bahana égéki yobuwoméri yohoné. Damu sawa Nugunabo Ahuyaha ahu emu-hori-daha yohona u efefeméri yori inggemoné moho égéki, Égé ahu isige-isige Éné u dari Éné furubo yeri bahana yoho furubo wayamu emahana égéki yori yohonaukumoné.
[6] Nané matahai yangna besingna Yesus Énini fimiri bahana yohoniya, nu gugu bake u yoré nogoki nu kumu Apolos kumu nuguna ukusi égéki ayoméri yoré. Emohoni, gugute wayamu nafamenan niye. Damu gugu ahu yoho u nogoki yosumahana égéki dari nafamon kiyoho: "Mése Ala Éné Buku Kara womu kumu kauwangkinani bahana égéki nahangkumenan deyoho." Gugu u nogoki dari hamemere emenangkumaka, gugu fani ememere yohonan deyoho, "Nu ahu fe Nugunabo Yesus Éné u esumu wayamu yokukubumoho égéki kotoféyoré. Emohote, gu ahu fe fani wayamu yokukubumoho égéki kotoféyohona." Gugu fani guguna modu kokokéri ememere yohonan deyoho.
[7] Gugu ahu Yesus Éné u dari Éné furubo yeri bahana nahu yohoki efefeméri yori inggemahana yohoniya, ahu menohosé gugu bake guguna na kurohoni, gugu asuféri u fe efefeméri yori inggemahanae? Ahu fe fani guguna na kuroho deyoho. Damu hate Ala gugu bake Éné furubo yeri bohonan niye habigiyo aburohomu kurohoni yeri bahanae? Yahae, haiyangne. Ala Égésé gugu bake kuroho kéré. Emohoni, Ala guguna habigiyo emu-hori-daha égéki kurohoni yeri bohonangkumaka, gugu fani ememere fimenan deyoho, "Nuguna habigiyo kéré. Ala fani kuroho deyoho." Fani ememere yahamu fimiri guguna modu kokokéri gugunaukumenan deyoho, menefeyané.
[8] Emohote, gugu guguki ememere fimahana, "Nugu mése Ala Éné Ubana Hayo habigiyo burahae kuroho emu-hori-daha égéki yariya." Ememere fimiri guguna modu kokokéri gugunaukungguna. Damu hate guguna modu kokokéri ememere gugunaukungguna, "Ala Éné sifing fimoho damu Égé emesumoho égéki mése nafamériya." Damu gugu fimahanani gugu mése ahuhabang kiri Kristus Yesus kumu kotoféri hafuféri bahana gahakumu bahanate, ahu-rasul kiri beriya nugu karawoho. Ha, gugu ahuhabang kiri bohonangkumaki, esumu manggohokin kiyoho! Emohoni, ahu-rasul nugu hate gugu kumu kotoféri ahuhabang kiri hafuféri bohowan kiyoho!
[9] Emohote, nu nané sifingmu fimirini Yesus nuguki kubumu yohoni ahu-rasul kiri beriya nugu fani asuféri beriya deyoho, mite esumu amiféri beriya. Ala fimohoni nugu ememere beriya égéki nugu niye manggohokigi. Damu nugu Yesus Éné sisi yo hohomusumériya égéki, nugu ahu yuhu-rantai arari ahu aburoho yoho etori bahana yohona sama kumu kufiyohonani, poréyahamu eméri uri kufiyonané mahana gahakumu beriya. Emohoni, ahu soho emu-hori-daha bahana yoho damu malaikat Ala Éné busu mene bahana yohote u fe makerahare nugu wokumu éyonané mahana égéki boetahana.
[10] Damu nugu Kristus Éné sisi yobuwoméri yoriyani, ahu soho nokumu bahana yoho ememere fimahana, "Ahu-rasul yoho esumu emuméri bahana." Emohote, Korintus nahu gugu guku de ememere fimahana, "Nugu Kristus kumu kotoféri takenamu beriyani, nugu esumu wayamu fimiri nafamériya." Damu ahu aburoho yoho ememere fimahana, "Ahu-rasul yoho fani habigiyoméri bahana deyoho." Emohote, guku de ememere fimahana, "Ala nugu bake habigiyo kurohoni, habigiyoméri beriya." Damu ahu yoho fimahanani gugu asuféri bahana damu gugunaukunggunate, nuguki etori ememere dirimeféri yohona, "Ahu-rasul yoho amiféri bahana," ememere yohona.
[11] Embahae katugo nogoki nugu areyakigi, damu oho yakigi, damu ifita fani wayamu kuniya deyoho, damu ahu yoho nuguki ifiyo-tifiyomahana, damu nugu fani kuwokuni afahang beriya deyoho.
[12] Damu ohoru rahamo ifita rahamo ukukuwoho fe rahamo aféyan niye nuku nuguna bero féri kugutoméri furubo yariya. Damu ahu yoho nuguki dirimeféri yohonangkumaka, Ala yoho bake wayamu emon niye wayamu yoriya. Damu ahu yoho nuguki ifiyo-tifiyomenangkumaka, nugu modu dongkuni fani hamemere emériya deyoho.
[13] Damu ahu yoho u poréyaha féri yori nuguki dirimeféri yohonangkumaka, damu yoho bake u amiféri yoriya. Nugunabo Ahuyaha nuguki kusumohoni deriyate, ahu yoho nugure emiyohona, "Ahu-rasul yoho suse fani wayamu égenani suse kufiyosumahanato ékému pemériya otoho ememere bahana." Yoho ememere yori nugu bake fani wayamu emahana deyoho. Nugu ememere beriyani embahae uku damu niyaki.
[14] Nu gugu bake kara uni nogoki fani dari hosumenan niye yoré deyoho. Emohote, nu guguki nesiyo gahakumu woruméréni, akiya hanggeramu yori guguki yokukubume niye.
[15] Kristus Yesus nuki kubumu yohoni, nu gugu bake mumangge deri Yesus Éné sisi manggoho yobuwoméri yoréké, damu gugu Éné sisi manggoho égéki dari Énini fimiri bakena. Emoho nemohoni, kamu nu remu gugunabo gahakumu berete, ahu aburoho Yesus Énini fimiri bahana yoho mo deri gugu bake yokukubumahana yoho fani gugunabo gahakumu bahana deyoho.
[16] Emohoni, nu gugu bake yori akiya yahae. Gugu nu emesuméri bere nogoki hamemere nané kusi gahakumu bunané.
[17] Ememere gugu nané kusi gahakumu bohonan niye nusé Timotius kusumeni gugu bake defené. Égé Nugunabo Ahuyaha Énini fimiri baha, damu nu égéki namu gahakumu woruméré. Égé Nugunabo Ahuyaha Éné furubo yeri nuki mahamu emoho égéki fani munggu deyoho. Égé gugu bake defenéka, damu nu Kristus Yesus kumu kotoféri takenamu beriyani, Éné u dari wayamu emesuméri bere égéki gugu bake yohoné. Emohoni, gugute dari dakamu fifimenané. Égé yokukubumoné moho égéki nu busu fe busu fe hori ahu-jemaat emu-hori-daha yoho bake yokukubuméré égéki hamu hanéri égé.
[18] Emohote, gugu bahana ékému ahu yahamuto yoho ememere u yohona, "Paulus égé fani tafe nokumu dakamu defen deyoho." Emohoni, yoho yohona modu kokokéri ememere yohonaukuni yohona, "Nugu habigiyoméri wayamu beriya."
[19] Emohote, Nugunabo Ahuyaha hanikéri "yahae" emiyohongkumaki, nu awe kakumu gugu bake defe. Damu nu deri ahu énéyuhuwoho etori yoho u yohona égéki wayamu nafame. Yoho yohona modu kokokéri emiyohona, "Nugu nuku habigiyoméri wayamu beriya." Ememere u yohona égéki kamu u remu yohona rahamo yoho esumu Ala Éné habigiyo yeri ahu fe yoho mahamu emesumahana rahamo ememere nafame.
[20] Damu Ala nuguna Ahuhabang kiri baha, damu nugu Énahu kiri beriya. Nugu ememere bohowangkumaka, nugu modiyané Ala Éné habigiyo féri nuguna sifing damu nugu emesumériya égéki degemu emoné. Emohoni, nugu fani kamu Ala Éné u remu yosumowan deyoho, mite nugute Éné u dari wayamu emesuméri bohowané.
[21] Nu gugu bake defe méré égéki, nu awe gugu bake makemere emeye? Gugu guguna modu kokokéri bahana égéki fani modinan dekumaka, gugu bake nané na yeri poréyahamu eme. Emohote, guguna modu amiféri degemu wayamu bohonangkumaka, nu awe guguki woruméri u amiféri yahae.