[1] Damu nugu habigiyoméri ahu soho nokumu bahana yoho u emu-hori-daha deregemu yohona égéki nafaméri awe hamemere yohowané; malaikat yohona u yohona égéki awe hamemere yohowané ememere bohowanéte, nugu ahu fe yohoki worumowan dekumaka, nugu u yoriya égéki kukuwoho-lonceng gogomahanani éné pou fikoyahakigite, éné u fani haiyangmu ége de gahakumu égé.
[2] Damu Ala Éné Ubana Hayo nugu bake habigiyo fe kuroho égéki yeri Ala nugu bake u yoho égéki dari ahu fe yoho bake yohowané ememere beriyate, nugu ahu fe fani worumowan dekumaka, ahu u homereyaha yohona gahakumu beriya. Damu Ala Ukuné sifingmu fimiri ukukuwoho emu-hori-daha fake emoné moho égéki awe esumu kirimu nafamowané; ukukuwoho emu-hori-daha égéki awe nafaméri bohowané ememere beriyate, nugu ahu fe yohoki fani worumowan dekumaka, nugu ahu u homereyaha yohona gahakumu beriya. Damu nugu esumu kirimu Alani fimiri beriyani, soho haibe siyaha bake yohowané, emohoni soho haibe siyaha égé degemu dohori éyoné ememere esumu kirimu Alani fimiri beriyate, nugu ahu fe fani worumowan dekumaka, nugu ahu homereyaha bahana gahakumu beriya.
[3] Damu nugu nuguna toto emu-hori-daha kufiyori etori ériya égéki ahu fe toto karakigina yoho bake kemerohowané; nuguna modu hanikéri ahu yoho niye nuguna aduwosoho kurori modiyané nuguki uri kufiyonané ememere beriyate, nugu ahu fe yohoki fani worumowan dekumaka, nugu emériya égéki fani nugu niye wayamu égé deyoho.
[4] Damu ahu yoho ahu fe yohoki worumenangkumaka, yoho yohona modu dongkuni emahana, damu yohona modu kuyomu emahana, damu yoho fani ahu fe yoho toto rahamo aneséyang rahamo ememere yeri wayamu bahana égéki etori yohona modu hakeremenan deyoho. Damu ahu yoho ahu fe yohoki worumenangkumaka, yoho yohona modu kokokéri yohonaukumenan deyoho, damu yoho fani kokokéri ahu fe yoho amiféri bahanate, yoku esumu asuféri bahana ememere fimenan deyoho.
[5] Damu ahu yoho ahu fe yohoki worumenangkumaka, yoho fani ahu yoho bake hagiyakéri emenan deyoho, damu yoho yoku yoho remu fimiri kamu yoho niye kukuwoho wayamu égena égéki efefeméri bohonan deyoho, damu yoho ahu yoho bake fani kakumu ufuyosumenan deyoho, damu ahu fe yoho keiyongmu emakena éné u égéki fani dakamu butumu fimiri bohonan deyoho.
[6] Damu ahu yoho ahu fe yohoki worumenangkumaka, yoho ahu yoho keiyongmu emahana égéki etori fani hanikigina deyohote, ahu fe yoho haiyangmu emahana égéki etori hanikigina.
[7] Damu ahu yoho ahu fe yohoki worumenangkumaka, yohona modu habigiyoméri bahanani, ahu fe yoho poréyahamu emahanate, yoho damu habigiyoméri modu dongkuni kugutoméri bahana; yoho fani homereyaha ahu fe yoho poréyahamu emahana ememere fimiri kakumu yohona fi iri yohonan deyoho; ahu fe yoho haiyangmu emenané ememere butumu fisini fimahana; yoku ukukuwoho agefekigina emu-hori-daha gebuuri kugutoméri bahana égéki, yohona modu dongkuni kugutoméri bahana.
[8] Damu ahu yoho ahu fe yohoki worumahana égéki fani anigiyon de, damu de éyoné embahae posu-posukiné. Emohote, ahu yoho Ala Éné Ubana Hayo habigiyo fe kuroho égéki yeri Ala yoho bake u yoho égéki dari ahu fe yoho bake yo hohomusumahana égéki awe fani méké kebemu éyon deyoho. Damu Ala Éné Ubana Hayo Éné uhaiyang ahu yoho fani nafamahana de égéki kurohoni, u égé féri yohona égéki awe anigiyonané. Damu ukukuwoho emu-hori-daha nafamahana égéki awe fani méké kebemu éyon deyoho.
[9] Ahu soho nokumu beriya nugu ukukuwoho tuhuremu nafamériyate, tuhuremu fe fani nafamériya deyoho. Damu Ala nugu bake u emu-hori-daha yobuwoméri yoho deyoho. Emohoni, ahu Ala Éné u tuhuremu yoho égéki dari yohonate, tuhuremu fani dari yohona deyoho.
[10] Emohote, sawa feniki Ala awe emoné ukukuwoho emu-hori-daha esumu wayamu éyoné, fe fani poréyahamu éyon deyoho. Sawa ememere égé égéki, Ala Éné Ubana Hayo habigiyo deregemu égena kemeroho ememere ukukuwoho tuhuremu fani kirimu wayamu égena de égéki awe anigiyonané.
[11] Damu nu ukusi feki yori yahae: Nugu ahu isige-isige ofo unaware beriya égéki, ofo unaware gahakumu yorékang, damu ofo unaware gahakumu fimirikang, damu ofo unaware gahakumu emowané mérékang. Emohote, nugu ahuyaha kiri beriya égéki, ofo unaware emesuméri berekang égéki mése muniya.
[12] Damu nugu katugo soho nokumu beriya égéki ohowisi etoriyani, usubang égéte, fani femu etoriya de gahakumu égé. Emohote, sawa feniki nugu awe nuguna ketobégé kutumu etoriya gahakumu uwaneri etohowané. Hamemere katugo nogoki ukukuwoho emu-hori-daha égena égéki fani haiyangmu femu nafamériya deyoho, tuhuremu damu emumériya. Emohote, sawa feniki, Ala nuguki etori esumu kirimu nafamoho gahakumu ukukuwoho emu-hori-daha kirimu wayamu nafamowané, fe fani emuméri bohowan deyoho.
[13] Emohoni, katugo nogoki ukukuwoho ukumasiyo égena égéki fani anigiyonan de, nugu awe emowané embahae posu-posukiné. U ukumasiyo égena égéki Ala Énini kirimu fimiri beriya, damu feki Ala awe nugu bake ukukuwoho kurohoné aféyané mériya égéki butumu fisini fimiri beriya, damu feki ahu yohoki worumériya égé kéré. Ememere égena ékému esumu mumangge manggohomu égé égéki nugu ahu fe yohoki worumériya égé kéré.