[1] Kamay kao, in kaimo patoldowen in betek pag adar.
[2] Kaimo sabiyen sa mga aplaki kailangan siro kabaloy agsakop sa kansiro remrem, ayaw talamesa, apo bait, osai marigen in agpasandig, osai agpakayawte, yewed agpaglebey.
[3] Sa mga wakay agbangen akbai kaimo sabiyen kailangan maalno in kansiro ogali, ayaw agpanlibak, ayaw agpamarik, matang siro kapatoldo in maal,
[4] matang in kasalokoyan kay pag mga kagbaiyan kansiro apatoldo agpakayawte sa kansiro lalaki kadayo sa kansiro mga bodang,
[5] apo bait, maalno in remrem, yewed bibelen, mabait, agpaniwala sa kansiro mga lalaki, matang idbatay piyaidapo kabolowan in agiplaong Diyos.
[6] Kadayo in mga kasalokoyan kay pag mga kaliyakiyan kaimo piliten agsakop sa kansiro remrem.
[7] Sa boo kaimo ogali kailangan kao maalno pag toladan. In kao agpatoldo ayaw aglimbang, remremen gayed maal.
[8] Kaimo alapeten in betek pag mga agiplaong, in mga idapo batay ngiitan daet, matang in mga aglaban sa kantam batay arikoyan, idapo batay masabi daet panawen sa kantam.
[9] In mga alapet sogowan kaimo patoldowen maniwala sa kansiro mga kapwan, in boote panawen pangwaten makaanggay sa kansiro, ayaw labanan.
[10] Ayaw agpanakaw sa kansiro kapwan, dayem sa boote panawen siro maal piyaalapetan, matang batay piyagmaal in adar Diyos in kantam Agpamaboway.
[11] Angkataw piyalowas wa Diyos in kansiyo maalno pag remrem in agpamaboway sa boo mangyan.
[12] Ina in agpatoldo sa kantam agbenglay sa baribid pag mga ogali in mga piyagkabeet waget kantam bilog. Matang ngona kitam katawan agsakop sa kantam remrem, betek wa in ogali, makaanggay sa Diyos,
[13] ngona in kitam agpanaya kay sa kantam maalno pag piyagpanaya, in piyagpalowas in kalakoyen lakoy Diyos kantam Agpamaboway IsoKiristo.
[14] Kansiyo tiyaboy in kansiyo boway matang kitam makowa sa boo daet, kansiyo wa gayed piyakapya matang kansiyo wa mga mangyan, beet wano agpangwat maal.
[15] Ina wa boo in kaimo patoldowen. In boo kaimo kabaloyan kaimo alapeten sa agpamakaeyat remrem osai sa agpangelel. Ayaw kaimo agpabayaanen kamayba nakay pag mangyan in agidapo kabolowan sa kaimo.