[1] ከዚህም በኋላ፥ በዙፋኑ ላይ በተቀመጠው በቀኝ እጁ ላይ በውስጥና በውጭ የተጻፈባት፥ በሰባትም ማኅተም የታተመች መጽሐፍን አየሁ።
[2] ኀያል መልአክም ፥ “ያቺን መጽሐፍ ይገልጥ ዘንድ፥ ማኅተሞችንም ይፈታ ዘንድ ለማን ይገባዋል?” እያለ በታላቅ ድምፅ አሰምቶ ሲናገር አየሁ።
[3] በሰማይም ቢሆን፥ በምድርም ቢሆን፥ ከምድርም በታች ቢሆን፥ ያችን መጽሐፍ ሊገልጥና ሊያያት የተቻለው የለም።
[4] ያለቀሱ ብዙዎች ናቸው፤ እኔም አብሬአቸው አለቀስሁ፤ ያቺን መጽሐፍ ሊገልጣትና ሊያያት የሚገባው ሆኖ የተገኘ የለምና።
[5] ከአለቆቹም አንዱ ፥ “አታልቅስ፥ እነሆ፥ ከይሁዳ ነገድ የሆነው አንበሳ እርሱም የዳዊት ዘር መጽሐፉን ይገልጥ ዘንድ፥ ሰባቱንም ማኅተም ይፈታ ዘንድ፥ ድል ነሥቶአል ” አለኝ።
[6] በዙፋኑና በአራቱ እንስሶች መካከል፥ በሃያ አራቱ አለቆችም መካከል እንደ ታረደ በግ ቆሞ አየሁ፤ ሰባት ቀንዶችና ሰባት ዐይኖችም ነበሩት፤ ይኸውም በምድር ሁሉ የተላከ የእግዚአብሔር መንፈስ ነው።
[7] መጥቶም በዙፋኑ ላይ ከተቀመጠው፥ ከቀኝ እጁ ይችን መጽሐፍ ወሰዳት።
[8] መጽሐፍዋንም በወሰደ ጊዜ፥ ሃያ አራቱ አለቆችና አራቱ እንስሶች በፊቱ ወድቀው ለበጉ ሰገዱለት፤ ሁሉም በገናንና የቅዱሳን ጸሎት የሆነ ዕጣን የሞላበትን የወርቅ ዕቃ ይዘዋል።
[9] በአዲስ መዝሙርም ይዘምሩ ነበር፤ እንዲህም ይሉ ነበር ፥ “ያቺን መጽሐፍ ልትቀበል፥ ማኅተምዋንም ልትፈታ ይገባሃል፤ ተገድለሃልና፤ በደምህም ከሕዝብና ከአሕዛብ፥ ከነገድም ሁሉ፥ ከወገንም ሁሉ ሰዎችን ለእግዚአብሔር ዋጅተሃልና።
[10] ከእነርሱም፥ ለአምላካችን ነገሥታትንና ካህናትን ሾምህ፤ በምድርም ሁሉ ይነግሣሉ።”
[11] አየሁም፥ በዙፋኑም በእንስሶቹና በአለቆቹ ዙሪያ የብዙ መላእክትን ድምፅ ሰማሁ፤ ቐጥራቸውም የብዙ ብዙ እልፍ አእላፋት ነበር።
[12] በታላቅ ድምፅም እንዲህ አሉ ፥ “ለታረደው በግ ፥ ኀይልንና ባለጠግነትን፥ ጥበብንና ብርታትንም፥ ክብርንና ምስጋናንም፥ በረከትንም ሊቀበል ይገባዋል።”
[13] በሰማይና በምድር፥ ከምድርም በታች፥ በባሕርም ላይ ያለ ፍጥረት ሁሉ፥ በእነርሱም ውስጥ ያለው ሁሉ “በረከትና ክብር፥ ምስጋናና ኀይልም ከዘለዓለም እስከ ዘለዓለም በዙፋኑ ለተቀመጠው፥ ለበጉም ይሁን ” ሲሉ ሰማሁ።
[14] አራቱ እንስሶችም አሜን አሉ፤ እነዚያም አለቆች ወድቀው ሰገዱለት።