[1] In mga belag kaimo patoldowen agpasakop sa mga poon sa mga apo kabaloyan, maniwala sa kansiro, palagi sandata agpangwat in boote maal.
[2] In mga belag kaimo patoldowen ayaw aglibak kamayba kay nakay, ayaw agpalaway. Dayem agpabelag osai agpakayawte sa boo mangyan.
[3] Tangona kitam din idapo bait, mga daegan, pabaribid, kitam sakop wa gayed sa boo daeten pag piyagkabeet kantam bilog, keyen makaanggay. Tangona kitam agogali agremrem daet osai agpanagiri. Kitam piyagkabaisan in roma mangyan, siro din kantam piyagkabaisan.
[4] Kamay paka piyagngitan wa in kamaalnowen in Diyos kantam agpamaboway, in siyo agpakayawte sa kantam,
[5] kitam kansiyo piyaboway. Ina kantam abel yewed panawen sa kantam maalen pag mga piyangwat dayem panawen sa kansiyo agpakayawte. In kitam liinis in Betek pag Abyan kitam biyodang wakay piyangwat bayo wakay.
[6] Panawen kay IsoKiristo in kantam Agpamaboway in Betek pag Abyan tiyaboy lakoy Diyos sa kantam.
[7] Matang in siyo agpakayawte lakoy sa kantam, kitam piyangwat idapo daet, osai piyakan in boway idapo kalobosan in kantam piyagpanaya.
[8] Betek ngani ina pag siyabi. Na kangay beet kao ayaw aglimbang agpatoldo ina sa mga agpasandig sa Diyos matang siro sandata agpilit agpanawen maal. Ina in maalno, apo kabolowan sa mga mangyan.
[9] Kao ayaw agpaagem sa mga agpalsagotan idapo kabolowan, ayaw agpanggisoden in mga kasokponan, osai ayaw agpalawayan panawen sa mga Batas, angkataw in mga kataw ina idapo kabolowan, idapo batay pakinabang.
[10] No apo mangyan agpapoon agpaylabanan na kaimo pangelelen anggan makadowai, kalbas no agaway kay na ayaw wa agawiten belag,
[11] angkataw kaimo wa atawanan siyo daeten pag mangyan. Kaya atawanan siyo baribid panawen daan sa kansiyo mga daet pag panawen.
[12] Asin kangay batay piyagpataboy Artimas, no yewed Tikiko. Paka rateng wa asin, na ayaw yewed kao toloy ista pataboy sa kangay sa Nikopolis. Ista wa ako batay agpakalbas in mga bolan pamagyo.
[13] Sinas in abogado osai Apolo kaimo piliten tolongen sa kansiro agipanaw. Kaimo tiyaken siro ayaw akorangan sa boote.
[14] Kantam mga belag kaimo patoldowen ayaw aglimbang ageyat agpanawen, matang in kansiro mga kailangan siro apo daan kowaan osai kabaloy din agtolong sa mga idapo.
[15] In boo kangay mga sarig atai keyen, Kataw nakay wa kao? Kaimo sabiyen sa kanta mga belag agpaniwala siro nangkataw wa. In kangay pandalangin sa kanyo boo keyen, Kamo pakayawteen lakoy Diyos.